قازاقستان – كۇللى قازاقتىڭ تاريحي وتانى جانە ۇلتارالىق كەلىسىمنىڭ جارقىن ۇلگىسى
قازاقستان پرەزيدەنتى قاسىم-جومارت توقايەۆ قازاقستان حالقى اسسامبلەياسىنىڭ ءحححىV سەسسياسىندا سويلەگەن سوزىندە ەل بىرلىگىنىڭ كوپقاباتتى قۇرىلىمىن ايقىنداي وتىرىپ، قازاقستاننىڭ ىشكى جانە سىرتقى ءبىرتۇتاستىعىن سيپاتتايتىن ماڭىزدى ويلارىمەن ءبولىستى. بۇل تۋرالى Aqshamnews.kz سايتى حابارلايدى.
مەملەكەت باسشىسى الەمنىڭ ءار تۇكپىرىندە تۇرىپ جاتقان قازاق دياسپوراسىنا ەرەكشە توقتالىپ، ولاردىڭ ۇلتتىق بولمىستى ساقتاۋ جولىنداعى تاباندىلىعىنا ريزاشىلىق ءبىلدىردى.
"قازاقستان – تاعدىردىڭ جازۋىمەن شەتتە تۋىپ، شەتتە وسكەن بارشا قازاقتىڭ تاريحي وتانى. شەتەلدەگى قازاقتاردىڭ باسىم كوپشىلىگى انا ءتىلى مەن اتا ءداستۇرىن بەرىك ۇستانىپ كەلەدى. ەل بىرلىگى – ەڭ الدىمەن، كۇللى قازاقتىڭ بىرلىگى"، – دەدى پرەزيدەنت.
ول ەل بىرلىگىنىڭ تاعى ءبىر تىرەگى – قازاقستاندى مەكەندەگەن ءتۇرلى ەتنوستار اراسىنداعى تاتۋلىق ەكەنىن اتاپ ءوتتى. بۇل – قازاقستان قوعامىنىڭ نەگىزگى تۇعىرىنا اينالعان قۇندىلىق.
"ەكىنشىدەن، ەل بىرلىگى – قاسيەتتى قازاق جەرىن مەكەن ەتكەن بارشا ەتنوستىڭ بىرلىگى. ءبىز بۇل تۋرالى ۇنەمى ايتامىز"، – دەدى توقايەۆ.
پرەزيدەنت ەلىمىزدەگى ءدىني مەرەكەلەردىڭ بەيبىت تۇردە اتالىپ ءوتۋى – ۇلتارالىق جانە كونفەسسياارالىق كەلىسىمنىڭ ناقتى كورىنىسى ەكەنىن اتاپ ءوتتى. ول جۋىردا اتالىپ وتكەن پراۆوسلاۆ جانە كاتوليك پاسحاسىن مىسالعا كەلتىرىپ، بۇل وقيعانىڭ ەرەكشە ماعىناعا يە ەكەنىن ايتتى.
"بىرەر كۇن بۇرىن دوستىق پەن بىرلىك رۋحىندا پاسحا مەرەكەسىن اتاپ وتتىك... بيىل پراۆوسلاۆ جانە كاتوليك قاۋىمدارىنىڭ پاسحا مەيرامى قاتار كەلدى. مۇنىڭ سيمۆولدىق ءمانى زور. بۇل – سيرەك قايتالاناتىن قۇبىلىس"، – دەدى مەملەكەت باسشىسى.
سونىمەن قاتار، ەلىمىزدەگى پراۆوسلاۆ شىركەۋىنىڭ ءميتروپوليتى الەكساندر جوعارى مەملەكەتتىك ماراپات – ءى دارەجەلى «دوستىق» وردەنىمەن ماراپاتتالعانىن اتاپ ءوتتى. بۇل مەملەكەت تاراپىنان ءدىني كونفەسسيالارعا دەگەن قۇرمەتتىڭ ايقىن دالەلى.
قاسىم-جومارت توقايەۆ قازاقستانداعى ەتنوسارالىق جانە ءدىنارالىق ۇيلەسىمنىڭ حالىقارالىق دەڭگەيدە جوعارى باعالانىپ وتىرعانىن جەتكىزدى.
"شەتەلدىك قوناقتار قازاقستاندا ءتۇرلى ءسالت-داستۇردىڭ بىر-بىرىمەن ۇيلەسىم تاپقانىنا تاڭ قالادى. بۇل ولار ءۇشىن مۋلتيكۋلتۋراليزم جانە مۋلتيەتنيكالىق تۇجىرىمدامالار توقىراۋعا ۇشىراپ، ءتىپتى، جوققا شىعارىلىپ جاتقان كەزەڭدە قايران قالارلىق قۇبىلىس"، – دەدى ول.
بۇل پىكىرلەر قازاقستاننىڭ ءوز جولى بار، تەڭ قۇقىق پەن تاتۋلىققا نەگىزدەلگەن قوعامدىق ۇلگى قالىپتاستىرىپ وتىرعانىن كورسەتەدى.