تۇراقتى، ءقاۋىپسىز، ەكولوگيالىق تازا – اەس تۋرالى ساراپشىلار پىكىرى

اەس قۇرىلىسى بويىنشا ساراپتامالىق تالقىلاۋ قازاق ونكولوگيا جانە راديولوگيا عىلىمي-زەرتتەۋ ينستيتۋتىندا ءوتتى، دەپ حابارلايدى aqshamnews.kz

كەزدەسۋگە الماتى قالاسىنىڭ AMANAT پارتياسىنىڭ ورتالىق اۋداندىق فيليالىنىڭ ءتوراعاسى نايليا وردابايەۆا، قالالىق ءماسليحات دەپۋتاتى اسيە اقانوۆا، يادرولىق فيزيكا ينستيتۋتىنىڭ رادياسيالىق قاۋىپسىزدىك ءبولىمىنىڭ باسشىسى ميحايل مۋحورتوۆ جانە قالالىق قوعامدىق كەڭەستىڭ وكىلى نۇرجان جاقىپوۆ قاتىستى.

مۇنداي ساراپتامالىق كەزدەسۋلەر اشىق ديالوگ فورماتىندا ءوتىپ، اەس قۇرىلىسىنا قاتىستى رەفەرەندۋمعا دايىندىق اياسىندا حالىقتىڭ بارلىق سۇراقتارىنا جاۋاپ بەرۋدى ماقسات ەتەدى.

قاتىسۋشىلاردىڭ پىكىرى بويىنشا، قازاقستاندى دامىعان ەلدەر قاتارىنا ەنگىزۋدىڭ ءبىر جولى – اتوم ەلەكتر ستانسياسىن (اەس) سالۋ بولىپ تابىلادى.

– قازىرگى زامانعى اەس-تەردى ەلدىڭ نەگىزگى ەنەرگيا ءوندىرۋشى كوزى رەتىندە «جاسىل ەنەرگەتيكا» دەپ اتاۋعا بولادى. ەلەكتر ەنەرگياسىن وندىرەتىن باسقا كوزدەرمەن، مىسالى، كومىر نەمەسە گاز قولداناتىن جەو-لارمەن سالىستىرعاندا، اەس ەنەرگيا تيىمدىلىگى بويىنشا ءابسوليۋتتى كوشباسشى بولىپ تابىلادى. سونداي-اق اتوم ەلەكتر ستانسياسى – جوعارى تەحنولوگيالىق جانە سەنىمدى كەشەن، ول زاماناۋي جابدىقتاردان، بىلىكتى كادرلاردان جانە ەڭ باستىسى، قاۋىپسىزدىك بويىنشا زاماناۋي ادىستەردەن تۇرادى. اەس ەلىمىزدىڭ ەكونوميكاسى ءۇشىن اۋىر جانە ورتا ونەركاسىپتى دامىتۋعا، عىلىمدى جانە ەنەرگەتيكالىق تاۋەلسىزدىكتى نىعايتۋعا جاڭا سەرپىن بەرۋى مۇمكىن، – دەدى ميحايل مۋحورتوۆ.

اسيە اقانوۆانىڭ ايتۋىنشا، اەس قۇرىلىسى ەلەكتر ەنەرگياسى تاريفتەرىنىڭ تۇراقتانۋىنا وڭ اسەرىن تيگىزۋى مۇمكىن.

– ەنەرگەتيكا مينيسترلىگىنىڭ مالىمەتى بويىنشا، ءبىز جىل سايىن 152 ميلليارد ۆاتت ەنەرگيا تۇتىنامىز، ونىڭ ىشىندە 20 ميلليارد ۆاتت تاپشىلىقتى رەسەيدەن ساتىپ الۋ ارقىلى وتەيمىز.  سوندىقتان ەنەرگەتيكالىق قاۋىپسىزدىك تۋرالى ايتا وتىرىپ، بىزگە ءوزىمىزدىڭ تۇراقتى ەنەرگيا كوزىنىڭ قاجەتتىگىن اتاپ ءوتۋىمىز كەرەك، – دەدى سپيكەر.

سۇراقتارعا جاۋاپ بەرە وتىرىپ، ساراپشىلار جاڭارتىلاتىن ەنەرگيا كوزدەرىنە تولىق سەنۋ مۇمكىن ەمەستىگىن، سەبەبى ولاردىڭ تۇراقتى ەمەس ەكەنىن اتاپ ءوتتى.

– جەك (جاڭارتىلاتىن ەنەرگيا كوزدەرى) بازالىق ەنەرگيا كوزى بولا المايدى، ويتكەنى ولار تابيعي جاعدايلارعا تولىعىمەن تاۋەلدى. ال اەس كەرىسىنشە، ءاردايىم جۇمىس ىستەپ تۇرادى جانە مۇنداي فاكتورلارعا تاۋەلسىز، – دەپ قوستى نايليا وردابايەۆا.