پرەزيدەنت قاسىم-جومارت توقايەۆ Turkistan گازەتىنە بەرگەن سۇحباتىندا جاڭا جىل قارساڭىندا كرەملدە قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ رەسەي پرەزيدەنتى ۆلاديمير پۋتينمەن كەزدەسۋى جونىندە پىكىر ءبىلدىردى، - دەپ حابارلايدى aqshamnews.kz ءتىلشىسى.
سۇحبات بارىسىندا جۋرناليست بۇل كەزدەسۋگە قاتىستى ءتۇرلى پىكىرلەر مەن قاۋەسەتتەردىڭ تاراعانىن اتاپ ءوتتى. ءتىپتى 2029 جىلى قازاقستانداعى بيلىك ءترانزيتى تالقىلانعانى، ال نازاربايەۆتىڭ بۇل ۇدەرىستە شەشۋشى ءرول اتقارعىسى كەلەتىنى، ارينە، ءپۋتيننىڭ جەكە قولداۋىمەن جۇزەگە اسۋى مۇمكىن ەكەنى جونىندە اڭگىمەلەر ايتىلىپ جۇرگەنىن جەتكىزدى.
"تۇراقتى تۇردە وتكىزىلىپ جۇرگەن كەزدەسۋلەر بەيرەسمي سيپاتقا يە. مۇنى رەسەي پرەزيدەنتىنىڭ ءوزى دە اتاپ وتەدى. تاياۋدا وتكەن سانكت-پەتەربۋرگتەگى باسقوسۋدا ۆلاديمير پۋتين ماعان نۇرسۇلتان نازاربايەۆتى ونىڭ ءوتىنىپ سۇراۋى بويىنشا قابىلدايتىنىن ايتقان ەدى. رەسەي پرەزيدەنتىنىڭ ەرەكشەلىگى: ول دوستارىمەن جانە ارىپتەستەرىمەن جىلى قارىم-قاتىناس قۇرا بىلەدى. جۇمىسى وتە قاربالاس بولسا دا، سەنبى كۇنى قازاقستاننىڭ تۇڭعىش پرەزيدەنتىمەن اسىقپاي اڭگىمەلەسۋگە ۋاقىتىن ءبولدى. ول نۇرسۇلتان نازاربايەۆتى ەۋرازياداعى ىقپالداستىق ۇدەرىسىنىڭ باستاۋىندا تۇرعان تاجىريبەلى ساياساتكەر رەتىندە باعالايدى. رەسەي بۇل ۇدەرىستە جەتەكشى ءرول اتقارىپ وتىر. كرەملدەگى كەزدەسۋ ۆلاديمير ءپۋتيننىڭ ادامگەرشىلىگى جوعارى ەكەنىن كورسەتەدى.
ونداي اڭگىمەلەر بارىسىندا نە ايتىلعانى ماعان قىزىق ەمەس، بۇل تۋرالى ەشقاشان سۇراق قويمايمىن.
ال نۇرسۇلتان نازاربايەۆتىڭ جەكە باسىنا كەلەر بولساق، مەن ونى قازىرگى قازاق مەملەكەتتىگىنىڭ نەگىزىن قالاعان تۇلعا دەپ سانايتىنىمدى بىرنەشە رەت ايتتىم. ونىڭ مەملەكەتتىك ينستيتۋتتاردى جانە ەكونوميكانىڭ نارىقتىق تەتىكتەرىن قۇرۋ، جاڭا استانامىزدى سالۋ جولىنداعى ەڭبەگىن ءبارى بىلەدى. وزىڭىزگە ءمالىم، ءبىز قازاقستاندى ادىلدىك، زاڭ جانە ءتارتىپ ورناعان ەل ەتكىمىز كەلەدى. سوندىقتان ەشكىمدى الالاماي، ءار ازاماتتىڭ ەڭبەگىن ءادىل باعالاۋ كەرەك. بۇل ەلىمىزدىڭ تۇڭعىش پرەزيدەنتى نۇرسۇلتان نازاربايەۆقا دا قاتىستى"، - دەدى پرەزيدەنت.
ال بيلىك ءترانزيتى تۋرالى سۇراققا قاسىم-جومارت توقايەۆ بىلاي جاۋاپ بەرگەن: "بۇل جونىندە ءسوز قوزعاۋعا ءالى ەرتە، الدىمىزدا تاباندى جۇمىسقا تولى بىرنەشە جىل بار".