ءماسليحات دەپۋتاتتارى شىعىن مەن زالالدى وتەۋ جونىندەگى وڭىرلىك كوميسسيا قۇرامىنا ەنىپ، ءمان-جايدى تىكەلەي باقىلايدى.
قاڭتار ايىندا قازاقستاندا بولعان لاڭكەستىك ارەكەتتەن جازىقسىز ازاماتتار زارداپ شەكتى. سونىمەن قاتار، شاعىن جانە ورتا بيزنەس قۇرىلىمدارى، ساۋدا نىساندارى، مەملەكەتتىك مەكەمەلەر، اكىمدىك مەن پوليسيا بولىمشەلەرى، دەپارتامەنت عيماراتتارىنا وراسان زور نۇقسان كەلتىرىلدى. مەملەكەت باسشىسى قاسىم-جومارت كەمەل ۇلى توقايەۆتىڭ ۇندەۋى ەل باسىنا كۇن تۋعان شاقتا قازاق جۇرتىنىڭ جۇدىرىقتاي جۇمىلىپ، بىرىگۋىنە تۇرتكى بولدى، دەپ حابارلايدى Almaty-akshamy.kz.
الماتى ءماسليحاتىنىڭ دەپۋتاتتارى وسىنداي اۋىر كۇندەرى قالامىزعا جاسالعان تەررورلىق شابۋىل سالدارىمەن كۇرەسىپ جاتقان ازاماتتارعا بارىنشا قولداۋ كورسەتتى.
ەل باسىنا كۇن تۋعان قيىن كۇندەرى قالا دەپۋتاتتارى 10 ەمدەۋ مەكەمەسىنە (№4 قالالىق كلينيكالىق اۋرۋحانا، جەدەل سانيتارلىق-مەديسينالىق كومەك، كارديولوگيالىق ورتالىق، الماتى كوپسالالى اۋرۋحاناسى، قالالىق جۇقپالى اۋرۋلار اۋرۋحاناسى، فتيزيوپۋلمونولوگيا ورتالىعى، №1 جانە №2 قالالىق بالالار اۋرۋحاناسى، بالالار جۇقپالى اۋرۋلار اۋرۋحاناسى) جانە حالىقتىڭ الەۋمەتتىك قورعالماعان توپتارىنا جالپى سوماسى 78 ملن تەڭگەگە 50 توننادان استام ازىق-تۇلىك جەتكىزۋدى ۇيىمداستىردى. ونىڭ ىشىندە، 7-10 قاڭتار ارالىعىندا قالانىڭ مەديسينالىق مەكەمەلەرىنە جالپى كولەمى 21 توننادان اساتىن ازىق-تۇلىك ونىمدەرى كومەك رەتىندە جەتكىزىلدى.
ەكى جۇزگە جۋىق اسكەري ارەكەت ەتۋ تاجىريبەسى بار ازاماتتارمەن بىرلەسە وتىرىپ، №1 جانە №2 بالالار اۋرۋحاناسى، №4 قالالىق كلينيكالىق اۋرۋحاناسى جانە جەدەل مەديسينالىق جاردەم ستانسياسى قورعاۋعا الىندى. ەمدەۋ مەكەمەلەرى تەرىس پيعىلدىلار ءۇشىن نىساناعا اينالۋى مۇمكىن ەدى. ويتكەنى لاڭكەستەر شابۋىل جاساپ، وسىنداي ءىرى عيماراتتارعا كوز تىگەدى. ءارى ەمدەۋ مەكەمەلەرى ولارعا قارسى كۇش كورسەتە المايدى دەگەن ويدا بولادى. قىلمىستىق ەلەمەنتتەر: تەرروريستەر، بۇزاقىلار، قاراقشىلار. ولار ەمحانالارعا، اۋرۋحانالار مەن پەرزەنتحانالاردى نىساناعا الىپ، ول جەردە كوبىنە ايەل ازاماتتار قىزمەت ەتەتىندىكتەن، قارسىلىق كۇشى بولمايتىنىن الدىن الا جوسپارلايدى ءارى توناۋ، كۇيرەتۋ سەكىلدى تەرىس پيعىلدارىن كوزدەيدى.
