پرەزيدەنت كوكشەتاۋ قالاسىنىڭ 2050 جىلعا دەيىنگى باس جوسپارىمەن تانىستى، - دەپ حابارلايدى اqshamnews.kz ءتىلشىسى.
قاسىم-جومارت توقايەۆقا باس جوسپار اياسىندا جىلۋ ەلەكتر ورتالىعى، وبلىستىق كوپبەيىندى اۋرۋحانا، ازاماتتىق قورعانىس اكادەمياسى جانە كوپفۋنكسيونالدى سپورت كەشەنى سالىنىپ جاتقانى جونىندە باياندالدى. بۇدان بولەك، الپىسقا جۋىق ونەركاسىپ كاسىپورنىنا ەسەپتەلگەن يندۋستريالىق ايماقتىڭ نەگىزى قالانۋدا.
وبلىس ورتالىعىنىڭ اۋماعى 7 مىڭ گەكتارعا ۇلعايادى. باس جوسپارداعى ەرەكشە نىساننىڭ ءبىرى – قوپا كولىنىڭ جاعاسىندا بوي كوتەرەتىن زاماناۋي ىسكەرلىك ورتالىق. وندا تۇرعىن ءۇي كەشەندەرى، بيزنەس جانە ساۋدا ورتالىقتارى، الەۋمەتتىك نىساندار مەن قوعامدىق كەڭىستىكتەر ورنالاسادى.
مەجەلى ۋاقىتقا دەيىن قالا حالقىنىڭ سانى 500 مىڭعا جەتەدى دەپ جوسپارلانىپ وتىر. تۇرعىندارعا قولايلى جاعداي جاساۋ ءۇشىن جاڭا قۇرىلىس الاڭدارى جانە رەنوۆاسيا باعدارلاماسى اياسىندا 10 ميلليون شارشى مەترگە جۋىق تۇرعىن ءۇي پايدالانۋعا بەرىلمەك.