الماتىدا ەسەن دۇيسەنوۆ كوشەسىندەگى قالالىق كەڭىستىكتى كەشەندى كورىكتەندىرۋ جوسپارلانىپ وتىر، - دەپ حابارلايدى aqshamnews.kz ءتىلشىسى.
جۇمىس ساپارى بارىسىندا الماتى اكىمى دارحان ساتىبالدى ەسەن دۇيسەنوۆ كوشەسىنىڭ روزىباكييەۆ كوشەسىنەن دارگومىجسكيي كوشەسىنە دەيىنگى ارالىقتى ارالاپ، اتالعان اۋماقتا جۇرگىزىلەتىن كۇردەلى جوندەۋ جوباسىمەن تانىستى.
جوبا اياسىندا ۇزىندىعى 2،3 شاقىرىم بولاتىن كوشە كەڭىستىگى كەشەندى تۇردە جاڭعىرتىلماق. اتاپ ايتقاندا، كەڭ كولەمدە كوگالداندىرۋ جۇمىستارى جۇرگىزىلىپ، جۇرگىنشىلەرگە ارنالعان ايماقتار اباتتاندىرىلادى، اسفالت-بەتون جانە پليتكا جابىندارى توسەلەدى، ورىندىقتار مەن قوقىس جاشىكتەرى ورناتىلادى. سونىمەن قاتار، جارىقتاندىرۋ جانە سۋارۋ جۇيەلەرى جاڭارتىلىپ، زاماناۋي تالاپتارعا سايكەستەندىرىلەدى.
سونداي-اق، جوبا اياسىندا بالالار مەن سپورت الاڭدارىن سالۋ، workout-ايماقتار قۇرۋ، اشىق سپورتتىق جاتتىعۋ قۇرالدارىن ورناتۋ، فۋتبول الاڭىن، سكەيت-پارك، شاحمات ۇستەلدەرىن، ۆەلوسيپەد تۇراقتارىن جانە اۋىزسۋ بۇرقاقتارىن ورنالاستىرۋ كوزدەلگەن. بۇدان بولەك، سۋارۋ جۇيەسىن جوندەۋ، تامشىلاتىپ سۋارۋ جۇيەسىن ەنگىزۋ جانە كابەل جەلىلەرىن جاڭارتۋ جوسپارلانعان. جوبا پروكوفيەۆ كوشەسىندەگى ۋچاسكەلەردى جانە «بۋدان» سكۆەرىنىڭ اۋماعىن دا قامتيدى.
سونىمەن قاتار، الماتى اكىمى المالى اۋدانىندا 240 ورىنعا ارنالعان بالاباقشا قۇرىلىسىنىڭ بارىسىمەن تانىستى.
ساپار قورىتىندىسى بويىنشا دارحان ساتىبالدى اباتتاندىرۋ جۇمىستارىنىڭ ساپالى ءارى ۇزاق مەرزىمگە قىزمەت ەتەتىن سەنىمدى شەشىمدەر نەگىزىندە جۇزەگە اسىرىلۋى قاجەتتىگىن اتاپ ءوتتى. قالا باسشىسى الماتىلىقتاردىڭ زاماناۋي، كوركەم ءارى جايلى قالالىق ورتادا ءومىر ءسۇرۋى ءتيىس ەكەنىن ايتىپ، جاۋاپتى باسقارمالار مەن اۋدان اكىمدىگىنە جوبانى ساپالى ءارى بەلگىلەنگەن مەرزىمدە جۇزەگە اسىرۋدى تاپسىردى.