اقش پرەزيدەنتى دونالد ترامپ Truth Social الەۋمەتتىك جەلىسىندە "جاڭا لاۋازىمىن" جاريالادى، - دەپ حابارلايدى اqshamnews.kz ءتىلشىسى.
ترامپ Truth Social-دا (ۆيكيپەدياداعى ءومىربايانعا ۇقساس) سكرينشوت جاريالاپ، وندا 2026 جىلعى قاڭتاردان باستاپ ۆەنەسۋەلا پرەزيدەنتىنىڭ مىندەتىن اتقارۋشى ەكەنىن كورسەتكەن. ياعني، ول ءوزىن 2026 جىلعى قاڭتاردا "تاعايىندالدى" دەپ جازعان. اقش پرەزيدەنتى رەتىندەگى قازىرگى قىزمەتىن دە وزىندە قالدىرعان.
فوتو: truthsocial.com/@realDonaldTrump
ۆەنەسۋەلاداعى وقيعالار
ەسكە سالايىق، 2025 جىلعى جەلتوقساندا اقش ۆەنەسۋەلاعا قارسى وپەراسيا جۇرگىزىپ، ەل استاناسى كاراكاستا پرەزيدەنت نيكولاس مادۋرو مەن ونىڭ جۇبايىن قولعا تۇسىرگەن. كەيىن مادۋرو برۋكليندەگى تەرگەۋ يزولياتورىنا جەتكىزىلگەنى بەلگىلى بولدى.
سونداي-اق، ترامپ "اقش-تىڭ بارلىق جاۋىنا" ۆەنەسۋەلادا بولعان وپەراسيا سياقتى شارا قولداناتىنىن ايتىپ، قوقان-لوقى جاسادى.
نيۋ-يوركتە ۆەنەسۋەلا پرەزيدەنتىنىڭ ءىسى بويىنشا سوتتىڭ العاشقى وتىرىسى اياقتالدى. وعان "ەسىرتكى-تەرروريزمگە بايلانىستى ءسوز بايلاسۋ، كوكاين كونترابانداسى، پۋلەمەتتەر مەن جارىلعىش قۇرىلعىلاردى ساقتاۋ جانە ولاردى اقش-قا قارسى قولدانۋ ماقساتىندا ءسوز بايلاسۋ" ايىپتارى تاعىلىپ، ءتورت رەت ءومىر بويىنا باس بوستاندىعىنان ايىرۋ جازاسى ءقاۋپى ءتونىپ تۇر.
سوتتا مادۋرو ءوزىنىڭ "ءالى دە ۆەنەسۋەلا پرەزيدەنتى" ەكەنىن جانە "ايىپتاردىڭ ەشقايسىسىنا كىنالى ەمەس" ەكەنىن مالىمدەدى. ونىڭ ايەلى دە كىناسىز ەكەنىن ايتتى. ولار سۋديامەن اۋدارماشى ارقىلى سويلەستى.
سۋديا ساياساتكەردى كەلەسى تىڭداۋعا 17 ناۋرىزدا كەلۋگە مىندەتتەپ، كونسۋلدىق قىزمەتكەرلەردىڭ كەلۋىنە رۇقسات بەردى. ونىڭ قورعاۋشىلارى ۆەنەسۋەلا پرەزيدەنتىن كەپىلمەن بوساتۋعا قول جەتكىزۋگە نيەتتى ەكەنىن ايتتى.
دەلسي رودريگەس ۆەنەسۋەلانىڭ پرەزيدەنت مىندەتىن اتقارۋشىسى بولىپ تاعايىندالدى. باستاپقىدا رودريگەس اقش ارەكەتتەرىن قاتاڭ ايىپتاپ، مادۋرونى بوساتۋدى تالاپ ەتكەن، الايدا كەيىنىرەك ترامپقا ۇندەۋ جاريالاپ، ۆەنەسۋەلالىقتار "سوعىس ەمەس، بەيبىت ومىرگە لايىق" ەكەنىن ايتتى.