بيىل قازاقستان پوليسياسى قۇرىلىپ، ەل قاۋىپسىزدىگىنە قىزمەت ەتىپ كەلە جاتقانىنا 31 جىل تولدى. وزگەنىڭ ءومىرى ءۇشىن ءوز ءومىرىن قاۋىپكە تىگۋ – انتىنا ادال ءتارتىپ ساقشىلارىنىڭ كۇندەلىكتى جۇمىسى. مەرەكە قارساڭىندا الماتى قالاسى پوليسيا دەپارتامەنتىنىڭ باسشىسى، قالانىڭ باس پوليسەيى ارىستانعاني زاپپاروۆپەن سۇحباتتاسۋدىڭ ءساتى تۇسكەن ەدى.
ىشكى قاۋىپسىزدىك كەپىلى
- ارىستانعاني راسىلحان ۇلى، سۇحباتىمىزدىڭ كىرىسپەسىن ادىلەتتى قازاقستان پوليسياسىنىڭ كەلبەتىنەن باستاساق. ماڭگىلىك ەل ساقشىلارى تۋرالى ايتىپ وتسەڭىز...
- قاتارداعى ءاربىر پوليسيا قىزمەتكەرى ادىلەتتى قازاقستاننىڭ كەلبەتى دەپ ويلايمىن. سەبەبى، ءبىزدىڭ ءاربىر ارىپتەس قوعام الدىندا، وتان الدىندا انتىنا ادال بولۋعا ءتيىس. قاعيدا مەن بۇيرىق قاتاڭ ساقتالادى. بۇگىنگى كۇندەگى باسشى رەتىندەگى قوياتىن تالاپتارىمىزدىڭ ءبىرى – انتقا ادالدىق. كۇن مەن تۇنگە قاراماي، ۋاقىت پەن اۋا رايىمەن ساناسپايتىن وسى ءبىر ماماندىقتىڭ جانكەشتىلىگى مەن جاۋاپكەرشىلىگىن سەزىنە ءبىلۋ كەرەك. مەملەكەت باسشىسى قاسىم-جومارت توقايەۆ اتاپ وتكەندەي، ىشكى ىستەر ورگاندارىنىڭ باستى مىندەتى – قاۋىپسىزدىكتى قامتاماسىز ەتۋ، ءومىردى، دەنساۋلىق پەن مۇلىكتى قورعاۋ. ەل ۇيقىسىنىڭ تىنىش بولۋى ءۇشىن كىرپىك قاقپاۋعا ءارقاشان ءازىر، ۇنەمى ساق بولۋ. باستىسى – حالىقتىڭ قىزمەتكەرى بولۋعا ءتيىس. قازاقستان پوليسياسىنىڭ بۇگىنگى كەلبەتى – وسىنداي.
- ۇنەمى ساق جۇرەتىن قالاداعى ءتارتىپ ساقشىلارىنىڭ قانشاسى كۇن سايىن «اتقا قونادى»؟
- باستىسى، ساننان گورى ساپاعا ءمان بەرىلەدى. كۇنىنە 2 جارىم مىڭعا جۋىق پوليسيا قىزمەتكەرى قىزمەتتىك مىندەتىن اتقارادى. ونىڭ ىشىندە پاترۋلدىك پەن ۋچاسكەلىك پوليسيانىڭ، تەرگەۋ توبىنىڭ قۇرامى بار. ال جالپى الماتى قالاسىندا 6 مىڭنان اسا ءتارتىپ ساقشىسى جۇمىس ىستەيدى. قالا دەپارتامەنتىنىڭ قۇرىلىمى قالا تىنىشتىعىن ساقتاۋ ءۇشىن الدىن الا جۇمىستاردى ءۇزىلىسسىز اتقارادى. وعان ءبىزدىڭ كاسىبي دەڭگەيدەگى جەكە قۇرام سانى جەتكىلىكتى. كەيبىر قىزمەتكەرلەر بەلگىلى ءبىر سەبەپتەرگە بايلانىستى باسقا قۇرىلىمعا اۋىسىپ جاتادى. كەشە عانا بىزدە ءمينيستردىڭ توراعالىعىمەن جيىندار ءوتتى. جيىن بارىسىندا كوتەرىلگەن باستى ماسەلەلەردىڭ ءبىرى – ارىپتەستەردى دەر كەزىندە قىزمەتكە تاعايىنداۋ. باياندامامدا ىشكى ءتارتىپ ساقشىلارىن دايارلايتىن وقۋ ورىندارىنىڭ دەنى الماتى قالاسىندا ورنالاسقان. ۋنيۆەرسيتەتتەرمەن ءبىزدىڭ كادر ساياساتى جونىندەگى باسقارما تىعىز قويان-قولتىق جۇمىس ىستەيتىنىن اتاپ ءوتتىم. ول جەردە وقۋ بىتىرەتىن ستۋدەنتتەرگە پوليسيانىڭ مىندەتى جونىندە ءتۇسىندىرۋ جۇمىستارى ءجيى جۇرگىزىلىپ تۇرادى.
