الماتى قالاسىنىڭ توتەنشە جاعدايلار دەپارتامەنتى قار كوشكىنىنە بايلانىستى ەسكەرتۋ جاسادى، دەپ حابارلايدى اlmaty-akshamy.kz.
الماتى تاۋلارىندا قار كوشكىنى ءقاۋپىنىڭ ساقتالۋىنا بايلانىستى، بلوكپوستتار قويىلدى.
سينوپتيكتەر 21-23 ناۋرىز ارالىعىندا قار كوشكىنى ءقاۋپى تۋرالى دابىلدى ەسكەرتۋ جاسادى. جىلىمىقتىڭ اسەرىنەن قاتتى جاۋىن-شاشىن تۇسۋىنە، سونداي-اق قار جامىلعىسىنىڭ تۇراقسىز جاعدايىنا بايلانىستى قار كوشكىنى بولۋى مۇمكىن ەكەنىن اتاپ ءوتتى، - دەلىنگەن حابارلامادا.
سونداي-اق «قازسەلدەنقورعاۋ» ماماندارى ناۋرىز ايىندا قار كوشكىنىنىڭ ەڭ ءقاۋىپتى ءتۇرى – «سۋلى قار» كوشكىنى تۇسەتىنىن اتاپ وتكەن.
الماتى تاۋلارىندا كوشكىن ءقاۋپىنىڭ جوعارى دارەجەسى ساقتالۋدا. ادامداردىڭ قاۋىپسىزدىگىن ساقتاۋ ماقساتىندا شىمبۇلاق تشك ، «ايۋساي» بوگەتىنەن جوعارى «ۆيزيت» ورتالىعى اۋماعىندا، «ەدەلۆەيس» كوشكىن جيناۋ اۋدانىندا بلوك-بەكەتتەر ورناتىلعان. وسىعان بايلانىستى، جوعارىدا اتالعان مەرزىمدەردە تاۋعا بارماۋلارىڭىزدى سۇرايمىز، - دەپ مالىمدەدى دەپارتامەنت.