كەيىنگى كەزدەرى الەۋمەتتىك جەلىدە بالالار اراسىندا “لابۋبۋ” اتتى ويىنشىق ترەندكە اينالدى. ءتۇر-سيپاتى جاعىنان سۇيكىمسىز، ءتىپتى كەيبىر ەرەسەكتەر ءۇشىن قورقىنىشتى كورىنەتىن بۇل ويىنشىقتى بالاباقشاداعى بۇلدىرشىننەن باستاپ، مەكتەپ جاسىنداعى بالالارعا دەيىن جانتالاسا سۇراپ جاتىر. بالالار نەگە "ۇسقىنسىز" ويىنشىقتارعا قۇمار؟ مۇنداي ويىنشىق بالانىڭ پسيحولوگياسىنا كەرى اسەر ەتە مە؟ اqshamnews.kz ءتىلشىسى زەرتتەپ كوردى.
"اناشىم، لابۋبۋ الىپ بەرشى"
بۇل ءوتىنىش سىزگە دە تانىس بولار. بۇكىل بالا تالاسا سۇراپ جۇرگەن ويىنشىق كەيىنگى ۋاقىتتا پايدا بولعان سەكىلدى كورىنگەنىمەن، بۇل كەيىپكەر العاش رەت 2015 جىلى گونكونگتىك يلليۋستراتوردىڭ قيالىنان تۋعان. لابۋبۋدىڭ ەڭ قاتتى تانىمال بولعان ءساتى K-pop توبى Blackpink مەمبەرى ليسانىڭ سومكەسىنەن كورىنگەننەن كەيىن باستالدى. ارتىنشا بۇل ترەندتى كيم كارداشيان مەن رياننا دا جالعاستىردى.
وسىدان كەيىن لابۋبۋ بەينەلەنگەن ويىنشىقتار مەن زاتتارعا سۇرانىس كۇرت ارتتى: رەسمي دۇكەندەردىڭ الدىندا ۇزىن-سونار كەزەك پايدا بولىپ، ويىنشىقتىڭ باعالارى شارىقتاپ كەتتى. ال ءقازىر TikTok پەن YouTube-تا لابۋبۋدى سۋ جاڭا كۇيىندە اشىپ جاتقان ۆيدەولار ميلليونداعان قارالىم جيناپ، ونى ودان سايىن ۆيرۋستىق ترەندكە اينالدىردى.
سۋرەت: depositphotos.com
4 مىڭنان - 190 مىڭعا دەيىن
نارىقتا بۇل ويىنشىقتىڭ باعاسى ءتۇپنۇسقاسىنا جانە جاساندىلارىنا قاراي ءتۇرلى باعادا ساتىلىپ جاتىر. جاساندى تۇرلەرى بازارلاردا 2 مىڭ - 5 مىڭ كولەمىندە، ال شەتەلدەن اكەلىنگەن ءتۇپنۇسقالارى 60 مىڭ -190 مىڭ تەڭگەگە دەيىن ۇسىنىلىپ جاتىر.
ياندەكستىڭ مالىمەتىنشە، مامىر ايىندا "Labubu" كىلت سوزىمەن سۇراۋلار سانى ميلليوننان اسقان. ال ماۋسىم ايىنىڭ باسىنا قاراي "قۇبىجىق-ويىنشىق" تۋرالى اقپارات كۇنىنە 100 مىڭنان استام رەت سۇرالعان.
لابۋبۋ تابىسىنىڭ تاريحى - Poppy Playtime ويىنىنىڭ كەيىپكەرى حاگگي ۆاگگيدىڭ ترەندكە اينالعانىن ەسكە سالادى. العاشىندا ول بالالار مەن كوللەكسيونەرلەردىڭ قالاۋىنىڭ وبەكتىسىنە اينالىپ، كەيىن اتا-انالاردىڭ، پسيحولوگتاردىڭ جانە قۇقىق قورعاۋ ورگاندارىنىڭ نازارىن اۋدارعان ەدى.
