مەملەكەت باسشىسى قاسىم-جومارت توقايەۆ "Turkistan" گازەتىنە بەرگەن سۇحباتىندا سالىق رەفورماسىنا قاتىستى پىكىر ءبىلدىرىپ، قوعامدا دۇربەلەڭ تۋعىزۋعا نەگىز جوق ەكەنىن ايتتى، - دەپ حابارلايدى اqshamnews.kz ءتىلشىسى.
پرەزيدەنتتىڭ سوزىنشە، مۇنداي وزگەرىستەر كوپتەگەن ەلدە ءجۇرىپ جاتىر، مىسال رەتىندە رەسەيدە قوسىمشا قۇن سالىعىنىڭ 22 پايىزعا دەيىن كوتەرىلگەنىن كەلتىردى.
"ارينە، سالىق رەفورماسى – وزەكتى ماسەلە جانە بۇعان قاتىستى پىكىرتالاستاردىڭ بولۋى ابدەن تۇسىنىكتى. دەگەنمەن، ەل ىشىندە دۇربەلەڭ تۋعىزىپ، جۇرتتى دۇرلىكتىرۋدىڭ ەشقانداي ءجونى جوق. مۇنداي رەفورما كوپتەگەن ەلدە جۇرگىزىلىپ جاتىر. مىسالى، رەسەيدە قوسىمشا قۇن سالىعى جۋىردا 22 پايىزعا دەيىن كوتەرىلدى"، - دەدى مەملەكەت باسشىسى.
سونىمەن قاتار مەملەكەت باسشىسى قوسىمشا قۇن سالىعىنا قاتىستى تالقىلاۋدا بۇرىنعى ۇكىمەتتىڭ دە، قازىرگى ۇكىمەتتىڭ دە مولشەرلەمەنى 20 پايىزعا دەيىن كوتەرۋدى ۇسىنعانىن ەسكە سالدى. الايدا پرەزيدەنت ۇكىمەتكە ونىڭ جوعارعى شەگىن 4 ساتىعا تومەندەتۋ تۋرالى تاپسىرما بەرگەن.
"جاڭا سالىق كودەكسىندە باقىلاۋ جاساۋعا ەمەس، ءوزارا سەرىكتەستىك ورناتۋعا باسا ءمان بەرىلەدى، ياعني، وسى ۇدەرىسكە قاتىسۋشىلاردىڭ ءبارى – مەملەكەت تە، بيزنەس تە، ازاماتتار دا ءوز مىندەتىن ادال ورىنداۋعا ءتيىس. ءبىرىن-بىرى ءوزارا تولىقتىرىپ تۇراتىن مۇنداي جۇيەدە سالىق تولەۋ اۋىرتپالىق رەتىندە قابىلدانبايتىن بولادى. تۇپتەپ كەلگەندە، سالىق تولەۋ دەگەنىمىز – زاماناۋي قوعامدىق كەلىسىمشارت دەگەن ءسوز. سالىق تولەسەڭىز – قىزمەت كورسەتىلەدى، ينفراقۇرىلىم سالىنادى، ءقاۋىپسىز ورتا قالىپتاسادى، تىڭ مۇمكىندىكتەر پايدا بولادى. كەرەك دەسەڭىز، بۇل – ادىلدىك بولۋ ءۇشىن جۇكتەمەنى قايتا ءبولۋ قۇرالى، الەۋمەتتىك تۇرعىدان السىزدەردى قولداۋ جانە ەكونوميكالىق تۇرعىدان «بەلسەندى ورتانى» ودان ءارى دامىتۋ ءتاسىلى"، - دەدى ول.
سونداي-اق مەملەكەت باسشىسى فيسكالدىق ساياساتتىڭ تيىمدىلىگى ونى جۇرگىزۋدىڭ ساپاسىنا، قوعامنىڭ سالىق ساۋاتىنا جانە سانا-سەزىمىنە بايلانىستى ەكەنىن ايتىپ، سالىق تولەۋ مادەنيەتى قالىپتاسۋى كەرەكتىگىن اتاپ ءوتتى. پرەزيدەنت سالىق تولەۋدى وتانشىلدىقتىڭ وزىق ۇلگىسىنە تەڭەپ، بۇل سىبايلاس جەمقورلىققا قارسى قوعام قۇرۋعا ىقپال ەتەتىنىن ايتتى.