- الماتى – قازاقستانداعى ەڭ كوپ قىلمىس جاسالاتىن قالا. جىل سايىنعى ستاتيستيكادا قىلمىستىق قۇقىقبۇزۋشىلىقتار سانىنىڭ ەڭ كوپ ءوسىمى دە وسى قالادا انىقتالعان. قالا ۇلكەيىپ، تۇرعىندار سانى كوبەيگەن سايىن قىلمىس تا كوبەيەدى. قالانىڭ قازىرگى كريمينوگەندىك جاعدايىن قالاي باعالايسىز؟
- ءبىرىنشى كەزەكتە الماتى – الماتى بولعاندىقتان قىلمىس كوپ تىركەلىپ تۇرعان جوق. باسقا وڭىرلەرمەن سالىستىرعاندا، رەسپۋبليكا شەڭبەرىندە تۇرعىنداردىڭ ەڭ كوپ شوعىرلانعان جەرى – الماتى. قالادا 2 280 000-عا جۋىق تۇرعىن بار. حالىقتىڭ سانى كوپ بولعاندىقتان ءارتۇرلى قىلمىس تا بولاتىنى انىق. بۇعان پوليسيا قىزمەتكەرلەرىنىڭ كاسىبي دايارلىعىنىڭ تومەندىگى نەمەسە الدىن الۋ شارالارى قاجەتتى دەڭگەيدە جۇرگىزىلمەگەن دەپ قاراۋعا بولمايدى. جاقىندا عانا ارىپتەستەرمەن بىرگە ساراپتاما جاساعانبىز. سوڭعى 5 جىلدى قاراستىراتىن بولساق، جىلدان-جىلعا قىلمىس سانى تومەندەپ كەلە جاتىر. بىلتىرعىمەن سالىستىرعاندا، قالا دەڭگەيىندەگى قىلمىس تىركەلۋى 35–45 پايىزعا ازايعان. مىسالى، ەگەر وتكەن جىلدىڭ ءبىرىنشى توقسانىندا ورتاشا ەسەپپەن ءبىر تاۋلىكتە 120 قىلمىس تىركەلسە، 2022 جىلدىڭ جەلتوقسان ايىنىڭ قورىتىندىسى بويىنشا كۇنىنە 66 قىلمىس تىركەلدى.
قالادا جول قاۋىپسىزدىگى مەن تۇنگى تىنىشتىقتى بۇزۋ ماسەلەسى وتە وزەكتى. قازىرگى كريمينالدىق احۋال بويىنشا قىلمىستىڭ سانى بيىلعى 5 ايدا وتكەن جىلدىڭ 5 ايىمەن سالىستىرعاندا، 23 پايىزعا تومەندەدى.
ۋاقىتپەن ساناسپايدى
- كەز كەلگەن قىزمەتتە جاڭا تەحنولوگيا جۇمىستى جەڭىلدەتەدى. سالاداعى جاڭاشىلدىقتاردى ايتىپ وتسەڭىز.
