پرەزيدەنت ساۋد ارابياسى قازاقستاننىڭ يسلام جانە اراب الەمىندەگى نەگىزگى ستراتەگيالىق سەرىكتەسى ەكەنىن ايتتى.
قاسىم-جومارت توقايەۆ ساۋد ارابياسىنىڭ تاق مۇراگەرى مۇحاممەد بەن سالمان ءال ساۋدپەن كەزدەستى، دەپ حابارلايدى Almaty-akshamy.kz
اقوردانىڭ باسپا ءسوز قىزمەتىنىڭ حابارلاۋىنشا، پرەزيدەنت قاسىم-جومارت توقايەۆ ساۋد ارابياسىنىڭ تاق مۇراگەرى، پرەمەر-مينيسترى مۇحاممەد بەن سالمان بەن ابدەلازيز ءال ساۋدقا ءىلتيپات بىلدىرە وتىرىپ، "ورتالىق ازيا + شىعاناقتاعى اراب مەملەكەتتەرىنىڭ ىنتىماقتاستىق كەڭەسى" اتتى مەملەكەتتەر باسشىلارىنىڭ ءبىرىنشى سامميتىنە قاتىسۋعا شاقىرعانى جانە قوناقجايلىق كورسەتكەنى ءۇشىن العىس ايتتى.
قاسىم-جومارت توقايەۆ ساۋد ارابياسى قازاقستاننىڭ يسلام جانە اراب الەمىندەگى نەگىزگى ستراتەگيالىق سەرىكتەسى ەكەنىن ايتتى.
كەزدەسۋ بارىسىندا ساۋدا-ەكونوميكا، ينۆەستيسيا، ەنەرگەتيكا، "جاسىل" ەنەرگەتيكا، تۋريزم، اۋىل شارۋاشىلىعى جانە كولىك-لوگيستيكا سالالارىنداعى ىنتىماقتاستىق ماسەلەلەرى قاراستىرىلدى.
ءوز كەزەگىندە تاق مۇراگەرى مۇحاممەد بەن سالمان بەن ابدەلازيز ءال ساۋد قازاقستان ساۋد ارابياسىنىڭ ورتالىق ازيا ايماعىنداعى ماڭىزدى ءارى سەنىمدى سەرىكتەسى ەكەنىن اتاپ ءوتتى.
ونىڭ ايتۋىنشا، ساۋدا-ەكونوميكالىق جانە ينۆەستيسيالىق بايلانىستاردى ودان ءارى دامىتىپ، نىعايتۋ ءۇشىن مول الەۋەت بار. سونداي-اق ول ەكىجاقتى قاتىناستاردى جاڭا دەڭگەيگە كوتەرۋ ءۇشىن كۇش سالۋعا نيەتتى ەكەنىن جەتكىزدى.