الماتى قالاسى اكىمدىگىنىڭ جوبالىق كەڭسەسى "جايلى مەكتەپ" ۇلتتىق جوباسى اياسىندا مەكتەپ سالۋ باعىتى بويىنشا بەلسەندى جۇمىس ىستەيدى. 2025 جىلعا قاراي قالادا 37 100 وقۋشىعا ارنالعان جاڭا 22 مەكتەپ پايدا بولادى دەپ جوسپارلانۋدا، دەپ حابارلايدى almaty-akshamy.kz
جايلى مەكتەپ – بۇل بالالاردىڭ قۋانا كەلىپ، ءبىلىم العىسى كەلەتىن مەكەن، ويتكەنى بۇل مەكتەپتە ساپالى ءبىلىم الۋ، دامۋ جانە وقۋشىلاردىڭ قاۋىپسىزدىگىن قامتاماسىز ەتۋ ءۇشىن بارلىق جاعداي جاسالىنادى.
الماتى قالاسى اكىمدىگىنىڭ جوبالىق كەڭسەسىنىڭ مالىمەتىنشە، جاڭا فورماتتاعى مەكتەپتەردىڭ كوپشىلىگى الاتاۋ جانە ناۋرىزباي اۋداندارىندا – ءارقايسىسىندا 5 ءبىلىم بەرۋ مەكەمەسى سالىنادى. بوستاندىق اۋدانىندا – 4، تۇركسىب اۋدانىندا – 3، اۋەزوۆ اۋدانىندا – 2، قالعان اۋدانداردا بىر-بىردەن مەكتەپ سالۋ جوسپارلانۋدا. مەكتەپتەر ولاردىڭ تاپشىلىعى بايقالاتىن مەكەندەردە سالىنۋدا.
قازىرگى ۋاقىتتا جوبالىق-سمەتالىق قۇجاتتاردى ازىرلەۋ جۇمىستارى جۇرگىزىلۋدە. مەكتەپتەردىڭ قۇرىلىسى 2023 جىلدىڭ قاراشاسىندا ساراپتامادان وتكەننەن كەيىن باستالادى. سونداي-اق، اعىمداعى كەزەڭدە قالا اكىمدىگى مەن ءبىرقاتار اۋداندارداعى جەر تەلىمدەرىنىڭ يەلەرى اراسىندا سەگىز مەكتەپ «تولىق قۇرىلىس» جۇيەسى بويىنشا سالىنىپ، ودان ءارى پايدالانۋعا بەرۋ تۋرالى مەموراندۋمعا قول قويۋ جۇمىستارى جۇرگىزىلۋدە.
ۇلتتىق جوبا اياسىنداعى بارلىق مەكتەپتەر ءبىرىڭعاي ستاندارت بويىنشا سالىنادى. پاندىك كابينەتتەر مەن زەرتحانالاردى ودان ءارى جابدىقتاۋمەن قاتار، قۇرىلىس بارىسىنا قاتاڭ باقىلاۋ ورناتىلادى. بۇل رەتتە مەكتەپتەرگە قاجەتتى بارلىق ماتەريالدار، قۇرال-جابدىقتار، ءتىپتى جيھازدار دا قازاقستاندىق وندىرىستەن بولماق.
جايلى مەكتەپتەردە ەرەكشە ءبىلىم بەرۋ قاجەتتىلىكتەرى بار بالالارعا دا قولايلى جاعداي جاسالادى، جوعارى جىلدامدىقتى ينتەرنەت جۇرگىزىلەدى جانە باستاۋىش سىنىپ وقۋشىلارى، جوعارى سىنىپ وقۋشىلارى ءۇشىن بولەك كىرەبەرىستەر، سونداي-اق بولەك سپورت زالدارى، اسحانالار ورناتىلادى
اۋىر ريۋكزاكتار ماسەلەسىن شەشۋ ءۇشىن مەكتەپتەردە وقۋلىقتاردى ساقتاۋعا ارنالعان بولەك شكافتار ورناتىلادى. جەدەلساتى، ەلەكتروندى كىتاپحانا جانە حوككەي كورتى دا پايدا بولادى. ءار قاباتتا پايدالى دەمالىس ءۇشىن كوۆوركينگ-ايماقتار جانە اۋىز سۋ بۇرقاقتارى ورناتىلادى
ەڭ باستىسى، مەكتەپتەردە Face ID جانە QR-كودتاردى قوسا العاندا، ەسىكتەردى اۆتوماتتى تۇردە قۇلىپتاۋمەن كىرۋ جانە شىعۋدى باقىلاۋ جۇيەسىن ەنگىزۋ جوسپارلانۋدا. مەكتەپ اكىمشىلىگى بۇكىل عيمارات پەن مەكتەپ اۋماعىنداعى جاعدايدى ناقتى رەجيمدە قاداعالاپ وتىرۋى ءۇشىن مىندەتتى تۇردە بەينەباقىلاۋ جۇرگىزىلەتىن بولادى
ايتا كەتەيىك، "جايلى مەكتەپ" ۇلتتىق جوباسىن قازاقستان ۇكىمەتى 2022 جىلى پرەزيدەنتتىڭ "ءادىل مەملەكەت. ءبىرتۇتاس ۇلت. گۇلدەنگەن قوعام" جولداۋىن ىسكە اسىرۋ اياسىندا قابىلدادى. جوبانىڭ باستى ماقساتى - اپاتتى نىسانداردى، ءۇش اۋىسىمدى وقىتۋدى جانە ورتا ءبىلىم بەرۋ ۇيىمدارىنداعى وقۋشى ورىندارىنىڭ تاپشىلىعىن جويۋ. رەسپۋبليكا بويىنشا الداعى 2 جىلدا بارلىعى 401 مەكتەپ سالۋ جوسپارلانۋدا. ۇلتتىق جوبانىڭ وپەراتورى "Samruk-Kazyna Construction"اق بولىپ تابىلادى.