بۇل تۋرالى يندۋستريا جانە ينفراقۇرىلىمدىق دامۋ ءمينيسترى قايىربەك وسكەنبايەۆ مالىمدەدى.
قازاقستاندا قۇرىلىس ساپاسىن تەكسەرۋ ءۇشىن تاۋەلسىز مەملەكەتتىك زەرتحانالىق قىزمەت قۇرۋ جوسپارلانىپ وتىر، دەپ حابارلايدى Almaty-akshamy.kz.
مينيستر قۇرىلىس ساپاسىنا قاتىستى ازاماتتاردان كوپتەگەن شاعىم تۇسەتىنىن اتاپ ءوتتى. وسىعان بايلانىستى قۇرىلىس ساپاسىنا مەملەكەتتىك باقىلاۋدى كۇشەيتۋ ماقساتىندا زاڭناماعا تۇزەتۋلەر ازىرلەندى:
1. قۇرىلىستى ساپاسىز جوسپارلاۋدى بولدىرماۋ ماقساتىندا قالا قۇرىلىسى ساراپتاماسىن ەنگىزۋ؛
2. قۇرىلىستىڭ بارلىق كەزەڭىندە (قازانشۇڭقىر قازۋدان باستاپ اباتتاندىرۋ جۇمىستارىنا دەيىن) وبەكتىلەرگە جوسپارلى باقىلاۋ ەنگىزۋ جانە مەملەكەتتىك ساۋلەت-قۇرىلىس باقىلاۋى باسقارمالارىنىڭ نىسانداردى پايدالانۋعا قابىلداۋعا قاتىسۋى؛
3. پايدالانىلاتىن ماتەريالدار مەن ورىندالعان جۇمىستاردىڭ ساپاسىنا زەرتحانالىق جانە تەحنيكالىق تەكسەرىس جۇرگىزۋ ءۇشىن تاۋەلسىز مەملەكەتتىك زەرتحانالىق قىزمەت قۇرۋ.
ءقازىر زاڭ جوباسى مۇددەلى مەملەكەتتىك ورگاندارمەن جانە ۇيىمدارمەن تالقىلانىپ جاتىر.
«قۇرىلىس پروسەسىن سيفرلاندىرۋ اياسىندا مەملەكەتتىك فۋنكسيالاردى ىسكە اسىرۋ ءۇشىن مودۋلدەرى بار eQurylys ءبىرىڭعاي قۇرىلىس پورتالى ىسكە قوسىلىپ، قۇرىلىس ءتىزىلىمى جۇكتەلدى. رەەسترگە وزگەرىستەر مەن تولىقتىرۋلار ەنگىزۋ، ساراپشىلاردى تەستىلەۋ ءراسىمى اۆتوماتتاندىرىلدى جانە تەحنيكالىق قاداعالاۋ ەسەپتىلىگى ەلەكتروندى فورماتقا اۋىستىرىلدى»، - دەدى وسكەنبايەۆ ۇكىمەت وتىرىسىندا.
سونىمەن قاتار اتقارۋشى قۇجاتتامانى ەلەكتروندى فورماتقا اۋىستىرۋ ءۇشىن پورتالدى نارىق سۋبەكتىلەرىنىڭ كورپوراتيۆتىك اقپارات جۇيەلەرىمەن ينتەگراسيالاۋ جۇرگىزىلۋدە. پورتالدا بەرىلەتىن اقپاراتقا قويىلاتىن تالاپتار ايقىندالىپ، نارىق وسىنداي جۇيەلەردىڭ ءونىم بەرۋشىلەرى قىزمەتتەرىن دەربەس تاڭدايدى.
بۇگىنگى تاڭدا اتقارۋشى قۇجاتتامانى پيلوتتىق رەجيمدە جۇرگىزۋ تۇرعىن ءۇي وبەكتىلەرى مەن اۆتوموبيل جولدارىندا ىسكە قوسىلدى.
مينيستر قابىلدانعالى وتىرعان تاسىلدەر ازاماتتاردىڭ تۇرعىن ءۇي ماسەلەلەرىن شەشۋگە باعىتتالعان جانە تۇرعىن ءۇي قۇرىلىسىن دامىتۋدى ىنتالاندىرىپ، قۇرىلىس پروسەستەرىنىڭ اشىقتىعى مەن جوسپارلاۋ ساپاسىن قامتاماسىز ەتەتىنىن اتاپ ءوتتى.