«ءقاۋىپتى ساتتە قورعاۋ جۇمىستارىن وڭتايلى ۇيىمداستىرعان مۇرات ابدىشۇكىروۆكە، مارك بەيدالي مەن بارلىق اسكەري سالانىڭ ارداگەرلەرىنە ءماسليحات ۇلكەن العىس بىلدىرەدى. ءبىزدىڭ سەرىكتەسىمىز گادجي گادجييەۆ، قۇقىق قورعاۋ ورگاندارى، توتەنشە جاعدايلار قىزمەتى جانە اۋرۋحانالار ءۇشىن 10 مىڭ ادامعا ىستىق تۇسكى اس دايىنداپ، جەتكىزىپ بەردى. سوندايىق-اق، دەمەۋشىلەر مەن ەرىكتىلەر دە اۋرۋحانالارعا جانە مۇقتاج ازاماتتارعا ازىق تۇلىك جەتكىزگەنى ءۇشىن ەرەكشە العىس ايتقىمىز كەلەدى»، - دەدى الماتى ءماسليحاتىنىڭ حاتشىسى ستانيسلاۆ كانكۋروۆ.
سونىمەن قاتار، دەپۋتاتتار مەن ۇەۇ-نىڭ قارجىلىق قولداۋىمەن 572 وتباسىنا ونىڭ ىشىندە قازاق زاعيپتار قوعامىنىڭ ءوتىنىشى بويىنشا 300 وتباسىنا، سونداي-اق زەينەتكەرلىك جاستاعىلار مەن جالعىز باستى ازاماتتار، مۇمكىندىكتەرى شەكتەۋلى جاندار جانە ومىرلىك قيىن جاعدايعا تاپ بولعاندار، داعدارىس ورتالىقتارى مەن «انا ۇيىندە» تۇرىپ جاتقان ادامدار ءۇشىن ازىق-تۇلىك ساتىپ الىندى.
«دەپۋتاتتار قالا تۇرعىندارىن ماتەريالدىق تۇرعىدا عانا قولداپ قويماي، دونور دا بولدى - زارداپ شەككەندەرگە قان تاپسىردى. قايىرىمدىلىق دونورلىقتىڭ ماقساتى - ءومىردى ساقتاپ قالۋ ءۇشىن دونورلىق قان قورىن تولىقتىرۋ. دونورلىق قانعا دەگەن قاجەتتىلىك ءاردايىم تۋىندايتىنى بەلگىلى. ال قازاقستانداعى تەرروريستىك شابۋىل كۇندەرى دونورلىق قانعا دەگەن سۇرانىس بىرنەشە ەسە ارتقانى تۇسىنىكتى. ويتكەنى شۇعىل قان قۇيۋدى قاجەت ەتەتىن جارالانعاندارعا قولداۋ قاجەت ەدى. وسىنى باسشىلىققا العان دەپۋتاتتار زارداپ شەككەندەرگە جاناشىر بولا وتىرىپ، دارىگەرلەردىڭ رۇقساتىمەن قان قورىن تولىقتىرۋعا اتسالىستى»، - دەپ ءتۇسىندىردى ءماسليحات حاتشىسى.
جاقىن ارادا دەپۋتاتتار قالا بيۋدجەتىن قايتا قاراپ، قاراجاتتىڭ ءبىر بولىگىن زالالدى قالپىنا كەلتىرۋگە جانە ت.ب. باعىتتاۋى ءتيىس.
مەملەكەت لاڭكەستىك قىلمىستاردان زارداپ شەككەن. اتاپ ايتقاندا، عيماراتتار مەن قۇرىلىس نىساندارى، بۇلىنگەن جىلجىمالى مۇلىك پەن جابدىقتار، سونداي-اق ۇرلانعان تاۋارلاردان بيزنەسكە كەلتىرىلگەن زالالدى وتەپ بەرۋ جاعىن قاراستىرۋدا.
مەملەكەت باسشىسى بۇعان دەيىن مالىمدەگەندەي، بيزنەسكە تارتىپسىزدىك بارىسىندا كەلتىرىلگەن زالالدى وتەۋ قاراستىرىلادى. بيزنەسكە كەلتىرىلگەن زالالدى وتەۋ ءتارتىبى ازىرلەندى. ءماسليحات دەپۋتاتتارى شىعىن مەن زالالدى وتەۋ جونىندەگى وڭىرلىك كوميسسيا قۇرامىنا ەنىپ، ءمان-جايدى تىكەلەي باقىلايدى. سونداي-اق، 25 دەپۋتات تەرروريستىك ءىس-قيمىل ناتيجەسىندە ورىن العان شىعىن كولەمىن انىقتاۋعا باعىتتالعان اۋداندىق جۇمىس توپتارىنا ەنگىزىلدى.