تۇرعىن ءۇي كەزەگىندە تۇرعاندار سانى قانشاعا جەتتى؟

ق ر پرەمەر-مينيسترى ءاليحان سمايىلوۆ قازاقستاندىقتاردى تۇرعىن ۇيمەن قامتاماسىز ەتۋ بويىنشا مەملەكەت قابىلداپ جاتقان شارالار تۋرالى ايتتى، دەپ حابارلايدى Almaty-akshamy.kz 

«قازىرگى ۋاقىتتا جەرگىلىكتى اتقارۋشى ورگانداردا ەسەپتە تۇرعانداردىڭ سانى 590 مىڭنان استام ادامدى قۇرايدى. كەزەكتە تۇرعاندار سانىنىڭ وسۋىنە بايلانىستى تۇرعىن ۇيگە ەلەۋلى جەڭىلدىكتى باعالار مەن كرەديت بويىنشا پايىزدىق مولشەرلەمەلەر تۇرىندە مەملەكەتتىك قولداۋدىڭ ءتيىمدى شارالارىنىڭ تارتىمدىلىعى ايتارلىقتاي اسەر ەتەتىنىن اتاپ ءوتۋ قاجەت»، - دەپ جازدى ءاليحان سمايىلوۆ دەپۋتاتتىق ساۋالعا بەرگەن جاۋابىندا.

جالپى، ازاماتتاردى تۇرعىن ۇيمەن قامتاماسىز ەتۋگە باعىتتالعان نەگىزگى مەملەكەتتىك قولداۋ شارالارى مىناداي ىنتالاندىرۋشى تەتىكتەر ارقىلى قولجەتىمدى بولادى:

- كەزەكتە تۇرعانداردىڭ جالداۋ اقىسىن سۋبسيديالاۋ؛ 

- ءوز قىزمەتكەرلەرى ءۇشىن تۇرعىن ءۇي سالعان اۋىلداعى جۇمىس بەرۋشىلەر شىعىندارىنىڭ 50%-ىن سۋبسيديالاۋ؛

- ازاماتتارعا 2% جانە 5% مولشەرلەمە بويىنشا جەڭىلدىكپەن كرەديت بەرۋ؛ 

«اتالعان شارالار ەسەبىنەن 10 جىل ىشىندە تابىسى ءارتۇرلى دەڭگەيدەگى جەرگىلىكتى اتقارۋشى ورگانداردا تۇرعىن ۇيگە مۇقتاجدار ەسەبىندە تۇرعان ازاماتتارعا كەشەندى مەملەكەتتىك قولداۋ كورسەتۋ جوسپارلانىپ وتىر»، - دەپ تۇيىندەدى پرەمەر-مينيستر.