مەملەكەت باسشىسى سەيسمولوگيالىق باقىلاۋ جانە زەرتتەۋ ۇلتتىق عىلىمي ورتالىعىنىڭ ديرەكتورى داۋلەت سارسەنبايەۆتى قابىلدادى
كەزدەسۋ بارىسىندا پرەزيدەنت قاسىم-جومارت توقايەۆقا عىلىمي ورتالىقتىڭ قازىرگى اتقارىپ جاتقان جۇمىستارى جونىندە باياندالدى، دەپ حابارلايدى almaty-akshamy.kz
داۋلەت سارسەنبايەۆ بىلتىر قالا اۋماعىندا ورنالاسقان 16 سەيسميكالىق ستانسيانىڭ 11-نە 527 ميلليون تەڭگەگە قۇرال-جابدىق ساتىپ الىنعانى تۋرالى مالىمەت بەردى.
2021-2023 جىلدارعا ارنالعان ماقساتتى قارجىلاندىرۋ باعدارلاماسىنىڭ ناتيجەسىندە 25 باقىلاۋ پۋنكتى اشىلدى. حالىقارالىق ىنتىماقتاستىق اياسىندا 10 جاڭا ستانسيا ءىشىنارا جاڭعىرتىلىپ، 6 جاڭا ستانسيا پايدالانۋعا بەرىلدى.
مەملەكەت باسشىسى سەيسميكالىق قاۋىپسىزدىك حالىقتى قورعاۋ دەڭگەيىنە، ەكونوميكالىق نىساندار مەن قورشاعان ورتانىڭ جاي-كۇيىنە اسەر ەتەتىن ۇلتتىق قاۋىپسىزدىكتىڭ نەگىزگى فاكتورى سانالاتىنىن ايتتى. پرەزيدەنت ەرتە قۇلاقتاندىراتىن وزىق جۇيە ەنگىزۋگە جانە سەيسمولوگتاردىڭ بىلىكتىلىگىن ارتتىرۋعا قاتىستى بىرنەشە ماسەلەگە نازار اۋداردى.
قاسىم-جومارت توقايەۆ عىلىمي ورتالىققا جەر سىلكىنىستەرىن بولجاۋدىڭ عىلىمي ادىستەرىن قولدانۋ جانە ەنگىزۋ جونىندە ماڭىزدى مىندەت جۇكتەلەتىنىن ايتتى.
مەملەكەت باسشىسى ورتالىقتىڭ جۇمىسىندا عىلىمي زەرتتەۋلەردى دامىتۋ جانە يننوۆاسيالىق تەحنولوگيالاردى ەنگىزۋ قاجەت ەكەنىن اتاپ ءوتتى.