- قىلمىسقا قارسى كۇرەس جۇرگىزۋدە جاڭا ادىس-تاسىلدەر مەن تەحنولوگيانى قولدانۋ قاجەتتىگىن ۋاقىتتىڭ ءوزى كورسەتىپ وتىر. سوڭعى ەنگىزىلگەن جاڭالىق ىشكى ىستەر ءمينيسترى مارات احمەتجانوۆتىڭ قولداۋىمەن الماتى قالاسىنىڭ پوليسيا دەپارتامەنتىنىڭ سيفرلاندىرۋ جونىندەگى ورىنباسارى لاۋازىمى اشىلدى. دەر كەزىندە زاماننىڭ تالابىنا ساي ەنگىزىلدى دەپ ويلايمىن. ءوزىڭىز بىلەسىز، سيفرلاندىرۋ مەملەكەت باسشىسىنىڭ بارلىق مەملەكەتتىك قۇرىلىمعا قويىپ وتىرعان تالابى. وسىدان ءبىر جىل بۇرىن ويىڭا دا كەلمەگەن نارسەلەر بۇگىنگى كۇنى جاسالىپ جاتىر. ماسەلەن، ءبىز كابينەتتە وتىرىپ-اق، ارىپتەستەردىڭ قايدا، قانداي جۇمىس جۇرگىزىپ جاتقانىن ءبىلىپ وتىرامىز. ءاربىر پاترۋلدىك اۆتوكولىك پەن پاترۋلدىك پوليسەيدىڭ، ءتارتىپ ساقشىلارىنىڭ ارەكەتى ۇنەمى باقىلاۋدا. IT-تەحنولوگيانىڭ مۇمكىندىگى – قىزمەتتىك پلانشەتتەر ارقىلى ونلاين-رەجيمدە ءبىز ولاردىڭ جۇمىسىن قاشىقتان قاداعالايمىز. جەدەل باسقارۋ ورتالىعىنىڭ تەحنولوگيالىق جەتىستىگى دە كوپ. ولاردىڭ تاعى ءبىر قىزمەتى – پوليسيانىڭ كەشەندى كۇشتەرىن باقىلاۋ. بۇل جۇيە ارقىلى ورتالىقتا وتىرعان ينسپەكتور پوليسيا جاساعىنىڭ قاي جەردە كەتىپ بارا جاتقانىن، قانداي ارەكەت ەتكەنىن ءبىلىپ وتىرادى. قانداي دا ءبىر قۇقىقبۇزۋشىلىقتار انىقتالعان جاعدايدا ءتيىستى شارالار قابىلدانادى.
وتكەن جىلدان باستاپ «قورعاۋ» باعدارلاماسىن پايدالانىپ كەلەمىز. ول جالعان نومىرمەن، ساقتاندىرۋسىز، ىزدەۋدە جۇرگەن نەمەسە جول قوزعالىسى ەرەجەلەرىن ءجيى بۇزىپ، ايىپپۇلدارىن تولەمەيتىن كولىكتەردى انىقتاۋعا مۇمكىندىك بەرەدى. بۇرىن بۇل بارلىق كولىكتى توقتاتىپ، قۇجاتتاردى تەكسەرۋدى تالاپ ەتەتىن. جۇيە كوشە كامەرالارىنان الىنعان دەرەكتەردى تالدايدى، سودان كەيىن پوليسيا قىزمەتكەرىنىڭ پلانشەتىنە جاقىن جەردە «ءقاۋىپتى» جۇرگىزۋشىنىڭ بار ەكەندىگى تۋرالى حابارلاما جىبەرەدى. سونداي-اق، جىل باسىندا جول قاۋىپسىزدىگىن قامتاماسىز ەتۋگە جانە جول اپاتىن ازايتۋعا باعىتتالعان «سەرگەك-پاترۋل» كەشەنىن پيلوتتىق نۇسقادا ىسكە قوستىق.
- بيىل جارتى جىلدا الماتى پوليسياسىنىڭ قانشا قىزمەتكەرى قۇقىقبۇزۋشىلىقتار مەن قىلمىستار ءۇشىن قىلمىستىق جاۋاپكەرشىلىككە تارتىلدى؟
- سوڭعى 5 ايدىڭ ىشىندە 11 قىزمەتكەر ءتارتىپ بۇزدى. ونىڭ ءارقايسىسى ۇجىم اراسىندا تالقىلانىپ، ەندى قايتالانباۋى ءۇشىن جۇمىستار جۇرگىزىلدى. جەمقورلىق بويىنشا، جول ەرەجەسىن بۇزىپ، جول اپاتىنا اكەلىپ سوعۋ، ت.ب. زاڭسىزدىققا بارعان.
