مينيسترلىك ءدارىحانالارعا ەسكەرتۋ جاسادى.
جىل باسىنان بەرى "ترامادولدى" زاڭسىز ساقتاعانى ءۇشىن ءۇش ادام قاماۋعا الىندى،دەپ حابارلايدى aqshamnews.kz
ىشكى ىستەر مينيسترلىگى ءدارىحانالار مەن فارماسيەۆتيكالىق كومپانيالارعا "ترامادولدى" رەسەپتسىز ساتقانى ءۇشىن قىلمىستىق جازا قاراستىرىلعانىن ەسكە سالدى.
2023 جىلى "ترامادول" پسيحوتروپتىق زاتى ەسىرتكى زاتتارىنىڭ تىزىمىنە ەنگىزىلگەن بولاتىن. قازىرگى كەزدە بۇل پرەپارات دارىگەردىڭ رەسەپتى بويىنشا ءتيىستى ليسەنزياسى بار ءدارىحانالاردا عانا ساتىلادى. ال ەسىرتكى جانە پسيحوتروپتىق زاتتاردى رەسەپتىسىز ساتۋ بويىنشا ۇنەمى جەدەل-ىزدەستىرۋ ءىس-شارالارى وتكىزىلەدى.
ماسەلەن، جىل باسىنان بەرى "ترامادولدى" زاڭسىز ساقتاعانى ءۇشىن ءۇش ادام قاماۋعا الىندى. ولاردان 2500-دەن استام تابلەتكا تاركىلەندى.
"وسىعان بايلانىستى ءدارىحانالار مەن فارماسيەۆتيكالىق كومپانيالاردىڭ باسشىلارىنا قولدانىستاعى زاڭناما تالاپتارىن قاتاڭ ساقتاۋ قاجەت ەكەنىن ەسكە سالامىز. مەديسينادا قولدانىلاتىن پسيحوتروپتىق زاتتار مەن ەسىرتكىلەردى رەسەپتسىز ساتۋ قىلمىستىق كودەكستىڭ 297-بابى 3-بولىگىمەن قارالىپ، "ەسىرتكىنى زاڭسىز وتكىزۋ" بولىپ سانالاتىنىن ەسكەرتەمىز. ول ءۇشىن 10 جىلدان 15 جىلعا دەيىن باس بوستاندىعىنان ايىرۋ جازاسى قاراستىرىلعان"، - دەيدى ەسىرتكى قىلمىسىنا قارسى ءىس-قيمىل كوميتەتى باسقارماسى باستىعىنىڭ ورىنباسارى ايبەك برىكوۆ.