الماتى قالاسىنىڭ ىرگەسىندەگى قاراوي ەلدى مەكەنىندە شەكاراشى كينولوگتاردىڭ حالىقارالىق جارىسى ءوتتى. الاماندى وتكىزۋدەگى ماقسات، ەسىرتكى، جارىلعىش زاتتاردى تابۋعا ماشىقتاندىرىلعان يتتەردىڭ يىسشىلدىگىن ساراپقا سالۋ. كينولوگتاردىڭ بىر-بىرىمەن تاجىريبە الماسۋلارىنا مۇمكىندىك جاساۋ.
سونىمەن، ۇقك شەكارا قىزمەتى قىزمەتتىك كينولوگيا باسقارماسىندا وتكەن سايىستىڭ ءبىرىنشى كۇنى جارىسقا قاتىسۋعا نيەت بىلدىرگەن ەلدەردەن كەلگەن كوماندالاردى تانىستىرۋدان باستالدى. ايتۋ كەرەك، بۇگىنگى سايىس «BOMCA» – ورتالىق ازيادا شەكارالاردى باسقارۋعا جاردەمدەسۋ باعدارلاماسى اياسىندا وسىمەن ەكىنشى مارتە ۇيىمداستىرىلىپ جاتىر ەكەن. ونىڭ ءبىرىنشى كەزەڭى بيىلعى جىلدىڭ ءساۋىر ايىندا قىرعىز ەلىندە وتكىزىلىپتى. ول كەزدە قازاقستان، قىرعىزستان، تاجىكستان، تۇرىكمەنستان جانە وزبەكستان ەلدەرىنىڭ كينولوگ ماماندارى ەسىرتكى زاتتارىن ىزدەۋدىڭ قىرى مەن سىرلارىن كورسەتۋگە ءتيىس بولاتىن. ال، ءبىزدىڭ ەلىمىزدە ۇيىمداستىرىلعان سايىستا كوماندالار جارىلعىش زاتتاردى تابۋمەن بىرگە ءادىلقازىلار القاسىنىڭ نازارىنا وزدەرىنە بەكىتىلگەن قىزمەت يتتەرىنىڭ «ءتارتىبىن» پاش ەتەدى. سونداي-اق، بۇگىنگى سايىسقا ءبىزدىڭ ەلدەن ۇلتتىق قاۋىپسىزدىك كوميتەتىنىڭ «ا» قىزمەتى جانە قازاقستان رەسپۋبليكاسى قارجىلىق مونيتورينگ اگەنتىگىنىڭ كوماندالارى دا قاتىسۋعا نيەت بىلدىرگەن بولاتىن.
...اشىلۋ سالتاناتىنان كەيىن كوماندالار «جۇكسالعىشتار» مەن عيماراتتارعا جاسىرىلعان ناعىز جارىلعىش زاتتاردى ىزدەۋگە كىرىستى. ال ەكىنشى كۇنى اۆتوسىناققا كەزەك بەرىلدى. بۇل جەردە قاز-قاتار ەتىپ قويىلعان كولىكتەر دە «وسال» ەمەس، شۋلى قالانىڭ گازى مەن شاڭىنا، جانار-جاعارمايدىڭ يىسىنە ابدەن بوككەن. سوندىقتان، يتتەرگە تەمىر تۇلپارلاردىڭ ەڭ قيىن ءارى كوزدەن تاسا جەرلەرىنە جاسىرىلعان جارىلعىش زاتتاردى تابۋ وڭاي بولا قويمايدى. ەسەسىنە، وزدەرىنىڭ ارام ويلارىن ىشتەرىنە بۇككەن قىلمىسكەرلەر دە ءدال وسىعان ءۇمىت ارتادى – جاسىراتىن زاتتارىن وتكىر يىستەردىڭ استىنا جاسىرىپ قالۋعا تىرىسادى. نە ىستەمەيدى دەسەڭىزشى؟! شەكارادان الىپ وتۋگە قاتاڭ تىيىم سالىنعان زاتتاردى كەيدە كوفە نەمەسە اياق كيىم كرەمدەرىنىڭ اراسىنا تىعىپ جىبەرەدى، كەيدە ۇستىنە ءيىسسۋ نەمەسە باسقا دا ءيىسى كۇشتى زاتتاردى سەۋىپ تاستايدى. ءبىراق يىسشىلدىگى كەرەمەت دامىعان قىزمەت يتتەرىن مۇنىمەن الداۋ مۇمكىن ەمەس.
