قويمالارداعى وق-دارىلەردى ساقتاۋ شارتتارى تەكسەرىلدى
قورعانىس ءمينيسترى گەنەرال-لەيتەنانت رۋسلان جاقسىلىقوۆ باسشىلىق ەتكەن كوميسسيا الماتى جانە قاپشاعاي گارنيزوندارىنا جۇمىس بابىمەن باردى، دەپ حابارلايدى Almaty-akshamy.kz قم سىلتەمە جاساپ.
قورعانىس ۆەدومستۆوسىنىڭ كوميسسياسى قۇرامىندا – قۇرلىق اسكەرلەرىنىڭ باس قولباسشىسى گەنەرال-مايور تالعات قويباقوۆ، رادياسيالىق، حيميالىق، بيولوگيالىق قورعاۋ جانە ەكولوگيالىق قاۋىپسىزدىك، ينجەنەرلىك اسكەرلەر، ستراتەگيالىق جوسپارلاۋ، تاربيە جانە يدەولوگيالىق جۇمىستار دەپارتامەنتتەرىنىڭ، اسكەري ينفراقۇرىلىم، اسكەري پوليسيا، وق-دارىلەر باس باسقارمالارىنىڭ وكىلدەرى دە بار.
قورعانىس ۆەدومستۆوسى ەل باسشىلىعىنىڭ قارۋلى كۇشتەردى رەفورمالاۋ جونىندەگى ءبىرىنشى كەزەكتەگى مىندەتتەرىن ىسكە اسىرۋ جونىندە شارالار قابىلداۋدا. قورعانىس مينيسترلىگىنىڭ باسشىلىق قۇرامىمەن وتكەن كەڭەستە قازاقستان پرەزيدەنتى قاسىم-جومارت توقايەۆتىڭ بەرگەن تاپسىرمالارىن ورىنداۋ اياسىنداعى جۇمىس ساپارى بارىسىندا اسكەرلەردىڭ جاۋىنگەرلىك ازىرلىگىنە، تەحنيكالىق جانە جاۋىنگەرلىك جاراقتاندىرىلۋىنا باستى نازار اۋدارىلدى.
دەسانتتىق-شابۋىلداۋ اسكەرلەرىندە ءبولىم كومانديرلەرى بريگادالاردىڭ جاۋىنگەرلىك مۇمكىندىكتەرى، ماقساتى بويىنشا تاپسىرمالاردى ورىنداۋ ءتارتىبى، سونداي-اق داعدارىستى جاعدايلار تۋىنداعان كەزدە بولىمشەلەردى قولدانۋ ماسەلەلەرى جونىندە باياندادى.
اسكەرلەردى زاماناۋي قارۋ-جاراقپەن جانە اسكەري تەحنيكامەن جابدىقتاۋعا، سونداي-اق اسكەري ينفراقۇرىلىمدى دامىتۋعا ەرەكشە نازار اۋدارىلدى. اسكەرلەردىڭ جاۋىنگەرلىك قابىلەتىن كۇشەيتۋ وسى مىندەتتەردى شەشۋگە تىكەلەي بايلانىستى.
قورعانىس ۆەدومستۆوسىنىڭ باسشىسى قويمالاردا وق-دارىلەردى ساقتاۋ شارتتارىن تەكسەردى. كومانديرلەر اسكەري وبەكتىلەر مەن جاقىن ماڭداعى ەلدى مەكەندەردىڭ قاۋىپسىزدىگىن قامتاماسىز ەتۋ شارالارىنىڭ ورىندالۋ بارىسىن باياندادى.
مەملەكەت باسشىسى وق-دارىلەردى ءقاۋىپسىز ساقتاۋدى قامتاماسىز ەتۋ، سونداي-اق پايدالانۋعا جارامسىز جانە ودان ءارى ساقتاۋعا قاۋىپتىلەرىن كادەگە جاراتۋ جونىندەگى شارالاردى ىسكە اسىرۋدى جالعاستىرۋ قاجەتتىگىنە نازار اۋداردى. قورعانىس ۆەدومستۆوسى ىسكە اسىرىپ جاتقان «ءقاۋىپسىز ەل» ۇلتتىق جوباسىنىڭ باستى ماقساتى – ازاماتتار مەن مەملەكەتتىڭ قاۋىپسىزدىگىن قامتاماسىز ەتۋ.
قۇرلىق اسكەرلەرىنىڭ اسكەري ينستيتۋتىندا گەنەرال-لەيتەنانت رۋسلان جاقسىلىقوۆ وقۋ-تاربيە ءۇردىسىنىڭ ۇيىمداستىرىلۋىمەن، كۋرسانتتاردىڭ تۇرمىس-تىرشىلىگىمەن تانىستى. قارۋلى كۇشتەردىڭ ارداگەرلەرىمەن كەزدەستى. ەڭبەك دەمالىسىندا بولسا دا ولار ارميانىڭ تىنىس-تىرشىلىگىنە بەلسەندى تۇردە قىزىعۋشىلىق تانىتىپ، جاستاردى اسكەري-پاتريوتتىق تاربيەلەۋگە جانە ولاردىڭ اسكەري قىزمەتكە دەگەن ىنتاسىن ارتتىرۋعا ەلەۋلى ۇلەس قوسىپ كەلەدى.
بۇدان وزگە، قورعانىس ءمينيسترى اسكەري قىزمەتشىلەردىڭ وتباسى مۇشەلەرىمەن جۇمىس جونىندەگى قىزمەت باسشىلىعىمەن اڭگىمەلەسىپ، شەشۋدى قاجەت ەتەتىن وزەكتى الەۋمەتتىك ماسەلەلەردى تالقىلادى.