بۇگىن استانادا قازاق-نەمىس مەكتەبى قۇرىلىسىنىڭ باستالۋىن بىلدىرەتىن كاپسۋلا سالۋ ءراسىمى ءوتتى.
ءىس-شارا گفر كانسلەرى ولاف ءشولستىڭ قازاقستانعا رەسمي ساپارىنا ورايلاستىرىلىپ وتىر، دەپ حابارلايدى aqshamnews.kz.
استانادا قازاق-نەمىس مەكتەبىن سالۋ جوباسى قازاقستان پرەزيدەنتىنىڭ 2023 جىلى گفر-نا ساپارى اياسىندا قولعا الىنعان بولاتىن. مەملەكەت باسشىسى قاسىم-جومارت توقايەۆ ەكى ەل اراسىنداعى ىنتىماقتاستىقتىڭ سيمۆولىنا اينالاتىن مەكتەپ قۇرۋ مۇمكىندىگىن زەرتتەۋدى تاپسىردى.
جوبانى قازاقستان حالقى اسسامبلياسىنىڭ قولداۋىمەن «ۆوزروجدەنيە» قازاقستاندىق نەمىستەر بىرلەستىگى، ق ر وقۋ-اعارتۋ مينيسترلىگى، استانا قالاسى اكىمدىگى، «سامۇرىق-قازىنا» ۇلتتىق ءال-اۋقات قورى مەن گەرمانيا ستاندارتتارى بويىنشا ءبىلىم بەرۋ باعدارلامالارىن ازىرلەۋگە جانە ەنگىزۋگە كومەكتەسەتىن گەرمانيا فەدەرالدى سىرتقى ىستەر مينيسترلىگى ىسكە اسىرۋدا.
مەكتەپ 600 قازاقستاندىق وقۋشىعا نەمىس تىلىندە حالىقارالىق ءبىلىم بەرەتىن شەتەلدەگى نەمىس مەكتەپتەرىنىڭ جاھاندىق جەلىسىنىڭ ءبىر بولىگىنە اينالادى.
استاناداعى قازاق-نەمىس مەكتەبى ەلدەگى جانە ورتا ازياداعى نەمىس ءبىلىم بەرۋ ستاندارتتارى بويىنشا وقىتۋ جۇرگىزىلەتىن العاشقى مەكتەپ بولادى. وقۋ باعدارلاماسى بويىنشا مەكتەپتى بىتىرگەن تۇلەكتەر قازاقستاندا دا، گەرمانيادا دا مويىندالعان اتتەستات الا الادى. بۇل ولارعا قوسىمشا دايىندىق جانە قابىلداۋ ەمتيحانسىز نەمىس جوعارى وقۋ ورىندارىندا وقۋىن جالعاستىرۋعا مۇمكىندىك بەرەدى.
جوبا باستاماشىلارىنىڭ ايتۋىنشا، مەكتەپ قۇرىلىسى 2025 جىلدىڭ سوڭىنا دەيىن اياقتالىپ، ال 2026 جىلى مەكتەپ العاشقى وقۋشىلارىنا ەسىگىن ايقارا اشادى. جوبا قازاقستاندا ءبىلىم ساپاسىن ارتتىرۋعا عانا ەمەس، ەكى ەل اراسىنداعى مادەنيەت جانە ءبىلىم سالاسىنداعى بايلانىستى نىعايتۋعا دا ىقپال ەتەدى دەپ كۇتىلۋدە.