وزبەكستاندا ءوتىپ جاتقان قازاق مادەني كۇندەرى اياسىندا «Folk and Symphony» اتتى بىرەگەي جوبا ۇسىنىلدى.
ونىڭ ەرەكشەلىگى، كونسەرتتە زاماناۋي سيمفونيالىق وركەستر مەن ەجەلگى مۋزىكالىق اسپاپتار بىرىكتىرىلدى، دەپ حابارلايدى Almaty-akshamy.kz 24.kz-كە سىلتەمە جاساپ.
«تۇران» ەتنو-فولكلورلىق ءانسامبلىنىڭ اۆتورلىق جوباسى العاش رەت تاشكەنت كورەرمەنىنە كورسەتىلىپ وتىر. وزبەكستاننىڭ سيمفونيالىق وركەسترى مەن باس ديريجەرى بۇل ىسكە قولداۋ ءبىلدىردى. قازاقستاندىق ونەرپازدار 30-دان اسپاپتى مەڭگەرگەن. كەيىنگى 15 جىلدا اقش، گەرمانيا، فرانسيا سىندى بىرنەشە ەۋروپا مەملەكەتىن ارالاپ، الەمدىك ساحنالاردا ونەر كورسەتىپ ءجۇر. ۇلتتىق اسپاپتارىمىزدىڭ تاڭعاجايىپ ءۇنى مەن حالىق شىعارماشىلىعىن جاھانعا تانىتىپ كەلەدى.
قازاق فولكلورىن زامان تالابىنا ساي دامىتقان ونەر ۇجىمىنىڭ شەبەرلىگىن جەرگىلىكتى جۇرت جوعارى باعالادى. «تۇران» توبىنىڭ ەندىگى ساپارى سامارقاند پەن بۇقارادا جالعاسادى.