قازاقستانداعى بالالارعا مەديسينالىق كومەكتىڭ ساپاسىن جاقسارتۋ جونىندەگى كەشەندى شارالار 2024 جىلى نارەستە ءولىمىنىڭ كورسەتكىشىن 8،3%-عا تومەندەتۋگە مۇمكىندىك بەردى، دەپ حابارلايدى aqshamnews.kz.
ال نەوناتالدىق ءولىمنىڭ دەڭگەيى 19%-عا تومەندەدى، دەپ اتاپ ءوتتى دەنساۋلىق ساقتاۋ ءمينيسترى اقمارال ءالنازاروۆا ۆەدومستۆو القاسىنىڭ كەڭەيتىلگەن وتىرىسىندا.
«العاش رەت نەوناتالدىق كومەكتى ۇيىمداستىرۋ ستاندارتى ازىرلەنىپ، بەكىتىلدى، رەانيماسيا بولىمشەلەرىندە مەيىرگەردىڭ جاڭا تۋعان نارەستەگە 1-دەن 1-گە دەيىنگى اراقاتىناسى قاعيداتى بەلگىلەندى. پەريناتالدىق ورتالىقتاردىڭ بازاسىندا نەوناتالدىق حيرۋرگيانى دامىتۋ جالعاسۋدا، ورتا ەسەپپەن جىل سايىن تۋا بىتكەن كەمىستىگى بار 1500 جاڭا تۋعان نارەستە جەدەل ەم الادى»، - دەدى ا.ءالنازاروۆا.
بالا ءولىمى قۇرىلىمىندا ءبىرىنشى ورىن الاتىن تۋا بىتكەن دامۋ كەمىستىكتەرىن ازايتۋ ماقساتىندا ەلىمىزدىڭ 13 وڭىرىندە 15 «ءبىر كۇندىك كلينيكا» قۇرىلدى، وندا 50 مىڭ جۇكتى ايەل زەرتتەپ-قاراۋدان ءوتتى.
ناتيجەسىندە تۋا بىتكەن اقاۋلاردىڭ ەرتە انىقتالۋى 10%-عا ءوستى. العاش رەت ۇرىقتىڭ پاتولوگياسىن از ءينۆازيۆتى ادىستەردى قولدانا وتىرىپ، جاتىرىشىلىك ەمدەۋ ءۇشىن «فەتالدىق مەديسينا» ەنگىزىلدى.
«جوعارىدا اتالعان ءىس-شارالاردىڭ بارلىعى 2024 جىلدىڭ قورىتىندىسى بويىنشا سابيلەردىڭ ءومىر ءسۇرۋ دەڭگەيىن 88%-دان 93%-عا دەيىن ارتتىرۋعا جانە تدك-دەن سابيلەر ءولىمىن 15%-عا تومەندەتۋگە مۇمكىندىك بەردى. جىل سوڭىنا دەيىن بارلىق وڭىرلەردە ءبىر كۇندىك ەمحانالار قۇرۋدى اياقتاۋ قاجەت»، - دەپ اتاپ ءوتتى ۆەدومستۆو باسشىسى وڭىرلىك القا قاتىسۋشىلارىنا ارناعان سوزىندە.