– بۇگىن حالىقارالىق جارىس ەرەجەلەرىنە سايكەس، ناعىز جارىلعىش زاتتار پايدالانىلادى. تەك، مولشەرى ازداۋ، بۇل دا كوماندالارعا بەرىلگەن تاپسىرمانى قيىنداتا تۇسەدى، – دەيدى ۇقك شەكارا قىزمەتى قىزمەتتىك كينولوگيا باسقارماسى باستىعىنىڭ ورىنباسارى – شتاب باستىعى پودپولكوۆنيك قۋانىش تۇمەنبايەۆ. بەس ەلدىڭ ەڭ مىقتى دەگەن كينولوگتارى مەن ولاردىڭ قىزمەتتىك يتتەرى بۇل قيىندىقتى دا ەڭسەرەدى دەگەن ويدامىن.
جالپى، «BOMCA» – ورتالىق ازيادا شەكارالاردى باسقارۋعا جاردەمدەسۋ باعدارلاماسى اياسىندا ۇيىمداستىرىلعان ءتۋرنيردىڭ جوعارى دەڭگەيدە وتۋىنە ءبىز جاۋاپتى بولعاندىقتان، وقۋ ماتەريالدارىن دايىنداۋدان باستاپ، بارلىعىن قامتۋعا تىرىستىق. شەكارا قىزمەتىنىڭ اتىنان تۇسكەلى تۇرعان كومانداعا دا تەك قانا «سەن تۇر، مەن اتايىن» دەيتىندەر ىرىكتەلدى. سوندىقتان جەڭىسكە قالاي دا جەتەتىنىمىزگە سەنىمدىمىز.
ايتپاقشى، ءوزى دە سولاي بولعانىن، ءۇش كۇنگە سوزىلعان جارىستىڭ ءوزى دە دالەلدەپ بەرگەن. ا-دەگەننەن-اق، ءبىزدىڭ كوماندا مەن ۇقك «ا» قىزمەتى سۋىرىلىپ العا شىققان. سوسىن تاجىك ەلىندەگى ارىپتەس شەكاراشىلار مىقتىلىق تانىتقان.
وسىلايشا، مەنىڭ «ۆرەميا» گازەتىندەگى ارىپتەسىم يۋليا زەنگ: «ەستراسەنستەر سايىسى» دەپ باعا بەرگەن تارتىستان تەك مىقتىلاردىڭ مىقتىسى عانا جەڭىسكە جەتكەن. ءتىپتى، ءۇشىنشى كۇنگە بەلگىلەنگەن نوميناسيا كەزىندە دە كەيبىر يتتەردىڭ قوجايىنى بەرگەن بۇيرىققا قالتقىسىز باعىنباي، تومەن باعا قويىلعانىنىڭ كۋاسىنە اينالدىق. ەسەسىنە، ۇقك شەكارا قىزمسەتىنىڭ اتىنان ونەر كورسەتكەن كوماندا مۇشەلەرىنىڭ ءبىرى ەرقابىل قۇسايىنوۆ پەن ونىڭ ءتورت اياقتى دوسى سۋرفات قاي جاعىنان دا جاڭىلعان جوق ەدى. سوندىقتان، ءبىزدىڭ شەكاراشى حالىقارالىق جارىستىڭ ابسوليۋتتىك چەمپيونى اتانىپ، ءوزى قىزمەت ەتەتىن باسقارمانىڭ اتىن اسپانعا ءبىر-اق شىعارعان.
ءسويتىپ، 1ء-شى ورىن – ق ر ۇقك شق قىزمەتتىك كينولوگيا باسقارماسىنىڭ، 2ء-شى ورىن – ق ر ۇقك «ا» قىزمەتى، 3ء-شى ورىن – تاجىكستان ەلىنەن كەلگەن كوماندانىڭ قانجىعاسىنا بايلاندى. ءار نوميناسيا بويىنشا جەڭىمپاز بولىپ تانىلعاندار – ۇيىمداستىرۋشىلاردىڭ سەرتيفيكاتى جانە باعالى سىيلىقتارىمەن ماراپاتتالدى.