«شاعىن ەلەكتر كولىك قۇرالى» ۇعىمى ەنگىزىلەدى
ۇكىمەت باسشىسىنىڭ ورىنباسارى رومان سكليار ەلەكتروساموكاتتاردى جىكتەۋگە جانە قۇقىقتىق رەتتەۋگە قاتىستى تۇسىنىك بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
ايتا كەتەيىك، بيىل قازان ايىندا سەناتتىڭ جالپى وتىرىسىندا دەپۋتات نۇرتورە ءجۇسىپ ءوزىنىڭ دەپۋتاتتىق ساۋالىندا جول قاۋىپسىزدىگى ماسەلەسىن كوتەردى.
وسى ورايدا ەلەكتروساموكاتتار، ساموكاتتار مەن گيروسكۋتەرلەر تەك ولاردىڭ يەلەرىنىڭ عانا ەمەس، جاياۋ جۇرگىنشىلەردىڭ دە ءومىرى مەن دەنساۋلىعىنا ەلەۋلى ءقاۋىپ توندىرەتىنى ايتىلدى.
«كەدەندىك باقىلاۋ اياسىندا تەحنيكالىق رەگلامەنتتەر مەن ستاندارتتارعا سايكەس كەلمەيتىن ەلەكتروساموكاتتاردىڭ ەلگە اكەلىنۋىن شەكتەۋدى ەنگىزۋ ءۇشىن ەۋرازيالىق ەكونوميكالىق وداق اۋقىمىندا تەحنيكالىق رەگلامەنتكە ءتيىستى تولىقتىرۋلاردى كوزدەۋ قاجەت. وسىعان بايلانىستى، بيىلعى 17 تامىزدا ەۋرازيالىق ەكونوميكالىق كوميسسياعا (ەەك) «ماشينالار مەن جابدىقتاردىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتى اياسىندا رەتتەۋ ءۇشىن ەلەكتر ساموكاتتارىن قوسۋ بويىنشا ۇسىنىس ەنگىزىلدى. اتالعان ماسەلە مۇددەلى تاراپتاردىڭ قاتىسۋىمەن ەەك الاڭىندا قارالاتىن بولادى»، - دەدى ر. سكليار دەپۋتاتتىق ساۋالعا جاۋاپ بەرە وتىرىپ.
ونىڭ ايتۋىنشا، ءتيىستى ۇلتتىق ستاندارتتاردى ازىرلەۋ تەحنيكالىق رەگلامەنت جاڭارعاننان كەيىن جۇرگىزىلەتىن بولادى.
سونداي-اق ەلەكتروساموكاتتاردى قۇقىقتىق رەتتەۋ ءۇشىن قازىرگى تاڭدا ق ر پارلامەنتى ءماجىلىسى دەپۋتاتتارىنىڭ باستاماشىلىعىمەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسىن ۇيىمداستىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ازىرلەنگەن.
«وسى زاڭ جوباسى ەلەكتروساموكاتتاردىڭ جول جۇرىسىنە قاتىسۋىن رەگلامەنتتەۋ، «شاعىن ەلەكتر كولىك قۇرالى» ۇعىمىن ەنگىزۋ، سونداي-اق وسى قۇرالداردى باسقاراتىنداردىڭ قۇقىقتارى مەن مىندەتتەرىن بەلگىلەۋ بولىگىندە تۇزەتۋلەردى كوزدەيدى. قازىرگى ۋاقىتتا مۇددەلى مەملەكەتتىك ورگاندار وسى زاڭ جوباسىنا ۇكىمەت قورىتىندىسىنىڭ جوباسىن ازىرلەۋدە. كورسەتىلگەن اكتىلەردى قابىلداۋ ەلەكتروساموكاتتاردى پايدالانۋ ماسەلەلەرىن قۇقىقتىق رەتتەۋدى قامتاماسىز ەتەدى»، - دەدى رومان سكليار.