سىبايلاس جەمقورلىق فاكتىلەرى الماتى قالاسىندا، شىعىس قازاقستان، قىزىلوردا جانە سولتۇستىك قازاقستان وبلىستارىندا دا تىركەلدى.
تج ءمينيسترىنىڭ ايتۋىنشا، قىلمىسقا بارعاندار ۇزدىك قىزمەتكەرلەر قاتارىنان بولعان، دەپ حابارلايدى Almaty-akshamy.kz
توتەنشە جاعدايلار مينيسترلىگىندە سىبايلاس جەمقورلىقتىڭ 70 پروسەنتىن بولىمشە باسشىلارى جاساعان، دەپ مالىمدەدى انتيكور.
تجم باسشىلىعىمەن وتكەن كەڭەستە سىبايلاس جەمقورلىققا قارسى قىزمەت ءتوراعاسى اسحات جۇماعالي توتەنشە جاعدايلار مينيسترلىگى بولىمشەلەرىنىڭ ءاربىر ەكىنشى باسشىسى سىبايلاس جەمقورلىققا باراتىنىن مالىمدەدى.
"سوڭعى 5 جىلدا ازاماتتىق قورعاۋ ورگاندارىندا 150-گە جۋىق سىبايلاس جەمقورلىق فاكتىسى تىركەلگەن. سىبايلاس جەمقورلىق قىلمىستارى ەلىمىزدىڭ بارلىق وڭىرىندە جاسالعان. باسىم بولىگى الماتى، استانا، شىمكەنت قالالارىندا، سونداي-اق قوستاناي جانە الماتى وبلىستارىندا"، - دەلىنگەن انتيكور مالىمدەمەسىندە.
ۆەدومستۆو اشكەرەلەنگەن قىلمىستاردىڭ ىشىندە پاراقورلىق پەن جىمقىرۋ فاكتىلەرى باسىم ەكەنىن اتاپ ءوتتى. زاڭسىز سىياقى ءورت قاۋىپسىزدىگىن قامتاماسىز ەتۋ بويىنشا تەكسەرۋ اكتىسىنە قول قويۋ كەزىندە، وقۋدان وتكىزۋ، رۇقسات بەرۋ جانە جۇمىسقا ورنالاسۋ ءۇشىن بەرىلىپ وتىرعان.
انتيكور ءتوراعاسىنىڭ ايتۋىنشا، جۇرگىزىلىپ جاتقان سىبايلاس جەمقورلىققا قارسى شارالارعا قاراماستان، تجم قىزمەتكەرلەرى پارا الۋدان تىيىلار ەمەس.
"كۇنى كەشە جەتىسۋ وبلىسىندا جەرگىلىكتى تج ءبولىم باسشىسى جۇمىسقا العان ادامنان اقشا العانى انىقتالدى. بۇگىنگى ءىس-شارانىڭ وتەتىنىن بىلە تۇرا، سوندا دا قىلمىسقا بارىپ وتىر. بۇل ورايدا پروفيلاكتيكالىق تۇرعىدا ناقتى ارەكەت ەتۋ قاجەت. قىزمەتكەرلەردىڭ مىنەز-قۇلقىن تۇزەتىپ، پسيحولوگيالىق كوزقاراسىن وزگەرتۋ ماڭىزدى"، - دەپ مالىمدەدى جۇماعالي وتىرىستا.
بۇعان دەيىن انتيكور تجم ورتكە قارسى قىزمەت كوميتەتىنىڭ ءتوراعاسى، شىمكەنت قالاسى جانە جەتىسۋ وبلىسى دەپارتامەنتتەرى باسشىلارىن ۇستاعان ەدى. ولار ورتكە قارسى قاۋىپسىزدىك سالاسىنداعى قامقورلىعى ءۇشىن كاسىپكەرلەردەن جۇيەلى تۇردە پارا الدى، تەكسەرىلەتىن ۇيىمداردى كەلىسىمشارت جاساسۋ جولىمەن قىزمەتتەردى ساتىپ الۋعا ماجبۇرلەپ، ولار بويىنشا ۋاقتىلى اقى تولەۋىن قامتاماسىز ەتتى دەگەن كۇدىككە ءىلىندى.
تج ءمينيسترى ۆەدومستۆو سىبايلاس جەمقورلىققا قارسى كۇرەستى كۇشەيتۋ ءۇشىن تۇبەگەيلى قادامدار جاسايتىنىن مالىمدەدى.
"بۇل ءبىزدىڭ قىزمەتكەرلەر ءۇشىن جاعا ۇستاتارلىق جاعداي. اتالعان ادامدار بەلگىلى ءبىر جەتىستىكتەرگە قول جەتكىزگەن ۇزدىك قىزمەتكەرلەردىڭ قاتارىنان بولاتىن. دەگەنمەن وسى جاعدايدا ولاردىڭ ءبىز بىلمەگەن تەرىس قاسيەتى – ەكىجۇزدىلىگى اشكەرەلەندى. ايتىلىپ وتكەن دەرەكتەرگە قاتاڭ سىنمەن قارايمىز. بۇدان ءبىز ءتيىستى ساباق الامىز، قاراپايىم ءورت سوندىرۋشىلەر بىزگە سەنىممەن قاراۋى كەرەك" - دەدى سىرىم ءشارىپحانوۆ.
انتيكور تج مينيسترلىگىنە جەكە قۇرام اراسىندا جۇرگىزىلەتىن الدىن الۋ جۇمىستارىن كۇشەيتۋدى ۇسىندى.
"سىبايلاس جەمقورلىق تاۋەكەلدەرىنە ىشكى تالداۋ جۇرگىزىپ، پروبلەمالىق ۋچاسكەلەردى زەردەلەۋ، سونداي-اق ۆەدومستۆونىڭ بارلىق قىزمەتكەرىن ادالدىق تۇرعىسىندا تەكسەرۋدى اپروباسيالاۋ قاجەت" - دەدى اسحات جۇماعالي.