قور 10 قايىرىمدىلىق باعدارلاما مەن جوبانى جۇزەگە اسىرىپ جاتىر
مەملەكەت باسشىسى قاسىم-جومارت توقايەۆ "قازاقستان حالقىنا" قورىنىڭ ءتوراعاسى بولات جامىشيەۆتى قابىلدادى، دەپ حابارلايدى Almaty-akshamy.kz اقوردا سايتىنا سىلتەمە جاساپ.
پرەزيدەنتكە قوردىڭ ازاماتتارعا كورسەتكەن كومەگى بويىنشا ەسەبى، سونداي-اق قايىرىمدىلىق قىزمەتتى ۇيىمداستىرۋ جولدارى جونىندە اقپارات بەرىلدى.
بولات جامىشيەۆتىڭ ايتۋىنشا، قازىرگى تاڭدا قور 10 قايىرىمدىلىق باعدارلاما مەن جوبانى جۇزەگە اسىرىپ جاتىر. اتاپ ايتقاندا، ولاردىڭ سەگىزى مەديسينالىق كومەك كورسەتۋگە، بىرەۋى اۋىل بالالارى ءۇشىن سپورت سالاسىنداعى الەۋمەتتىك جاعدايدى جاقسارتۋعا باعىتتالسا، تاعى ءبىرى اۋىلدىق جەرلەردەن شىققان تالاپكەرلەر مەن از قامتىلعان وتباسىلاردىڭ ستۋدەنت بالالارىنا ءبىلىم گرانتتارىن بەرۋدى قاراستىرادى.
قاسىم-جومارت توقايەۆ قوردىڭ ماقساتتى باعىتتارىن انىقتاۋعا قوعام مەن قوعامدىق ينستيتۋتتاردى بەلسەندى تۇردە تارتۋ قاجەت ەكەنىنە باسا ءمان بەردى.
بولات جامىشيەۆتىڭ ايتۋىنشا، قور جاڭادان تولىقتىرىلعان تۇجىرىمدامانى جانە قايىرىمدىلىق باعىتىنداعى باعدارلامالار مەن جوبالار ازىرلەۋدى قولعا الدى. بۇل جۇمىسقا كوممەرسيالىق ەمەس سەكتوردىڭ وكىلدەرى، ءماسليحات دەپۋتاتتارى، قور مەسەناتتارى بولىپ تابىلاتىن بيزنەس وكىلدەرى مەن ساراپشىلار كەڭىنەن تارتىلادى.
قور ءتوراعاسىنىڭ ايتۋىنشا، بارلىق اتقارىلىپ جاتقان جۇمىستار تۋرالى تولىق اقپارات قوعام نازارىنا ۇسىنىلادى. قىركۇيەك ايىندا وتەتىن ۇلتتىق قايىرىمدىلىق كونفەرەنسياسى وسى ۋاقىت ارالىعىندا اتقارىلعان جۇمىستىڭ قورىتىندى ەسەبى بولماق.