ءقازىر الماتى مەن ەلوردادا، وبلىس ورتالىقتارىندا فيتنەس- كلۋب، سپورت زالدارى از ەمەس. ءبىراق كۇندەلىكتى كۇيبەڭ تىرلىك پەن جۇمىسباستىلىقتى ەسكەرىپ، جۇرتشىلىقتىڭ ءتان ساۋلىعىنا جاپپاي دەن قويۋىنا مۇرشا بەرىپ جاتقان بىردە-بىر سپورت زالى جوق. ولار الدەقاشان قالتاسى قالىڭدارعا عانا قىزمەت كورسەتۋدىڭ جولىنا ءتۇسىپ كەتتى.
ءتۇرلى جەڭىلدىكتەر قاراستىرىلسا ەكەن...
ماسەلەن، ءبىر الماتىدا ءىرىلى-ۇساقتى 70-كە جۋىق فيتنەس كلۋبتار، ساۋىقتىرۋ ورتالىقتارى بار. الايدا، ولاردىڭ باعاسى، قىزمەت كورسەتۋ قۇنى وتە قىمبات. ترەناجەر زالىنا اپتاسىنا ءۇش رەت بارساڭىز، ايىنا 30 مىڭ تەڭگە تولەيسىز. باسسەيندە ءجۇزۋدىڭ ءبىر ايعا ارنالعان ارزان ابونەمەنتىنىڭ ءوزى 25-30 مىڭ تۇرادى. ءبىراق كەز كەلگەن ادام ترەناجەر زالدارىنا باراتىن بولسا، ونىڭ ءوز بەتىمەن دايىندالعانى ەمەس، كاسىبي ينسترۋكتورمەن بىرگە جاتتىققانىن قالايدى. ويتكەنى، ونسىز قانشا اي شۇعىلدانسا دا ناتيجە شىعارۋ قيىن. جاتتىعۋ زالدارىنىڭ ءوزى دە ينسترۋكتورلارمەن دەربەس اينالىسۋعا كەڭەس بەرەدى. الايدا، وعان تاعى دا قوسىمشا اقى قوسىلادى. ءار ينسترۋكتور ءوز قىزمەتى ءۇشىن كەم دەگەندە 15 مىڭ تەڭگە الادى. ەگەر ول سپورت شەبەرى نەمەسە ءتۇرلى سايىستاردان چەمپيون اتاعىن السا، ونىڭ قىزمەت اقىسى قىمبات بولادى. بۇل رەتتە كاسىبي ماماننىڭ جاتتىعۋىنا توپ بولىپ قاتىسساڭىز، ءسال ارزانداۋ تۇسەدى. ال ەگەر جەكە ءوزىن عانا دايىندايتىن بولسا، ونىڭ قۇنى جوعارى تۇرادى. بۇل تۇستا ترەناجەر زالدارىنىڭ ءبارى جەكە بولعاندىقتان، ەشقانداي جەڭىلدىك قاراستىرىلماعان.
جۇيەلى شارالار اتقارۋ قاجەت
ونىڭ ۇستىنە، ۇلكەن كومپانيالار مەن ءاربىر ۋنيۆەرسيتەتتىڭ، ءتۇرلى مەكەمەنىڭ باس- باسىنا سپورت كەشەندەرى بار. بۇلاردىڭ بارلىعى مەملەكەت قاراجاتى ەسەبىنەن سالىندى. سولاي بولا تۇرا، بۇلار دا جۇرتشىلىققا قولجەتىمدى بولماي تۇر. حالىق ءۇشىن سالىنعان نىسانداردى دا قالىڭ بۇقارا پايدالانا الماي وتىر. شىنىندا دا، ۆەدومستۆولىق سپورت كەشەندەرى ولاردىڭ جەكەمەنشىگىنە اينالىپ كەتكەندەي. وزگەلەردى ەسىگىنەن اتتاپ باستىرمايدى.
بىرەر جىل بۇرىن ەلىمىزدە بۇقارالىق سپورتتى دامىتۋعا ەرەكشە كوڭىل ءبولىندى. ءاربىر وبلىس، اۋدانداردا ءتۇرلى سپورتتىق نىساندار اشىلدى. ءبىراق بۇگىندە سپورتتىق نىسانداردىڭ قولجەتىمدىلىگىنە قاتىستى سۇراقتار كوبەيدى. قوعامدا سپورتتىق نىسانداردىڭ، ياكي سپورتتىق سەكسيالاردىڭ قىمباتتىعىنا قاتىستى الاڭداۋشىلىق ارتىپ وتىر. سپورت جاناشىرلارى ماسەلەنى جىلى جابا سالماي، ونى تۇبەگەيلى شەشۋ كەرەكتىگىن ايتادى. اسىرەسە، قۇزىرلى مينيسترلىكتەر ەسەپ ءۇشىن وزىنە تيەسىلى شارالاردى اتقارۋمەن شەكتەلمەۋ كەرەك. ۇلت ساۋلىعى ماسەلەسى تۇرعان جەردە بىلىمگە، سپورتقا جانە دەنساۋلىق ساقتاۋعا جاۋاپتى ۆەدومستۆولار بىرىگە وتىرىپ، جۇيەلى شارالار اتقارۋ قاجەت.
