ەركەعالي راحمادييەۆ اتىنداعى مەملەكەتتىك اكادەميالىق فيلارمونيا قازاقستاندىق ءانشى تورەعالي تورەالىنىڭ كونسەرتى وتپەيتىنىن راستادى، دەپ حابارلايدى Almaty-akshamy.kz
«7 شىلدەدە ەركەعالي راحمادييەۆ اتىنداعى مەملەكەتتىك اكادەميالىق فيلارمونيادا تورەعالي تورەالى مەن ءابدىجاپپار ءالقوجانىڭ كونسەرتى وتەدى دەپ جوسپارلانعان بولاتىن. كەشە، 22 ماۋسىمدا كونسەرتتى ۇيىمداستىرۋشى كونسەرتتىڭ بولمايتىنىن حابارلادى. دەمەك بۇل كونسەرت ءبىزدىڭ زالدا وتپەيدى»، - دەپ حابارلادى فيلارمونيانىڭ باسپا ءسوز قىزمەتى.
بۇعان دەيىن قازاقستاندىق ءانشى ماس كۇيىندە كولىك جۇرگىزگەنى ءۇشىن سوت شەشىمىمەن اكىمشىلىك جاۋاپقا تارتىلعان بولاتىن. ول 7 جىل مەرزىمگە كولىك قۇرالىن باسقارۋ قۇقىعىنان ايىرىلدى، 20 تاۋلىككە قاماۋعا الۋ تۇرىندەگى اكىمشىلىك جازاعا تارتىلدى.
بۇدان وزگە، انشىگە قاتىستى ق ر قىلمىستىق كودەكسىنىڭ 378-بابى «بيلىك وكىلىن قورلاۋ» بويىنشا قىلمىستىق قۇقىق بۇزۋشىلىق فاكتىسىمەن قىلمىستىق ءىس قوزعالدى.
ءانشىنىڭ قارىنداسى دينا تورەالى اعاسىنىڭ ۇستالعانى تۋرالى بۇعان دەيىن ايتقان بولاتىن.