قازاقستان مۇسىلماندار ءدىني باسقارماسى بۇدان بىلاي بەيىت باسىنا ءزاۋلىم ساراي سالىپ، مارقۇم ءۇشىن ۇلكەن جەردى الۋعا تىيىم سالماق.
باسقارما جانىنان اشىلعان قامقور-شاپاعات ورتالىعى بىرنەشە وبلىستىڭ ءماسليحاتىنا وسىنداي ۇسىنىس جولدادى. ەگەر دەپۋتاتتار قولداسا، 20 ايماقتاعى زيرات زاڭدىلىعى وزگەرەدى، دەپ حابارلايدى Almaty-akshamy.kz. Astanatv.kz-كە سىلتەمە جاساپ.
"قابىرگە جەرلەنگەن كىسىنىڭ كىم ەكەنىن ايقىنداۋ ماقساتىندا جانە جۇرگىنشىلەر تاراپىنان تاپتالىپ، اياق استى بولماۋى ءۇشىن وعان شاعىن بەلگى قويۋعا رۇقسات. قۇلپىتاس بيىكتىگى 1 مەتر، ەنى 50 سانتيمەتردەن اسپاۋعا ءتيىس. قۇلپىتاسقا مارقۇمنىڭ ءاتى-جونى، تۋعان جىلى مەن قايتىس بولعان ۋاقىتى جازىلسا جەتكىلىكتى. قۇلپىتاسقا مارقۇمنىڭ سۋرەتىن قويۋعا رۇقسات ەتىلمەيدى"، – دەيدى "قامقور-شاپاعات" ورتالىعىنىڭ ديرەكتورى مەيرامبەك قابىبەك ۇلى.
ال قۇلپىتاس جاسايتىن شەبەرلەر بولسا، تۇتىنۋشىلار تاڭداۋىندا شەك جوق دەيدى. ولاردىڭ ايتۋىنشا، بەيىت باسىنا بەلگى قويۋ ءۇشىن ادامدار 7 ميلليون تەڭگەگە دەيىن تاپسىرىس بەرگەن.
"15-20 مىڭ تەڭگەدەن باستاپ كەتە بەرەدى. 500، 600 مىڭ، 1 ميلليون تەڭگەگە دەيىن كەتە بەرەدى. وسى ۋاقىتقا دەيىن 1،5-2 ميلليونعا دەيىن العاندار بولدى جالعىز تاستىڭ ءوزىن. 7 ميلليونعا دەيىن دە قويىپ جاتىرمىز. گرانيت-مرامور بولىپ بولىنەدى. قازىرگى تاڭدا گرانيت قاتتى سۇرانىسقا يە"، – دەيدى قۇلپىتاس شەبەرى ءابىلحان امانتۇردييەۆ.
ەل ازاماتتارىنىڭ ايتۋىنشا، مازارعا بيىك قورشاۋ قاجەت. ايتپەسە بەيىتتى قاڭعىعان مال باسىپ كەتۋى مۇمكىن.
ال ءدىن وكىلدەرى بەيىتتى اسەپتتەگەننەن مارقۇمعا كەلىپ-كەتەر پايدا جوعىن ايتادى. ولاردىڭ ايتۋىنشا، سول قارجىعا جەتىم-جەسىرگە كومەك بەرگەن الدەقايدا ابزال.