قاراعاندى وبلىسىنىڭ پوليسەيلەرى 130 بالانىڭ ءومىرىن ساقتاۋ جولىندا ەرلىكپەن قازا تاپقان ارىپتەستەرىن ەسكە الدى
قاراعاندى وبلىسى بۇقار-جىراۋ اۋدانىنا قاراستى زارەچنىي اۋىلىندا وسىدان 15 جىل بۇرىن قىزمەت بابىندا قازا بولعان جول پوليسياسىنىڭ ينسپەكتورى قايرات جۇمابەكوۆتى ەسكە الۋعا ارنالعان ءىس-شارا ءوتتى، – دەپ حابارلايدى Almaty-akshamy.kz Polisia.kz-كە سىلتەمە جاساپ.
شاراعا اۋداننىڭ بيلىك وكىلدەرى، قايرات جۇمابەكوۆتىڭ تۋعان-تۋىستارى مەن ارىپتەستەرى جانە مەكتەپ وقۋشىلارى قاتىستى. الدىمەن جينالعاندار اۋىلدىڭ كىرە بەرىسىندە باتىردىڭ قۇرمەتىنە ورناتىلعان مەموريالدىق تاقتا تاسىنا گۇل شوقتارىن قويىپ، ءبىر مينۋتتىق ۇنسىزدىكپەن ەسكە الدى.
“ءولى رازى بولماي، ءتىرى بايىمايدى” دەگەندەي، قاتاردان ەرتە كەتكەن ءتارتىپ ساقشىلارى ەشقاشان ارىپتەستەرىنىڭ ەسىنەن كەتكەن ەمەس. سوندىقتاندا باتىرلىق تانىتىپ، انتىنا ادال بولعان قايرات جۇمابەكوۆتى ەسكە الۋ ءىس-شاراسىنا دەپارتامەنت باستىعى سانجار ءادىلوۆ ارنايى قاتىستى.
- قابىرعامىزدى قايىستىرعان قايعىلى وقيعانىڭ بولعانىنا بيىل 15 جىل بولدى. وسىنشاما ۋاقىت وتسە دە، ارىپتەسىمىزدىڭ ەسىمى ماڭگى ەسىمىزدە. ال جاساعان ەرلىگى كەلەشەك ۇرپاققا ۇلگى بولارى ءسوزسىز، – دەدى وبلىستىڭ باس پوليسەيى.
30 جاسىندا قىرشىن كەتكەن قايرات جۇمابەكوۆتىڭ ەرلىگى ءالى كۇنگە دەيىن ەل ەسىندە. 2008 جىلدىڭ مامىرىندا قاراعاندىدان استاناعا ساياحاتقا بارعان 130 بالانىڭ جولداعى قاۋىپسىزدىگى سول كەزدەگى جول پوليسياسىنىڭ ينسپەكتورلارى اعا سەرجانت قايرات جۇمابەكوۆ پەن دميتريي پۋگاچقا تاپسىرىلعان. ەلوردانى ەمىن-ەركىن ارالاپ، كوزدەرى بال-بۇل جانعان بالالار استانادان قاراعاندىعا قايتىپ كەلە جاتقاندا ارشالى كەنتىنىڭ تۇسىندا اۆتوبۋسقا قارسى جۇك كولىگى شىققان. مىنە وسى ساتتە وزىنە جۇكتەلگەن مىندەتتى ابىرويلى اتقارعان قايرات جۇمابەكوۆ ارتىنداعى بالالاردى امان الىپ قالۋ ءۇشىن ءوزىنىڭ ءومىرىن قاتەرگە تىگىپ، ەرلىكپەن قازا تاپقان ەدى.
– ول كەزدە بىزدە جول-كولىك وقيعاسىنان قاشۋىمىزعا مۇمكىندىك بولدى. الايدا قايرات ارتىنداعى بالالاردىڭ قاۋىپسىزدىگىن ويلاپ، قارسى كەلگەن كەساپاتقا ءوزىن توستى. بۇل دەگەنىمىز ونىڭ انتىنا ادالدىعىنىڭ بەلگىسى. ول وتە اقكوڭىل جىگىت ەتەدى. ومىردەن ەرتە كەتكەنى وكىنىشتى، – دەدى سول كەزدەگى قايرات جۇمابەكوۆتىڭ سەرىگى بولعان دميتريي پۋگاچ.
بۇگىندە قايرات جاساعان ەرلىك ەش ۇمىتىلعان ەمەس. كەرىسىنشە انتىنا ادال بولعان اسىل ازاماتتىڭ باتىرلىعى ۇرپاقتان-ۇرپاققا ۇلگى بولادى.