قازاقستان – زايىرلى مەملەكەت.
قازاقستان پرەزيدەنتى قاسىم-جومارت توقايەۆ جاستارعا دۇرىس باعىت-باعدار بەرۋ اسا ماڭىزدى ەكەنىن اتاپ ءوتتى. بۇل تۋرالى مەملەكەت پرەزيدەنتى اتىراۋ وبلىسى جۇرتشىلىعىمەن كەزدەسۋ بارىسىندا ايتتى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپ.
«اتىراۋ – قازاق ەلىنىڭ ەۋروپاعا شىعار قاقپاسى. ۇلى جىبەك جولىنىڭ سولتۇستىك تارماعى وسى ولكە ارقىلى وتكەنى تاريحتان بەلگىلى. قالا ورتالىعىنداعى كوپىر ازيا مەن ەۋروپانى جالعاپ تۇر. مۇنىڭ زور سيمۆولدىق ءمانى بار. ءبىر سوزبەن ايتقاندا، ەلىمىز ءتۇرلى وركەنيەتتەر توعىسقان توعىز جولدىڭ تورابىندا ورنالاسقان. سوندىقتان، قازاقتىڭ جەرىن ەجەلگى زاماننان ءتۇرلى ءدىني نانىم وكىلدەرى مەكەندەگەن. حالقىمىز ءدىني ۇستانىمىنا قاراپ ەشكىمدى كەمسىتپەگەن. ءبارى تاتۋلىقتا ءومىر سۇرگەن. مەن مۇنى بەكەرگە ايتىپ وتىرعان جوقپىن. ءقازىر جەر جۇزىندە بولىپ جاتقان ءتۇرلى قاقتىعىستاردىڭ نەگىزگى سەبەپتەرىنىڭ ءبىرى – ءدىني الاۋىزدىق. ءبىز ەلىمىزدە تىنىشتىق پەن تۇراقتىلىق بولعانىن تىلەيمىز»، - دەدى توقايەۆ سەيسەنبىدەگى اتىراۋ وبلىسى جۇرتشىلىعىمەن كەزدەسۋىندە.
ول اتاپ وتكەندەي، قازاقستان – زايىرلى مەملەكەت.
«كونستيتۋسيامىزدا ءدىن بوستاندىعىنا كەپىلدىك بەرىلگەن. ءبىراق، زايىرلى جانە ءتوزىمدى، تولەرانتتى بولۋ دەگەنىمىز بارىنە كوز جۇما قاراپ، جايباراقات وتىرۋ دەگەن ءسوز ەمەس. ءبىز ەلدىڭ قاۋىپسىزدىگى مەن تۇتاستىعىنا نۇقسان كەلتىرۋگە ەشقاشان جول بەرمەيمىز. راديكالدى اعىمدار مەن ءدىني سەپاراتيزمگە ورتامىزدا ورىن جوق. بابالارىمىز عاسىرلار بويى يسلام ءدىنىن ۇستانعان. شاريعاتتىڭ شارتتارى مەن حالقىمىزدىڭ ادەت-عۇرپى ۇندەسكەن ءداستۇرلى اتا ءدىنىمىز بار. ونىڭ اسىل قۇندىلىقتارى وسى كۇنگە دەيىن ۇلتىمىزدى ۇيىستىرىپ، بىرلىگىمىزدى بەكەمدەپ كەلەدى. اتا جولىن ساقتاپ، ءدىنىمىز بەن ءسالت-داستۇرىمىزدى بەرىك ۇستاۋ – ءبىزدىڭ پەرزەنتتىك پارىزىمىز. وسى ورايدا، جاستارعا دۇرىس باعىت-باعدار بەرۋ اسا ماڭىزدى»، - دەدى مەملەكەت باسشىسى.