دارىگەرلەر قاجىلىققا باراتىنداردى مەنينگوكوكقا قارسى ەكپە الۋعا شاقىردى

بەس ايدا مەنينگوكوكك ينفەكسياسىنىڭ تەك 11 جاعدايى انىقتالدى

قازاقستان دارىگەرلەرى قاجىلىققا نيەتتەنگەن ازاماتتاردى ساپار الدىندا مەنينگوكوكك ينفەكسياسىنا قارسى ەكپە الۋعا شاقىردى، دەپ حابارلايدى Almaty-akshamy.kz قازاقپاراتقا سىلتەمە جاساپ.

ءمالىم ەتىلگەندەي، قاجىلىقتان ورالعانداردىڭ اتالعان ىندەتتى ەلگە اكەلۋ ءقاۋپى بار.

2020 جانە 2021 جىلدارى كىشى جانە ۇلكەن قاجىلىققا نيەتتەنگەندەر كوروناۆيرۋس پاندەمياسىنان بۇل ءراسىمدى ورىنداۋدان باس تارتۋعا ءماجبۇر بولدى.

سانيتاريالىق-ەپيدەميولوگيالىق ساراپتاما جانە مونيتورينگ عىلىمي-پراكتيكالىق ورتالىعىنىڭ ديرەكتورى ايناگۇل قۋاتبايەۆانىڭ ايتۋىنشا، مەنينگوكوكك جۇقپاسىنىڭ ءورشۋى 2000 جىلى بولدى. ول ۋاقىتتا قاجىلىققا بارعان 18 ەلدىڭ ازاماتتارىنان جانە ولاردىڭ جاقىندارىنان مەنينگوكوكك ينفەكسياسىنىڭ 400-دەن استام وقيعاسى انىقتالدى.

«2018 جىلى ەلدە مەنينگوكوكك ينفەكسياسى تىركەلدى. وندا رەسمي ستاتيستيكا بويىنشا 96 ادام ىندەت جۇقتىردى، ونىڭ 45ء-ى – 18 جاسقا دەيىنگى بالالار. ياعني قاجى تەك ءوزىنىڭ دەنساۋلىعىنا ەمەس، سونىمەن بىرگە وتباسىنىڭ، دوستارىنىڭ، ارىپتەستەرىنىڭ، تۋىستارىنىڭ دەنساۋلىعىنا دا ءقاۋىپ توندىرەدى. قاجىلىققا باراتىن ەر ادامدار اراسىندا ينفەكسيا جۇقتىرۋ 86% دەيىن جەتەدى»،- دەدى دارىگەر.

سپيكەردىڭ سوزىنشە، بيىل ەپيدەميولوگيالىق احۋال قولايلى. بەس ايدا مەنينگوكوكك ينفەكسياسىنىڭ تەك 11 جاعدايى انىقتالدى.

2006 جىلدان بەرى قازاقستان مۇسىلماندارى ءدىني باسقارماسى مەن ساۋد ارابياسىنىڭ قاجىلىق مينيسترلىگى اراسىندا كەلىسىم بار. وعان سايكەس قاجىلار ەلدەن شىقپاس بۇرىن مىندەتتى تۇردە مەنينگوكوكقا قارسى ەكپە الۋى ءتيىس. 2022 جىلى ۆاكسيناسيانى ەلىمىزدىڭ سەگىز وڭىرىندە – اتىراۋ، جامبىل، قاراعاندى، قىزىلوردا، ماڭعىستاۋ وبلىستارىندا، سونداي-اق نۇر-سۇلتان، الماتى جانە شىمكەنت قالالارىندا جۇرگىزۋ جوسپارلانعان.

ايتا كەتەيىك، بۇل ينفەكسياعا قارسى ەكپە اقىلى، قۇنى 26 – 46 مىڭ تەڭگە ارالىعىندا.

قاجىلىققا بارۋعا COVID-19 قارسى ۆاكسينالانعان 65 جاسقا دەيىنگى ادامدارعا رۇقسات ەتىلەدى.
ەسكە سالايىق، بيىل ساۋد ارابياسى ەلىمىزدەن 3 مىڭ ادامعا قاجىلىق پارىزدى وتەۋگە رۇقسات بەرگەنىن جازعان بولاتىنبىز.
ق ر مادەنيەت جانە سپورت مينيسترلىگىنىڭ مالىمەتىنە سايكەس، 3 مىڭ كۆوتا كونكۋرس تالاپتارىنا سايكەس كەلگەن 14 تۋروپەراتور اراسىندا ءبولىندى.