- دەگەنمەن دە، مارتەبەلى ماماندىقتى ابىرويمەن اتقارىپ جۇرگەن پوليسەيلەردىڭ ەڭبەگىن جوققا شىعارا المايمىز. جۇمىس بارىسىندا نەشە ءتۇرلى جاعداي بولادى. قىزمەتىن قالتقىسىز اتقارىپ جۇرگەن قىزمەتكەرلەرگە دەپارتامەنت تاراپىنان قانداي جەڭىلدىكتەر قاراستىرىلعان؟
- تاۋەلسىزدىك جىلدارىندا الماتى قالاسىنىڭ پوليسيا دەپارتامەنتىنىڭ قىزمەتكەرلەرى اراسىندا ءوز مىندەتىن اتقارۋ بارىسىندا 80-نەن استام قىزمەتكەر قازا تاپتى. ونىڭ 37ء-سى قاندى قىلمىسكەرلەردىڭ قولىنان قايتىس بولدى.
قىزمەتكەرلەرىمىزگە بارىنشا جاقسى جاعداي جاسالىپ كەلەدى. ىشكى ىستەر ورگان قىزمەتكەرلەرىنىڭ جالاقىسى كوبەيدى. جەرگىلىكتى بيۋدجەتكە قاراستى قىزمەتكەرلەردىڭ اراسىندا اي سايىن 30 پايىزعا دەيىنگى اكىمشىلىكتەن بولىنگەن اقشا بويىنشا ۇستەماقى تولەنەدى.
جوعارىدا ايتىپ كەتكەن ارنايى پلانشەت ارقىلى اركىمنىڭ جۇمىسى باقىلانىپ وتىرادى. مىسالى، ينسپەكتور ءبىر ايدىڭ كولەمىندە 30 حاتتاما سالسا، باسقا ينسپەكتور 100 حاتتاما سالدى دەلىك. وسى جۇمىستىڭ بارلىعى اۆتوماتتى تۇردە تولىعىمەن جارتى جىلدىققا دەيىن سارالاناتىن بولادى. ءار قىزمەتكەردىڭ KPI-ى، قوسقان ۇلەسى مەن ناتيجەسىنە بايلانىستى ۇستەماقى تولەنەدى.
«اكەڭ جامان دەگەنمەن، جاقسى اكەنى كىم بەرەدى؟»
– جاسىراتىنى جوق، كوبىندە پوليسيا وكىلدەرىن «جازالاۋشى»، «پاراقور» دەپ قابىلدايتىن سانا قالىپتاسقان. راسىمەن، بارلىق قىزمەتكەر ءمىنسىز ەمەس شىعار؟ قوعام پوليسيا قىزمەتكەرلەرىن قانشالىقتى قۇرمەتتەيدى؟
- بارلىعىنا بىردەي جاعۋ مۇمكىن ەمەس. «جالعىزدىڭ ءۇنى، جاياۋدىڭ شاڭى شىقپايدى». قانداي جاعدايدا بولسىن، كەز كەلگەن ادام باسىنا قيىن ءىس تۇسسە، ەڭ ءبىرىنشى پوليسيا قىزمەتىنە جۇگىنەدى. باسشىلاردىڭ مىندەتى – ساپتاعى قىزمەتكەرلەردى ادىلەتتى قازاقستاننىڭ قويىپ وتىرعان تالابىنا ساي جۇمىس ىستەۋگە تاربيەلەۋ. ارينە، ءتارتىپتىڭ ساقشىلارىنا باعا بەرەتىن – قوعام. مەن كۇندەلىكتى ناتيجەنى عانا كورەمىن. بۇگىن ىستەلگەن جۇمىستاردى 5-كە باعالاعانىمىزبەن، ال قوعام ونى وڭ باعالاماۋى مۇمكىن. وندا ءبىز ودان دا كوپ كۇش سالۋعا تىرىسۋىمىز كەرەك. ءبىزدىڭ جاقسىلىعىمىزدى دا، جاماندىعىمىزدى دا ەڭ ءبىرىنشى قوعام كورەدى. بۇگىنگى كۇنى پوليسيا قىزمەتكەرىنە قاتىستى «بەتىمەن كەتكەن، تارتىپكە باعىنبايتىن پاراقور» دەگەن ۇعىم جوعىنا سەنەمىن. بولاشاقتا بۇدان دا جاقسى ناتيجەگە جەتەمىز. ويتكەنى، سول قوعاممەن بىرگە ءجۇرمىز. حالىقتىڭ تاراپىنان ايتىلاتىن سىن شىن بولسا، كوتەرەمىز، تۇزەتەمىز. قىزمەتتەگىلەردىڭ جۇمىسى بىزگە قاراعاندا حالىققا شىنايى كورىنۋى مۇمكىن.
