اباي - قازاقتىڭ جول باستاۋشى شامشىراعى.
بۇگىن - ۇلى اقىننىڭ تۋعان كۇنى. وسىعان بايلانىستى تۇنگى الماتىنىڭ اسەم ورىندارىن ءتۇسىرۋدى اباي ەسكەرتكىشىنە ارنادىم. قازاق حالقىنىڭ ويشىلى، جازبا ادەبيەتىمىزدىڭ نەگىزىن سالۋشىنىڭ ەسىمىمەن اتالاتىن الاڭعا باردىم. العاشقى فوتوسۋرەتتى سول ماڭنان باستادىم. تۇنگى الماتىدا جارق-جۇرق ەتكەن شامدار ءبارى عاجايىپ ۇيلەسىم تاپقان. كورسەڭ، كوز تويادى. سونداي كەرەمەت، سونداي اسەم.
ادەيى اباي داڭعىلىمەن ءجۇردىم. استىمدا ۆەلوسيپەد. اسىرەسە، تۇنگى كەزدە شاھاردى ارالاساڭىز، ەرەكشە سەزىمگە بولەنەسىز. كىسى قاراسى كوپ. اتا-انالار بالالارىمەن بىرگە سەرۋەن قۇرۋدا. ءبىر ءسات قاربالاس تىرلىكتەن بوي جازىپ، اراسىندا قالانى جاياۋ ارالاعانعا نە جەتسىن. سالقىن سامال، كەۋدەنى كەرگەن تازا اۋا ءبارى-بارى اسەرلى كوڭىل-كۇي سىيلاپ جاندى راحات سەزىمگە بولەيدى. نەگىزى كوبىمىز، ءوزىمىز عۇمىر كەشىپ جاتقان قالامىزدىڭ كورىكتى جەرلەرىنە ونشا زەيىن قويا بەرمەيمىز. سوندىقتان بولار، سىرتتان قوناق بولىپ كەلگەندەر، ساياحاتتاۋشىلار ءۇشىن الماتى عاجايىپ بولىپ كورىنەدى. ولارمەن تولىقتاي كەلىسەمىن.
اباي اتامىزدىڭ مۇرالارىن بالا كەزىمىزدەن وقىپ، ولەڭدەرىن جاتتاپ وستىك. ءاربىر ايتقان فيلوسوفيالىق ويلارى بۇگىنگى زامانمەن ۇندەسىپ تۇر. ەش كومەسكىلەنبەگەن. قايتا ۋاقىتتىڭ اعىمىمەن، وزەكتىلىگى قويۋلانا ءتۇستى. ءبىز تۇگىلى، شەت ەلدەردە اقىننىڭ ويلارىن وزدەرىنە اۋدارعانىن، وقتا-تەكتە عالامتاور ارقىلى ەستىپ، ءبلىپ ءجۇرمىز. حوش! الەم ۇلىقتاعان ۇلى تۇلعا جايلى ايتىپ، كوڭىلدىڭ قىلىن شەرتىسكەندى بىزدەردە ءجون ساناۋدامىز.
دانىش ابايدىڭ الماتىداعى ەسكەرتكىشىن ح.ناۋرىزبايەۆ دەگەن ءمۇسىنشى جاساپتى. وتكەن XX عاسىردىڭ ەكىنشى شيرەگىندە قولادان قۇيىلسادا ەش ەسكىرمەگەن. ءداپ سول قالپىن ساقتاي العان. بيىكتىگى 13 مەتردەن اساتىن كورىنەدى.
ەسكەرتكىشتى بارلىق قىرىنان سۋرەتكە تارتىم، فوتورەپورتاج جاساۋعا تىرىستىم. كۇندىز، مۇندا كەلىپ گۇل شوقتارىن قويىپ، تاعىزىم جاساعانى بايقالادى. قورتىتا ايتقاندا حالقىمىزدىڭ باس اقىنى ءارى كوسەم ءسوز شەبەرىنە قانشا گۇل شوقتارىن قويىپ، مىڭ مارتە تاعىزىم جاساسادا ارتىق ەتپەيدى. اباي قازاقتىڭ رۋحانيات رەفورماتورى بولىپ قالا بەرمەك.
ال بىزدەر تۇراقتى جۇرگىزىپ كەلە جاتقان تۇنگى شاھاردىڭ كورىكتى جەرلەرىنە ساياحاتتاۋدى ارمەن قاراي جالعاستىرۋدان تانبايمىز. الىپ مەگاپوليس تاڭعاجايىپقا تولى. بۇل جەردە تاريحي ءھام مادەني ەسكەرتكىشتەر مولىنان. بۇيىرسا، وسى باعىتتا ءبىرشاما شارۋا ىستەلۋدى كوزدەپ، ۇيگە ورالدىم.
