تۇمەن وبلىسىندا رەسەيدەگى قازاقتار باس قوستى

تۇمەن وبلىسىندا شەتەلدەگى قازاقتاردىڭ قۇرىلتايى ءوتتى.

وعان رەسەيدىڭ تۇكپىر-تۇكپىرىنەن 17 مىڭنان استام ادام قاتىستى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ. 

شاعىن قۇرىلتاي تۇمەن وبلىسىندا 1997 جىلدان بەرى جىل سايىن ۇيىمداستىرىلىپ تۇرادى. ال مۇنداي اۋقىمدى جيىن بيىل العاش رەت وتكىزىلىپ وتىر.

شەتتەگى قازاقتار ءۇشىن قۇرىلتاي باستى مەرەكەلەردىڭ ءبىرى. جىل سايىن تۇمەن وبلىسىندا قانداستارىمىز باس قوسىپ، وزەكتى ماسەلەلەردى تالقىلايتىن. بيىل شارانىڭ ماڭىزى ارتا ءتۇستى. جيىندا وتكەن بەس جىلعا ەسەپ بەرىلىپ، كەلەشەككە جوسپار بەكىتىلدى.

«ءوز تاريحي وتانىمىزدى ەشقاشان ۇمىتپايمىز. ءوز ءداستۇرىمىزدى، ءتىلىمىزدى ساقتاپ، وسكەلەڭ ۇرپاقتىڭ بويىنا ءسىڭىرىپ كەلەمىز. مادەني-گۋمانيتارلىق جوبالاردان بولەك، ەكىجاقتى ەكونوميكانىڭ دامۋى ءۇشىن دە ءتۇرلى جوبالاردى قولعا الدىق»، - تۇمەن قازاقتارى ۇلتتىق مادەني اۆتونومياسىنىڭ ءتوراعاسى ەسەنعالي ىبىرايەۆ. 

جالپى تۇمەن وبلىسىندا 150-دەن استام ۇلت وكىلى تۇرادى. مۇندا سوڭعى جىلدارى قازاقتاردىڭ سانى ءۇش ەسە وسكەن. ياعني 18 مىڭنان 39 مىڭ ادامعا جەتتى. وڭىردە قازاق مادەني ورتالىقتارى جۇمىسىن جانداندىرۋدا. سونداي-اق قازاق ءتىلى ۇيىرمەلەرىنىڭ سانىن ارتتىرۋ جايى دا جوسپاردا.

قۇرىلتاي اياسىندا تۇمەندە 15 كيىز ءۇي تىگىلىپ، اق داستارحان جايىلدى. ۇلتتىق كيىمدەر مەن زەرگەرلىك بۇيىمدار كوپتىڭ قىزىعۋشىلىعىنا يە بولدى. ات جارىسى، كۇرەس، گىر كوتەرۋ سياقتى سپورتتىق ويىندار دا كىل مىقتىلار انىقتالدى.