- جاقىندا ىشكى ىستەر جۇيەسىندەگى بۇرىن جويىلعان ۇيىمداسقان قىلمىسقا قارسى كۇرەس ءبولىمى قايتا جانداندى. قىلمىستى انىقتاۋدا بۇل ءبولىمنىڭ ارتىقشىلىعى نەدە؟
- ءيا، ىشكى ىستەر ورگاندارىندا بۇل ءبولىم ءتورت جىلعا جۋىق بولعان جوق. ايتا كەتەتىن ءجايت، بۇل ءبولىمنىڭ قۇرىلىمدارى كريمينالدىق پوليسيا باسقارماسىنىڭ ىشىندە ورنالاسقان. ءبولىم، توپ، بولماسا باسقا دا بولىمدەر سول قۇرامدا بولدى. ءتورت جىل بويى ۇيىمداسقان قىلمىسقا قارسى كۇرەس جۇرگىزىلمەدى دەگەن ۇعىم قالىپتاسپاۋى كەرەك. ارنايى ءبولىم بولماسا دا دەپارتامەنت قىلمىسقا قارسى كۇرەس جۇرگىزدى. ءمينيستردىڭ شەشىمىمەن ءوز الدىنا بولەك ءبولىم قۇرىلدى. جالپى، بۇگىنگى كۇندە ءبىر جىلدا الماتى پوليسيا دەپارتامەنتى ۇيىمداسقان قىلمىسقا قارسى كۇرەس باسقارماسى اۋىز تولتىرىپ ايتارلىقتاي جۇمىس اتقاردى. ءبولىم جاڭادان اشىلعاننان كەيىن ءبىرقاتار قيىنشىلىق تا بولدى. شتاتتىڭ بىرلىگى ۇلعايدى. ءبىلىمى، تاجىريبەسى كوپ، ۇيىمداسقان قىلمىسپەن كۇرەستە تاجىريبەسى بار ماماندار تارتىلدى. مۇنداي جاۋاپتى، كۇردەلى جۇمىسقا جاس كۋرسانتتاردى الا المايمىز. بولىمگە اۋدان باسقارمالارىنان تاجىريبەلى قىزمەتكەرلەر ىزدەستىردىك. ارنايى ءبولىمنىڭ جۇمىسى ءۇشىن باسقا ايماقتاردان اۋىسىپ كەلگەن ارىپتەستەر دە بولدى.
- الماتىدا كوپ تىركەلەتىن قىلمىس ءتۇرى قانداي؟ 8 اۋداننىڭ ىشىندە قايسىسىندا قىلمىس كوپ جاسالادى؟
– ەڭ كوپ جاسالاتىن قىلمىس – ۇرلىق. ول قىلمىستىڭ جاسالۋ سەبەبىن دە مەڭگەرۋگە تۋرا كەلەدى. كەيبىرى الەۋمەتتىك جاعدايدىڭ تومەندىگىنەن بارادى. ەندى ءبىرى ۇرلىققا ابدەن ماشىقتانعان، كاسىپ قىلعان اككى ۇرىلار بولادى. ءاربىر جاسالعان قىلمىستىڭ وزىنە ساراپتاما جاسالادى. قىلمىستىق ىستەر كودەكسىنىڭ باپتارىنا بايلانىستى ءار قىلمىستىڭ سەبەبىن مەڭگەرىپ، كەلەسىدە قايتالانباۋى ءۇشىن جۇمىستانامىز. سونداي-اق، الاياقتىق، كيبەرالاياقتىق كوپ.
مىنا اۋداندا مىنانداي قىلمىس كوپ نەمەسە مىنا اۋداندا مۇلدەم قىلمىس جوق دەۋ مۇمكىن ەمەس. ەگەر وبلىس بولسا، ول اۋماقتا تۇراقتى بولىپ تۇراتىن قىلمىستىڭ ءتۇرى بولادى. ءار قىلمىستىڭ سەبەپ پەن سالدارى ىشكى جيىنداردا تالقىلانادى. قىلمىس جاسالىپ، كىنالى جازالانعانىمەن، ءبارى بىتپەيدى. قىلمىستىڭ ۇلكەن-كىشىسى بولمايدى. بارلىق قىلمىستىڭ قايتا قايتالانباۋىنا جۇمىس جۇرگىزىلەدى. تاۋلىكتىڭ كەز كەلگەن ساتىندە قىلمىسكەرلەرمەن بەت-بەت كەلەتىن ءتارتىپ ساقشىلارىنىڭ سەرۆيستىك جۇمىس باعالاۋى – قۇقىقبۇزۋشىلىقتاردى انىقتاۋ ەمەس، قىلمىستى بولدىرماۋ.
