تۇڭعىش پرەزيدەنت كەڭسەسى ەندى بيۋدجەتتەن قارجىلاندىرىلمايدى

2024-2026 جىلدارعا ارنالعان بيۋدجەت جوباسىندا تۇڭعىش پرەزيدەنت كەڭسەسىن قارجىلاندىرۋ تۋرالى اقپارات جوق.

تۇڭعىش پرەزيدەنت كەڭسەسىنىڭ شىعىندارى بيۋدجەت جوباسىنان الىندى، دەپ حابارلايدى Almaty-akshamy.kz

جىل سايىن ەلباسى كەڭسەسىنە ميللياردتاعان تەڭگە بولىنەتىن ەدى. مىسالى، 2023-2025 جىلدارعا ارنالعان بيۋدجەت جوباسىندا كەڭسەنى قارجىلاندىرۋعا بارلىعى 5،6 ميلليارد تەڭگە باعىتتالعان: 2023 جىلعا - 1،6 ميلليارد تەڭگە، 2024 جىلعا - 1،9 ميلليارد تەڭگە جانە 2025 جىلعا - 2،1 ميلليارد تەڭگە.

نورماتيۆتىك-قۇقىقتىق اكتىلەر سايتىندا جاريالانعان ءۇش جىلدىق بيۋدجەتتىڭ جاڭا جوباسىندا بۇل قانجىلاندىرۋ تۋرالى اقپارات جوق.

ەستەرىڭىزگە سالا كەتەيىك، بيىل ناۋرىزدا قارجى ۆيسە-مينيسترى داۋرەن تەمىربەكوۆ بيۋدجەتتى ناقتىلاۋ شەڭبەرىندە كەڭسەگە جۇمسالاتىن شىعىننىڭ قىسقاراتىنى تۋرالى ايتقان ەدى. ال، ماۋسىمدا مينيستر ەرۇلان جاماۋبايەۆ كەڭسە جۇمىسىن توقتاتادى دەپ مالىمدەدى.

"ءقازىر كەڭسەنى قايتا قۇرىلىمداۋ ءجۇرىپ جاتىر. ادامداردىڭ ءبىر بولىگى باسقا ۇيىمدارعا اۋىستىرىلىپ، قالعانى جۇمىستان بوساتىلادى. كەڭسە جۇمىسىن توقتاتادى. ول قايتا قۇرىلىمدالىپ جاتىر. ءبىر جارىم اي ىشىندە ماسەلە شەشىلەدى دەپ ويلايمىن"، - دەدى جاماۋبايەۆ.

2024-2026 جىلدارعا ارنالعان رەسپۋبليكالىق بيۋدجەت جوباسى 4 قىركۇيەككە دەيىن اشىق تالقىلاۋدا بولادى. جوبامەن مىنا سىلتەمە ارقىلى تانىسا الاسىز.