قازاقستاندا «كاماز» كولىگىنە قاجەتتى قوسالقى بولشەكتەر شىعارىلادى
مەملەكەت باسشىسى تاتارستاننىڭ رەسپۋبليكالىق ماڭىزى بار قالاسى نابەرەجنىە چەلنى شاھارىنا بارىپ، رەسەيدىڭ ءىرى اۆتوموبيل كورپوراسياسى – «كاماز» كومپانيالار توبىنىڭ وندىرىسىمەن تانىستى، دەپ حابارلايدى Almaty-akshamy.kz اقوردانىڭ باسپا ءسوز قىزمەتىنە سىلتەمە جاساپن
«كاماز» الەمدەگى اۋىر جۇك كولىكتەرىن شىعاراتىن جەتەكشى كومپانيالاردىڭ جيىرمالىعىنا كىرەدى. ونىڭ وندىرىستىك قۋاتى جىلىنا 71 مىڭ ماشينا شىعارۋعا مۇمكىندىك بەرەدى.
الىس-جاقىن شەتەلدەرگە كولىك ەكسپورتتايتىن بۇل كومپانيانىڭ باسشىلىعىنىڭ ايتۋىنشا، قازاقستاننىڭ اۆتوموبيل نارىعى وتە ماڭىزدى باعىت. بىلتىرعى جىلدىڭ قورىتىندىسى بويىنشا ەلىمىزدەگى جاڭا جۇك كولىكتەرى نارىعىنداعى «كامازدىڭ» ۇلەسى 42 پايىز بولعان. اتالعان كومپانيا قازاقستاندا بىرنەشە جوبانى قولعا العان. سونىڭ ءبىرى – قوستاناي قالاسىنىڭ يندۋستريالىق ايماعىنداعى شويىن قۇيۋ ءوندىرىسىن ىسكە اسىراتىن «KamLitKZ» زاۋىتىنىڭ قۇرىلىسى. ءوندىرىستى 2024 جىلدىڭ ەكىنشى جارتىجىلدىعىندا ىسكە قوسۋ جوسپارلانىپ وتىر. ءدال وسى يندۋستريالىق ايماقتا كولىكتىڭ قۇرال-سايماندارىن شىعاراتىن زاۋىت سالىنىپ جاتىر.
كومپانيا باسشىلىعىنىڭ ايتۋىنشا، قازاقستاندا الداعى ۋاقىتتا «كاماز» كولىگىنە قاجەتتى قوسالقى بولشەكتەر شىعارىلماق.
مەملەكەت باسشىسى «كاماز» كومپانياسىنىڭ زاۋىتتارىندا تاجىريبە الماسىپ جۇرگەن قازاقستاندىق ماماندارمەن اڭگىمەلەستى. وسىنداي مۇمكىندىك تۋعىزعانى ءۇشىن جۇمىسشى جاستار قازاقستان پرەزيدەنتىنە العىس ايتتى. تاجىريبە جيناۋ ماقساتىمەن ەكى ايعا كەلگەن جۇمىسشىلار قوستانايدا اشىلاتىن زاۋىتتا جۇمىس ىستەيتىن بولادى.
«بۇل – ەكونوميكامىزعا تىڭ سەرپىن بەرەتىن ماڭىزدى جوبا. سىزدەردىڭ قاجەتتى ءبىلىم الىپ، تاجىريبە جيناعاندارىڭىز وتە قۇپتارلىق جايت»، – دەدى مەملەكەت باسشىسى.
بۇدان كەيىن قاسىم-جومارت توقايەۆ ەكونوميكانىڭ نەگىزگى درايۆەرى سانالاتىن مۇناي وڭدەۋ، ماشينا جاساۋ سالالارىنا ارنالعان جانە تاتارستاننان شىعاتىن وزگە دە ونىمدەر قويىلعان كورمەنى ارالاپ كوردى.