ماماندار مۇگەدەكتىگى بار قازاقستاندىقتاردىڭ تۇرمىستاعى مۇمكىندىكتەرى كەڭەيەتىنىن ايتتى

بۇگىنگى تاڭدا كومەككە مۇقتاج ادامداردىڭ 62،4 پايىزى قامتىلدى. 

مۇگەدەكتىگى بار ادامداردىڭ تۇرمىستاعى شەكتەۋلەردى ەڭسەرۋىنە مۇمكىندىك بەرەتىن قىزمەتتەر مەن تەحنيكالىق قۇرالدار ارنايى الەۋمەتتىك قىزمەتتەر پورتالى ارقىلى ۇسىنىلادى. بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى، دەپ حابارلايدى Almaty-akshamy.kz. 

بيىلدىڭ وزىندە پورتال ارقىلى 214 مىڭ قىزمەت كورسەتىلدى. ياعني، كومەككە مۇقتاج ادامداردىڭ 62،4 پايىزى قامتىلدى. 

«بۇرىن وسى جۇمىستىڭ ءبارى جەرگىلىكتى جەردە اتقارىلاتىن. سايكەسىنشە، جەرگىلىكتى جانە ورتالىق مەملەكەتتىك ورگاندار قىزمەتىنە سىن-ەسكەرتۋ وتە كوپ ايتىلىپ كەلگەن. 2021 جىلى پورتالدىڭ ىسكە قوسىلۋى جەكە وڭالتۋ باعدارلامالارىنىڭ ورىندالۋىن 87 پايىزعا جەتكىزدى. سونىمەن بىرگە، وڭالتۋعا قاجەتتى قۇرالدارمەن جانە قىزمەتتەرمەن قامتاماسىز ەتۋ مەرزىمىن 8 ايدان 14 كۇنگە دەيىن قىسقارتتى»، - دەدى تامارا دۇيسەنوۆا ۇكىمەتتىڭ بۇگىنگى وتىرىسىندا. 

ءمينيستردىڭ ايتۋىنشا، پورتال بارلىق مۇقتاج ادامنىڭ قاي جەردە تۇرعانىنا قاراماستان، قىزمەتتەر مەن تەحنيكالىق قۇرالدارعا قولجەتىمدىلىگىن قامتاماسىز ەتتى. قۇرال-جابدىقتار مەن قىزمەتتەردى جانە ونى بەرۋشىنى اركىم ءوزى تاڭداۋ مۇمكىندىگىنە يە بولدى. 

«دەگەنمەن قۇرالدارىنىڭ ساپاسىنا، ءونىم وندىرۋشىلەردىڭ باعا ساياساتىنا جانە ولاردىڭ ءوز مىندەتىن ادال ءارى ۇقىپتى اتقارۋىنا بايلانىستى ءالى دە ماسەلەلەر بار. وسىعان وراي، وڭالتۋ قىزمەتى مەن قۇرالداردىڭ ستاندارتى، باعا ساياساتى جانە ءتيىستى قىزمەتتى ۇسىنۋشىلاردى پورتالعا تىركەۋ شارتتارى قايتا قارالاتىن بولادى. بۇل شارالار قىزمەت كورسەتۋ نارىعىن دامىتۋعا جاعداي جاساۋعا جانە قىزمەت ۇسىنۋشىلاردى ءادىل باسەكەگە ىنتالاندىرۋعا باعىتتالعان»، - دەيدى ەڭبەك ءمينيسترى.