مەملەكەتتىك دەڭگەيدە شەشەتىن ۋاقىت جەتتى
ءبىر قۋانارلىعى، الماتىدا ءتۇرلى سپورت الاڭدارى اشىلىپ جاتىر. دەگەنمەن، ونىڭ كەيبىرى جاۋاپسىز مەردىگەرلەردىڭ كەسىرىنەن قيراپ، جارامسىز بولىپ قالعان. دانەكەرلەگەن تەمىرلەرى سىنىپ، ساپاسىز جاساعانى اڭعارىلىپ تۇرادى. ال ۆەدومستۆولارعا قاراستى سپورت كەشەندەرى قاراپايىم حالىقتىڭ قالتاسىنا ساي قىزمەت كورسەتپەي وتىر. ولارعا قارجىسىن تولەمەي، ەش كىرە المايسىز. باعاسى اسپانداپ تۇر. ءبىز بۇلاي ءجۇرىپ، بۇقارالىق سپورتتى قالاي دامىتپاقپىز؟
سوندىقتان مۇنى مەملەكەتتىك دەڭگەيدە شەشەتىن ۋاقىت جەتتى. ەگەر مەملەكەت ءتيىستى تاپسىرمالار بەرىپ، ونى ءجىتى قاداعالاپ وتىراتىن بولسا، شەشىلمەيتىن ماسەلە جوق. ويتكەنى، سونداي ۇلكەن ۆەدومستۆولاردىڭ باسشىسى سول سپورت كەشەنىنەن تۇسەتىن تابىسقا كۇندەرى قاراپ قالمايدى. ولاردىڭ ونسىز دا بيزنەسى، تابىسى جەتكىلىكتى. بۇل جەردە تەك ىنتا مەن ىقىلاس كەرەك. مينيسترلىك پەن جەرگىلىكتى اكىمدىك بىرلەسە وتىرىپ ءىستىڭ ناتيجەلى شەشىلۋىنە مۇددەلى بولۋى ءتيىس.
سپورتتىق نىسانداردى كۇتىپ ۇستاماسا بولمايدى
مۇنى رەتكە كەلتىرۋ ءۇشىن مەملەكەت، جەرگىلىكتى اكىمدىكتەر سپورت كەشەندەرى بار ۆەدومستۆو باسشىلارىمەن كەلىسىم-شارتقا وتىرۋى كەرەك. وسىلايشا ولار بەلگىلى ءبىر كۇندەرى جاستارعا تەگىن قىزمەت كورسەتىپ، ال ونىڭ شىعىنىن مەملەكەت تولەۋى ءتيىس. ايتپەسە، ولار جۇرتشىلىققا تەگىن قىزمەت كورسەتە المايدى. ەگەر ولار جاستاردان اقى الماي تەگىن كىرگىزە بەرسە، ەرتەڭگى كۇنى سپورتتىق جابدىقتاردىڭ بارلىعى ەسكىرىپ، توز-توزى شىعىپ كەتسە، ونى قالپىنا كەلتىرۋگە قاراجاتتى قايدان تابادى؟ ويتكەنى، سپورت جابدىقتارىنىڭ بارلىعى ماڭگىلىك ەمەس، ونى كۇتىپ، جوندەپ ۇستاماسا، ول دا كۇندەردىڭ كۇنىندە توزادى. سوندىقتان بۇعان بايىپپەن قاراپ، جان-جاقتى ويلاستىرىپ بارىپ شەشىم قابىلداۋىمىز كەرەك.
«100 سپورت كەشەنىن سالۋ» باعدارلاماسى قاجەت
نەگىزى، مەملەكەتتىڭ ەسەبىنەن سالىنعان سپورتتىق كەشەندەردىڭ بارلىعى دەرلىك ءتيىمدى پايدالانىلىپ وتىرعان جوق. بۇل جەردە ءىرى كاسىپورىندارعا قاراستى سپورت كەشەندەرىن ايتپاي-اق قويايىق، قاراپايىم مەكتەپ سپورت زالدارىنىڭ ءوزى كوپ جاعدايدا بوس تۇرادى. ءۇش اي دەمالىستا دا ولاردىڭ ەسىگى اشىلمايدى. وقۋشىلار ونى تەك وقۋ كەزىندە عانا ارا-تۇرا پايدالانىپ وتىر. ەگەر كەشكى 7-دە ساباق بىتسە، سول مەكتەپتىڭ ماڭايىندا تۇراتىن ءبىر قىزمەتكەرگە جاۋاپكەرشىلىك ارتىپ، 8-دەن 11-گە دەيىن سپورت زالدارىن اشىپ قويساق، وسىنىڭ ءوزى جاستارعا ۇلكەن كومەك بولار ەدى. ال ۆەدومستۆولىق سپورت كەشەندەرى قاراپايىم جۇرتشىلىققا قولجەتىمدى بولۋى ءۇشىن مەملەكەت ولارعا قولداۋ كورسەتۋى ءتيىس.
قالاي دەسەك تە، بۇقارالىق سپورتتى دامىتۋ ءۇشىن «100 مەكتەپ، 100 اۋرۋحانا» سەكىلدى «100 سپورت كەشەندەرىن سالۋ» باعدارلاماسىن قولعا الۋىمىز كەرەك سەكىلدى. ەگەر وسىنداي باعدارلامانى قابىلداپ، جۇيەلى تۇردە جۇمىستار اتقارساق، بۇقارالىق سپورتتى دامىتۋعا ۇلكەن مۇمكىندىك بولار ەدى. قاراپ تۇرساڭىز، ميللياردتاعان قارجىعا شەتەلدەن نەشە ءتۇرلى ءدارى-دارمەك ساتىپ الىپ جاتىرمىز. ءبىراق حالىقتىڭ دەنساۋلىعى جاقسارىپ كەتتى مە؟ جوق. ەلدىڭ دەنساۋلىعىن ارتتىرۋ ءۇشىن سپورت كەشەندەرىن كوپتەپ سالۋىمىز كەرەك. وسىنى سوزبالاڭعا سالماي، ەرتەرەك قولعا الساق جاقسى-اق بولار ەدى.