- بۇل قىلمىستارعا قارسى جۇمىستا ماماندارمەن قاتار تەحنيكالىق بازا دا مىقتى بولۋ كەرەك قوي. ولاردىڭ سانى جەتكىلىكتى مە؟
- وسى ۋاقىتقا دەيىن مەن باسقا دا وڭىرلەردە جۇمىس ىستەدىم. ارىپتەستەرىمە دە ۇنەمى ايتامىن. تەحنيكالىق، كولىكتىك جاعىنان قامتاماسىز ەتۋدە الماتى قالاسى باسقا ايماقتارعا قاراعاندا كوش باستاپ تۇر. ءبىزدىڭ ءىىم جەرگىلىكتى اتقارۋ قىزمەتتەرى، ت.ب. دەر كەزىندە قارجى ءبولىپ، تەحنيكامەن قامتاماسىز ەتەدى.
- كۇن سايىن قالانىڭ «102» پوليسيانى شۇعىل شاقىرتۋ جەلىسىنە قانشا قوڭىراۋ كەلىپ تۇسەدى؟
– جەلى وپەراتورلارى جەدەل باسقارۋ ورتالىعىنىڭ جەلىسىنە كەلىپ تۇسكەن اقپارات ارقىلى شۇعىل ارەكەت ەتەدى. حابارلامالاردى 14 وپەراتور وڭدەيدى. ءار وپەراتور كۇنىنە 250 قوڭىراۋعا جاۋاپ بەرەدى. ورتا ەسەپپەن العاندا، كۇنىنە شامامەن، 4،5 مىڭنان استام قوڭىراۋ كەلەدى. ونىڭ ءبارى قىلمىسقا قاتىستى ەمەس. جەلىگە كەلەتىن اقپاراتتاردىڭ ىشىندە «كولىگىم اۋلادا تۇر، باسقا بىرەۋدىڭ كولىگى جولىما بوگەت جاساپ تۇر»، «اۋلادا ءبىزدىڭ اۋلادا تۇرمايتىن باسقا بىرەۋلەر وتىر» دەگەن سياقتى ءجاي اقپاراتتار دا بار. تۇرمىستىق جاعدايلارعا، ءۇي ىشىندەگى ۇرىسقا قاتىستى شاقىرتۋلار بولادى. قىلمىسقا قاتىسى جوق بولسا دا، ءبىزدىڭ قىزمەتكەرلەر وقيعا ورنىنا بارۋعا مىندەتتى. ءاربىر تۇسكەن حابارلاماعا قىزمەت كورسەتىلەدى. قابىلداۋ جابدىعى اۆتوماتتى رەجيمدە جۇمىس ىستەيدى. ءاربىر قوڭىراۋ كەزەك تارتىبىمەن قابىلدانادى.
- جالعان حابارلامالاردىڭ دا بولاتىنىن ەستىپ ءجۇرمىز. اقپاراتتىڭ راستالعان نەمەسە جالعان ەكەنى قالاي انىقتالادى؟
- تەكسەرۋ بارىسىندا انىقتالادى. باسقا ەشقانداي جولى جوق. حابارلاما سەنىمسىز بولعان كۇننىڭ وزىندە تەكسەرىس جۇرگىزىلۋى كەرەك. باياعىدان قالعان «وتىرىكشىنىڭ شىن ءسوزى زايا كەتتى» دەگەن ءسوز بار. سوندىقتان كەز كەلگەن شاقىرتۋعا قىزمەتكەرلەر وقيعا ورنىنا اتتانادى.
ءوز اتىمنان، الماتى قالاسى پوليسيا دەپارتامەنتىنىڭ جەكە قۇرامىنىڭ اتىنان بارلىق ارىپتەسىمدى كاسىبي مەرەكەمەن قۇتتىقتايمىن! ەلىمىز تىنىش بولسىن! ەڭبەكتىڭ جەمىسىن كورىپ، قىزمەتكە ادالدىق تانىتايىق.
- سۇحباتىڭىزعا كوپ راحمەت!
سۇحباتتاسقان گۇلجانات سەمبايەۆا.