الەۋمەتتىك جەلىدە "قايرات" - "اقتوبە" ماچىنا سارى-قارا دەنە ىسقىشپەن (موچالكا) بارىپ، قولداۋ بىلدىرگەن جانكۇيەردىڭ سۋرەتى تارادى. قولداۋشىنىڭ يدەياسى جۇرتتى كۇلكىگە قارىق قىلىپ، لەزدە جۇرت اراسىندا تاراپ كەتتى. "جەلىنى جارعان" جانكۇيەر كىم؟ اqshamnews.kz ءتىلشىسىنىڭ ماتەريالىندا.
"سارى-قارا" ىسقىشتىڭ يەسى كىم؟
جانكۇيەردىڭ ەسىمى - ەرنياز ەرباتىر. ول قبتۋ-دا وقيدى.
دەنە ىسقىشپەن تۇسكەن سۋرەتتىڭ تارالىپ كەتۋى توسىننان بولعان وقيعا. ەرنياز ونى ماچقا بارار الدىندا، جاي عانا دۋشقا ءتۇسۋ ماقساتىندا ساتىپ العان. ءبىراق ارادا بىرنەشە ساعات وتپەي جاتىپ، ونىڭ ستاديوندا تۇسىرگەن سۋرەتى ەلگە تاراپ كەتتى.
"بۇل سارى-قارا ىسقىشتىڭ وقيعاسى مۇلدەم كۇتپەگەن جەردەن بولدى. سول كۇنى جاتتىعۋدان كەيىن دۋشقا تۇسپەك بولىپ، دۇكەنگە كىردىم. جاڭا دەنە ىسقىشتاردىڭ ىشىنەن سارى-قارا ءتۇستىسىن الدىم. ارادا بىرنەشە ساعات وتكەن سوڭ، دوستارىم كەنەتتەن “قايرات” فك مەن “اقتوبە” فك اراسىنداعى ويىنعا شاقىرىپ قالدى. ازەر ۇلگەردىم، كەشىگىپ قالا جازدادىم. ويىن كەزىندە دەنە ىسقىشىمدى شىعارىپ، كوتەرىپ تۇردىم. سول ءساتتى بىرەۋ سۋرەتكە ءتۇسىرىپ الىپتى. ءسويتىپ،سۋرەت اپ-ساتتە بۇكىل قازاقستانعا تاراپ كەتتى. وسىلايشا مەن كۇتپەگەن جەردەن جەلى جۇلدىزىنا اينالدىم"،-دەدى ول سۇحباتتارىنىڭ بىرىندە.
"قايراتتىڭ" جاڭا جانكۇيەرىنىڭ ارمانى قانداي؟
ەرنياز - "قايراتتىڭ" جاڭا جانكۇيەرلەرىنىڭ ءبىرى. ونىڭ ارمانى - "رەالعا" قارسى ماچتى ستاديوننان كورۋ جانە سارى-قارا ءتۇستى مويىن وراعىش الىپ كوماندانى قولداۋ.
"قايرات" جانكۇيەرلەرى ەرنيازبەن بايلانىسىپ، وعان كلۋبتىڭ ناعىز مويىن وراعىشىن سىيلاۋعا نيەت ءبىلدىردى.
مەمگە اينالعان وقيعا
ترەدس جەلىسىندە تاراعان سۋرەتكە جۇرتتار تۇرلىشە پىكىر ءبىلدىرىپ جاتىر. كوبى جانكۇيەردىڭ تاپقىرلىعىنا، ءازىلقويلىعىنا ءسۇيسىنىپ جاتىر.
"ماچتان كەيىن مونشاعا بارادى-اۋ"، "قولدان كەلگەنشە قولداۋ دەگەن وسى"، "جوقتان بار جاساۋ دەيدى عوي مىنانى"،"جارايسىڭ باۋىرىم، ماعان جازشى شىن شارف سىيلايىن"، - دەگەن پىكىرلەر قارشا بورادى.