تۇرعىن ءۇي كەزەگىنە ەندى تەك ونلاين تۇردە تۇراسىز

بۇل ءراسىم تەك egov.kz پورتالى ارقىلى ەلەكتروندى تۇردە جۇرگىزىلەدى.

بۇدان بىلاي تۇرعىن ءۇي كەزەگىنە قويۋ تۋرالى ءوتىنىمدى «ازاماتتارعا ارنالعان ۇكىمەت» كوممەرسيالىق ەمەس اكسيونەرلىك قوعام (حالىققا قىزمەت كورسەتۋ ورتالىقتارى) قابىلدامايدى، دەپ حابارلايدى Almaty-akshamy.kz

ەgov.kz پورتالى ارقىلى كەزەككە تۇرۋ ءۇشىن بار بولعانى ەلەكتروندى سيفرلىق قولتاڭبا كەرەك. ەسق ارقىلى كىرگەن ادامنىڭ كىرىستەرى، ادرەستىك تىركەۋى، قانداي ساناتقا جاتاتىنى تۋرالى مالىمەتتىڭ ءبارى وزدىگىنەن شىعىپ تۇرادى. مۇندا دا باسپانا كەزەگىنە تۇرۋشىنىڭ ءوزى ءوتىنىش بەرىپ وتىرعان قالادا كەم دەگەندە ءۇش جىل تۇراقتى تىركەۋى بولۋى شارت. ءوتىنىش بەرگەن ادامنىڭ جانە ونىڭ وتباسى مۇشەلەرىنىڭ كەزەككە تۇرعان ساتتە جانە سوڭعى 5 جىلدا ق ر بويىنشا مەنشىك قۇقىعىندا تۇرعىن ءۇي مۇلكى بولماۋى ءتيىس.

تۇرعىن ءۇي كەزەگىنە مىنا ادامدارى تۇرا الادى:

* ەكىنشى دۇنيەجۇزىلىك سوعىستىڭ مۇگەدەكتەرى مەن قاتىسۋشىلارى؛

* جەتىم بالالار، اتا-اناسىنىڭ قامقورلىعىنسىز قالعان بالالار؛

* حالىقتىڭ الەۋمەتتىك وسال توپتارى؛

* كوپ بالالى وتباسىلار؛

* مەملەكەتتىك قىزمەتشىلەر، بيۋدجەتتىك ۇيىمداردىڭ قىزمەتكەرلەرى، اسكەري قىزمەتشىلەر، عارىشكەرلىككە كانديداتتار، عارىشكەرلەر، ارناۋلى مەملەكەتتىك ورگانداردىڭ قىزمەتكەرلەرى، مەملەكەتتىك سايلانبالى قىزمەت اتقاراتىن ادامدار؛

* جالعىز تۇرعىن ءۇيى قازاقستان رەسپۋبليكاسىنىڭ زاڭناماسىندا بەلگىلەنگەن تارتىپپەن اۆاريالىق جاعدايدا دەپ تانىلعان ازاماتتار.

حالىقتىڭ الەۋمەتتىك وسال توپتارىنا كىمدەر جاتادى؟

* ەكىنشى دۇنيەجۇزىلىك سوعىستىڭ مۇگەدەكتەرى مەن قاتىسۋشىلارىنا تەڭەستىرىلگەن ادامدار؛

* مۇگەدەك بالالارى بار نەمەسە ولاردى تاربيەلەۋشى وتباسىلار؛

* كەيبىر سوزىلمالى اۋرۋلاردىڭ اۋىر تۇرلەرىمەن اۋىراتىن ادامدار:

* جاسىنا بايلانىستى زەينەتكەرلەر؛

* جەتىم بالالار، اتا-اناسىنىڭ قامقورلىعىنسىز قالعان بالالار

* كوپ بالالى وتباسىلار؛

* تولىق ەمەس وتباسىلار؛

* I جانە II توپتاعى مۇگەدەكتەر؛

* قانداستار؛

* ەكولوگيالىق ءزىلزالالار، تابيعي جانە تەحنوگەندىك سيپاتتاعى توتەنشە جاعدايلار سالدارىنان تۇرعىن ۇيىنەن ايىرىلعان ادامدار؛

* مەملەكەتتىك مىندەتتەرىن اتقارۋ كەزىندە قازا تاپقان (قايتىس بولعان) ادامداردىڭ وتباسىلارى.

تۇرعىن ۇيگە كەزەككە تۇرۋ ءۇشىن قۇجاتتاردى دا egov.kz پورتالى ارقىلى ەلەكتروندى تۇردە ەسق كومەگىمەن جۇكتەپ وتكىزەدى.