بوستاندىق اۋدانىنىڭ تۇرعىندارىنىڭ ۇسىنعان بۇل جوبا – جاياۋ جۇرگىنشىلەرگە باسىمدىق بەرىپ، جايلى دا ءقاۋىپسىز ورتا قۇرۋدى كوزدەيتىن قازىرگى ۋربانيستيكانىڭ تالاپتارىن نەگىزگە الىپ جاسالماق، دەپ حابارلايدى aqshamnews.kz
اۋدان اكىمدىگى مەن وڭىرلىك كوممۋنيكاسيالار قىزمەتى ۇيىمداستىرعان باسپا ءسوز تۋرى بارىسىندا اۋدان اكىمى سانجار ءالين بۇل اۋماق اباتتانعان ايماق قانا ەمەس، بارلىق جاستاعىلارعا ارنالعان قولايلى ءارى ءقاۋىپسىز قوعامدىق كەڭىستىك بولارىن اتاپ ءوتتى.
اباتتاندىرۋ يدەياسىنىڭ اۆتورى - اۋدان تۇرعىنى ايمان بەكبەرگەنوۆا. ول 2024 جىلى وسى اۋماقتى «حالىق قاتىساتىن بيۋدجەت» باعدارلاماسىنا قوسۋدى ۇسىنعان. بۇعان دەيىن بۇل جەردىڭ ينفراقۇرىلىمى ابدەن ەسكىرىپ، زامان تالابىنا ساي كەلمەيتىن. جاياۋ جۇرگىنشىلەر مەن ۆەلوسيپەد جولدارى قيىلىسىپ جاتتى، تروتۋارلارى تار، قولايسىز بولدى، ايالدامادا دا ادام اينالىپ جۇرە المايتىن. مۇنىڭ ءبارى قولايسىزدىق تۋدىرىپ، سەرۋەندەۋگە، دەمالىپ، ءقاۋىپسىز قاتىناۋعا كەدەرگى كەلتىردى. كورشىلەردىڭ قولداۋىنىڭ ارقاسىندا جوبا قارجىلاندىرىلىپ، اقىرى وسىنداي جوبا دۇنيەگە كەلىپتى.
«ادامدار ۆەلوجولمەن جۇرەتىن، تروتۋار تار، ايالدامادا ەشقانداي جاعداي جاسالماعان. ءبىز مۇنى وزگەرتۋ كەرەك دەدىك. كورشىلەرمەن بىرىگىپ، ءوتىنىش بەردىك سوسىن. ەندى كوشەنىڭ قالاي وزگەرىپ جاتقانىن كورىپ وتىرمىز»، – دەيدى جوبانىڭ باستاماشىسى ايمان بەكبەرگەنوۆا.
جاياۋ جۇرگىنشىلەر ايماعى «ادامدارعا ارنالعان قالالىق كوشە» قاعيداتتارىنا ساي جاسالىپ، تروتۋاردى كەڭ ەتىپ، ۆەلوجولاق سالىپ، دەمالىس ورىندارى مەن كوگالداندىرۋ دا كوزدەلگەن. اۋماق تولىق تازارتىلىپ، ەسكى قۇرىلىمدار بۇزىلدى، ينجەنەرلىك جۇمىستار جۇرگىزىلىپ، جاڭا جابىن توسەلىپ جاتىر. شەشىم قابىلداۋعا تۇرعىنداردىڭ ءوزى قاتىسىپ، ولاردىڭ ءوتىنىشى تۇگەل ەسكەرىلدى.
«ءبىز بۇل جەردە كوپ جىلدان بەرى تۇرامىز. تورايعىروۆ كوشەسى ىڭعايلى ءارى ادەمى بولعانىن ارمانداپ كەلدىك. ەندى مۇندا ورىندىق، كولەڭكەلى شاتىر قويىپ، كوگالداندىرىپ، اتكەنشەك، جارىق قويىپ، كامەرا دا ورناتتى. بۇل ەندى جاي تروتۋار ەمەس، ۋاقىت وتكىزىپ، دەمالاتىن جەر دە بولادى»، – دەيدى ايمان بەكبەرگەنوۆا.
جوبادا مىنا ەلەمەنتتەر قولعا الىنعان:
• تاكتيلدى پليتكالارمەن جابدىقتالعان كەڭ تروتۋارلار،
• اعاش پەرگولالارى بار دەمالىس ايماقتارى،
• بالالاردىڭ ويىن الاڭى،
• جاستارعا ارنالعان ۆوركاۋت الاڭى،
• اۆتوماتتى سۋارۋ جۇيەسى،
• 1500-دەن استام بۇتا مەن 500-گە جۋىق اعاش ەگۋ،
• «ءقاۋىپسىز كوشە» تۇجىرىمداماسى اياسىندا جارىقتاندىرىپ، كامەرا ورناتۋ.
ۆەلوجولاقتار سالۋ دا جوسپارلانعانىمەن، جاياۋ جۇرگىنشىلەرگە باسىمدىق بەرىلەدى.
«جاياۋ جۇرگىنشىلەر ايماعى 4،2 گەكتاردان استام اۋماقتى قامتيدى. بۇرىن بۇل اۋماق قالا تۇرعىندارىنا جايسىزداۋ بولاتىن: دەمالۋعا ارنالعان ورىندىقتارى، بالالار الاڭى بولعان جوق، تروتۋارلارى تار ءارى ىڭعايسىز، كوگال دا جوقتىڭ قاسى ەدى»، - دەپ قوستى اۋدان اكىمى.
نەگىزگى جۇمىستاردى 2025 جىلدىڭ قازان ايىنىڭ سوڭىنا دەيىن اياقتاۋ جوسپارلانعان. بۇل جاياۋ جۇرگىنشىلەر ايماعى جايلى باعىت قانا ەمەس، تۇرعىنداردى تارتىپ تۇراتىن جەر بولىپ، قالالىق ورتانى تۇرعىندار ءوز كۇشىمەن قالاي وزگەرەتە الاتىنىنا جارقىن مىسال بولىپ قالماق.