ماقتاارالداعى ۇيلەردىڭ اۋلاسىن سۋ باستى

جاڭبىردىڭ سالدارىمەن كۇرەس ءالى توقتالماعان.

تۇركىستان وبلىسى ماقتاارال اۋدانىندا 3000-عا جۋىق ءۇيدىڭ اۋلاسىن سۋ باستى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ماقتاارال اۋدانىندا تولاسسىز جاۋىپ جاتقان جاڭبىردىڭ سالدارىمەن كۇرەس ءالى توقتاعان جوق. ءقازىر وڭىردە بارلىعى 214 موتوپومپا جۇمىس ىستەپ جاتىر.

«تۇرعىن ۇيلەردىڭ اۋلالارىن سۋ باسۋ جاعدايى وتە كوپ تىركەلۋدە. شتابتىڭ بارلىق تۇرعىن ۇيگە بىردەي كومەك كورسەتۋى فيزيكالىق تۇرعىدان مۇمكىن ەمەس. ەڭ ءبىرىنشى كەزەكتە از قامتىلعان، كوپ بالالى، مۇمكىندىگى شەكتەۋلى، جالعىزباستى انالارى بار وتباسىلارعا كومەك كورسەتۋدەمىز. وسىعان بايلانىستى بارلىق اۋدان تۇرعىندارى، كاسىپكەرلەردى، ەرىكتى ازاماتتاردى ورىن العان جاعدايمەن بىرىگىپ كۇرەسۋگە شاقىرامىن»، - دەيدى اۋدان اكىمى باقىت اسانوۆ.

جالپى، اۋداندا 3 مىڭعا جۋىق ءۇيدىڭ اۋلالارىن سۋ باسۋ جاعدايى تىركەلگەن. بۇگىنگە دەيىن جەرگىلىكتى اكىمدىكتەردىڭ جانە وبلىستىق، اۋداندىق توتەنشە جاعداي قىزمەتكەرلەرىنىڭ تاۋلىك بويى اتقارعان جۇمىستارىنىڭ ناتيجەسىندە 15501 تەكشە مەتر جاڭبىر سۋى تارتىلدى.

ايتا كەتەيىك، ەكى اپتادان بەرى تىنىمسىز جاۋعان جاۋىن-شاشىننان جەر استى سۋى كوتەرىلىپ، ماقتاارال اۋدانىندا بىرنەشە ەلدى مەكەندەردە كوشەلەر مەن ۇيلەردىڭ اۋلالارىن سۋ باسۋ جاعدايلارى ورىن الدى.