تۇماۋعا بايلانىستى قانداي جاعدايدا وقۋشىلار قاشىقتان وقيدى؟

جۇقتىرۋ كورسەتكىشى 30 پروسەنتتەن اسىپ كەتسە، بالالار ونلاين فورماتقا اۋىستىرىلادى.

دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتى تۇماۋعا بايلانىستى مەكتەپ وقۋشىلارىن ونلاين فورماتقا اۋىستىرۋ ءتارتىبىن ءتۇسىندىردى، دەپ حابارلايدى Almaty-akshamy.kz

جۇقپالى اۋرۋلاردى ەپيدەميولوگيالىق قاداعالاۋ باسقارماسىنىڭ باسشىسى روزا قوجاپوۆانىڭ ايتۋىنشا، ءبىر سىنىپتا وقۋشىلاردىڭ 30 پروسەنتى جانە ودان كوپ بالا رەسپيراتورلىق ۆيرۋستىق ينفەكسيامەن نەمەسە تۇماۋمەن اۋىرىپ قالسا، بارلىعىن ونلاين فورماتقا اۋىستىرۋعا بولادى.

«باس مەملەكەتتىك سانيتارلىق دارىگەردىڭ تالاپتارىنا سايكەس، ءبىر ينكۋباسيالىق كەزەڭدە سىنىپتا بالالاردىڭ 20-30 پروسەنتى ءجىتى رەسپيراتورلىق ۆيرۋستىق ينفەكسيامەن اۋىرىپ قالسا، كابينەتتىك ءبىلىم بەرۋدەن باس تارتۋعا كەڭەس بەرىلەدى»، - دەدى قوجاپوۆا.

ونىڭ ايتۋىنشا، سىنىپقا جاڭا وقۋشىلاردى قابىلداماعان دۇرىس. ال تۇماۋدى جۇقتىرۋ كورسەتكىشى 30 پروسەنتتەن اسىپ كەتسە، بالالار ونلاين وقىتۋ فورماتىنا اۋىستىرىلادى.

رەسمي مالىمەتكە سايكەس، قازاقستاندا 764 247 ادام ۆيرۋستىق ينفەكسيا جۇقتىرعان. ولاردىڭ اراسىندا تۇماۋ جۇقتىرعاندار دا از ەمەس.