دەپۋتاتتاردان تاعى ءبىر تىيىم: كونسەرتتەردە فونوگرامما قوسۋعا تىيىم سالىنۋى كەرەك، سەبەبى تىڭدارمان جاندى داۋىسقا اقشا تولەيدى دەدى دەپۋتات ماقسات تولىقباي، دەپ حابارلايدى aqshamnews.kz
ءماجىلىس دەپۋتاتى ماقسات تولىقباي كورەرمەن نەگە بيلەت ساتىپ الىپ، «فانەرا» تىڭداۋى كەرەك دەپ اشىندى.
«زاڭ بويىنشا كونسەرتتەردە فونوگراممانى جاسىرىن قولدانۋعا تىيىم سالىنعان. ياعني، ءىس-شارانى ۇيىمداستىرۋشىلار بۇل تۋرالى كورەرمەندەرگە حابارلاۋعا مىندەتتى، ءبىراق ەشكىم مۇنى ورىندامايدى»، – دەدى ول.
دەپۋتاتتار زاڭ جوباسىنا فونوگرامما قولدانۋعا قاتىستى بىرنەشە تۇزەتۋ ەنگىزگەنىمەن، ولار قابىلدانبادى.
«كوپتەگەن سىلتاۋلار ايتىلدى – وڭىرلەردەگى تەحنيكانىڭ 70%-ى ەسكى، بىلىكتى دىبىس رەجيسسەرلەرى جەتىسپەيدى، تاعى باسقا. اقىرىندا، ءبىز بىلاي ۇسىندىق: ەگەر كونسەرت وتەتىن ورىن (ستاديون نەمەسە ۇلكەن الاڭ) ءىس-شاراعا بەيىمدەلمەگەن بولسا، فونوگراممانى قولدانۋعا رۇقسات بەرۋ كەرەك. ەڭ باستىسى – كورەرمەندەر الدىن الا حاباردار بولۋى ءتيىس»، – دەپ ءتۇسىندىردى دەپۋتات.
مادەنيەت جانە اقپارات ۆيسە-مينيسترى ايبەك سىدىكوۆ مينيسترلىك بۇل ماسەلە بويىنشا مامانداردىڭ پىكىرىن ەسكەرەتىنىن ايتتى.
«ءبىز بارلىق مۇددەلى تاراپتاردى جيناپ، اشىق تالقىلاۋ وتكىزۋگە كەلىستىك. 11 ناۋرىزدا بۇل ماسەلەنى شوۋ-بيزنەس وكىلدەرىمەن، مادەنيەت مەكەمەلەرىنىڭ باسشىلارىمەن جانە رەجيسسەرلەرمەن بىرگە قاراستىرامىز»، – دەپ ۋادە بەردى ۆيسە-مينيستر.