سۋرەت: depositphotos.com
"لابۋبۋ" بالالار ءۇشىن ءقاۋىپتى مە؟
پسيحولوگ، گەشتالت-تەراپيەۆت ۇلمەكەن ساندىبەك قىزىنىڭ ايتۋىنشا، لابۋبۋ العاش كورگەندە ەرەسەكتەر ءۇشىن جاعىمسىز اسەر قالدىرۋى مۇمكىن. ءبىراق بۇل سەزىمدى بالاعا ارتۋعا بولمايدى.
“بىزگە ۇسقىنسىز كورىنگەنىمەن، بالالار ءۇشىن ول مۇلدەم ولاي ەمەس. كوبىندە ەرتەگى، مۋلتفيلم كەيىپكەرلەرى دە قورقىنىشتى، ءبىراق مەيىرىمدى بولىپ كەلەدى. قۇبىجىق پەن حانشايىم تۋرالى ەرتەگىلەردەگى سياقتى – سىرت كەلبەتى ەمەس، ىشكى ءمانى ماڭىزدى”، – دەيدى مامان.
ويىنشىقتىڭ تانىمالدىعى بالالاردىڭ بىر-بىرىمەن باسەكەلەستىگى مەن ەرەكشەلەنۋگە دەگەن ۇمتىلىسىمەن دە بايلانىستى بولۋى مۇمكىن.
“ءماسساعان، سەندە لابۋبۋ بار ەكەن!” – دەگەن تاڭدانىس ارقىلى بالا وزىنە نازار اۋدارتقىسى كەلەدى. بۇل ويىنشىقتىڭ ەموسياعا تولى بىرنەشە ءتۇرى بار، سونىڭ ارقاسىندا بالا ءوز كوڭىل كۇيىن دە ءبىلدىرىپ جاتقان بولۋى مۇمكىن”، – دەيدى پسيحولوگ.
سۋرەت: depositphotos.com
پسيحولوگتان اتا-انالارعا كەڭەس
قورقىنىشتى ويىنشىقتارمەن ويناۋ اسا ءبىر الاڭداتا قويمايتىن دۇنيە سەكىلدى كورىنگەنىمەن بالانىڭ پسيحولوگياسىنا ءۇنسىز سيگنال بەرىپ جاتۋى مۇمكىن.
“بىردەن بايقالماعانىمەن قورقىنىشتى ويىنشىقتار قوبالجۋ، قورقىنىش، جايسىز تۇستەر مەن كۇيزەلىسكە الىپ كەلۋى مۇمكىن. بالا ءوزىنىڭ سەزىمدەرىن تولىق ايتا الماعاندىقتان ءارتۇرلى سيمپتومدار ارقىلى كورىنىس بەرەدى. مەنىڭ تاجىريبەمدە الەۋمەتتىك جەلىدەن كورگەن بەينەدەن سوڭ قاتتى قورقىپ ، دىرىلدەپ كەلگەن، الدەبىر بەينەنى كورىپ، ءبىر مەزەتتە قورقىنىشتان كوزىن اشا الماي قالعان بالالار بولدى. قورقىنىش سەزىمدەرىمەن جۇمىس ىستەگەن سوڭ، قالىپقا ءتۇستى”، – دەيدى مامان.
بالانىڭ “لابۋبۋ” سياقتى ويىنشىققا اۋەستەنۋى – كەيدە اتا-انادان كورگەن قىسىمنىڭ سالدارى بولۋى مۇمكىن.
“اتا-انا بالاسىنىڭ قىلىعىن ەمەس، تۇلعاسىن سىناي بەرسە، بالا ءوزىن "جامان"، "سۇيكىمسىز" سەزىنىپ، سول بەينەگە ۇقساعىسى كەلۋى مۇمكىن. سوندىقتان اتا-انالارعا بالانىڭ ارەكەتىن باعالاۋعا، ال تۇلعاسىنا قۇرمەتپەن قاراۋعا كەڭەس بەرەمىن. سونداي-اق، بالانىڭ قالاۋىن مۇلدە تىيماي، ءبىر ويىنشىققا شەكتەن تىس بايلانىپ كەتۋىنە جول بەرمەگەن دۇرىس”، – دەيدى پسيحولوگ.