جاريا تۇردە وتەتىن تالقىلاۋعا كىمدەر قاتىساتىنى بەلگىلى بولدى.
22 تامىزدا الماتى وبلىسى جامبىل اۋدانى ۇلكەن اۋىلىندا اتوم ەلەكتر ستانسياسىن سالۋ ماسەلەسى بويىنشا كوپشىلىكتىڭ قاتىسۋىمەن تالقىلاۋ وتەدى، دەپ حابارلايدى Almaty-akshamy.kz
«قازاقستاندىق اتوم ەلەكتر ستانسيالارى» ج ش س جۇرگىزگەن زەرتتەۋ قورىتىندىسىنا سايكەس، اەس سالۋعا ەڭ قولايلى ورىن رەتىندە ۇلكەن اۋىلى (الماتى وبلىسى جامبىل اۋدانى) اۋماعى ۇسىنىلدى. زەرتتەۋ ناتيجەسى 2022 جىلدىڭ مامىرىندا ق ر اتوم سالاسىن دامىتۋ جونىندەگى ۆەدومستۆوارالىق كوميسسيانىڭ وتىرىسىندا قارالدى جانە ماقۇلداندى.
«اتوم ەنەرگياسىن پايدالانۋ تۋرالى» زاڭنىڭ 12-بابىنا سايكەس ۇكىمەتتىڭ اەس سالاتىن اۋداندى تاڭداۋ تۋرالى ءتيىستى شەشىمىن قابىلداۋ ءۇشىن اۋماعىندا قوندىرعى سالۋ جوسپارلانىپ وتىرعان جەرگىلىكتى وكىلدى ورگانداردىڭ (ءماسليحاتتىڭ) كەلىسىمى تالاپ ەتىلەدى. وسىعان بايلانىستى الماتى وبلىسى جامبىل اۋدانىنىڭ اكىمدىگى تۇرعىنداردىڭ ءوز اۋماعىندا اەس سالۋ ماسەلەسىنە قاتىناسىن انىقتاۋ ماقساتىندا وسى تالقىلاۋلارعا باستاماشىلىق جاسادى.
تىڭداۋلاردا ەكولوگيا، دەنساۋلىق، تابيعي-كليماتتىق فاكتورلاردىڭ اەس-كە اسەرى، ەكونوميكالىق فاكتورلار، ينفراقۇرىلىمدى دامىتۋ، اەس-تىڭ شاعىن جانە ورتا بيزنەستى دامىتۋعا اسەرى، سونداي-اق باسقا دا وزەكتى ماسەلەلەردى تالقىلاۋ جوسپارلانۋدا.
تىڭداۋعا حالىق، ب ا ق وكىلدەرى، الماتى وبلىسىنىڭ قوعامدىق كەڭەسى، ەنەرگەتيكا مينيسترلىگى، الماتى وبلىسىنىڭ اكىمدىگى، «ۇلتتىق يادرولىق ورتالىعى» رمك، «يادرولىق فيزيكا ينستيتۋتى» رمك، «قازاقستاندىق اتوم ەلەكتر ستانسيالارى» ج ش س، يادرولىق تەحنولوگيالار قاۋىپسىزدىگىنىڭ عىلىمي-تەحنيكالىق ورتالىعى، قازاقستاننىڭ يادرولىق قوعامى جانە ەكولوگيا، سەيسميكا، قاۋىپسىزدىك، ەنەرگەتيكا، ينفراقۇرىلىم، شوب جانە ت.ب. سالالارداعى سالالىق ساراپشىلار قاتىسادى.
تىڭداۋ بارىسىندا ازاماتتار تەحنولوگيالاردىڭ قاۋىپسىزدىگى بويىنشا، اەس قۇرىلىسىنىڭ الەۋمەتتىك-ەكونوميكالىق اسپەكتىلەرى بويىنشا وزدەرىن الاڭداتقان كەز كەلگەن سۇراعىن قويا الادى.
بۇل جاريا تالقىلاۋ ق ر ەكولوگيالىق كودەكسىنە سايكەس وتكىزىلەتىن قوعامدىق تىڭداۋ ەمەس. قوعامدىق تىڭداۋلار جوبالىق قۇجاتتامانى ازىرلەگەننەن كەيىن جوبانى ەكولوگيالىق باعالاۋ كەزەڭدەرىندە – كەيىنىرەك وتكىزىلۋگە ءتيىس، – دەلىنگەن ەنەرگەتيكا مينيسترلىگىنىڭ حابارلاماسىندا.
ەلدەگى العاشقى اەس سالۋعا ۇمىتكەر كومپانيالاردىڭ ءتىزىمى جاسالدى:
HPR-1000 جۇڭگو كومپانياسى – CNNC؛
APR-1400 رەاكتورى بار كورەي كومپانياسى – KHNP؛
ۆۆەر-1200 جانە ۆۆەر-1000 رەاكتورلارى بار رەسەي كومپانياسى – روساتوم؛
EPR-1200 رەاكتورى بار فرانسۋز كومپانياسى – EDF.
ەسكە سالايىق، قازاقستاندا اەس سالۋ ماسەلەسى بويىنشا رەفەرەندۋم وتپەيدى. بۇل تۋرالى ەنەرگەتيكا ۆيسە-مينيسترى جاندوس نۇرماعامبەتوۆ ايتتى.
رەفەرەندۋم بولمايدى. بۇل ماسەلە رەفەرەندۋمعا شىعارىلمايدى. بىرىنشىدەن، الاڭنىڭ ورنالاسقان جەرىنە قاتىستى سۇراق بار. ەكىنشىدەن، ەڭ باستىسى – تەحنولوگيا جانە قارجىلىق-ەكونوميكالىق مودەل. ول قالاي اسەر ەتەدى، ءبىز مۇنى قالاي جۇزەگە اسىرامىز؟ بۇل جونىندە ماسەلە بار، - دەدى ۆيسە-مينيستر.
جوسپارعا سايكەس، اەس قۇرىلىس-مونتاج جۇمىستارى 2034 جىلى اياقتالىپ، 2035 جىلى ستانسيا پايدالانۋعا بەرىلۋگە ءتيىس.