مالىمدەمەنىڭ تولىق ءماتىنىن ۇسىنىدى.
اقوردا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جانە فرانسيا رەسپۋبليكاسىنىڭ پرەزيدەنتى ەممانيۋەل ماكروننىڭ بىرلەسكەن مالىمدەمەسىن جاريالادى، دەپ حابارلادى Almaty-akshamy.kz.
بىرلەسكەن مالىمدەمە
2022 جىلعى 30 قاراشا
- قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ فرانسۋز رەسپۋبليكاسىنىڭ پرەزيدەنتى ەممانيۋەل ماكروننىڭ شاقىرۋىمەن 2022 جىلعى 29-30 قاراشادا فرانسياعا رەسمي ساپار جاسادى.
- مەملەكەت باسشىلارى 2008 جىلعى 11 ماۋسىمداعى قازاقستان رەسپۋبليكاسى مەن فرانسۋز رەسپۋبليكاسى اراسىنداعى ستراتەگيالىق ارىپتەستىك تۋرالى شارتتىڭ قولدانىسىن اتاپ وتە وتىرىپ، ەكى ەل اراسىنداعى بارلىق دەڭگەيدەگى سەنىمدى جانە تۇراقتى ديالوگقا قاناعاتتانۋشىلىق ءبىلدىردى. قازاقستان ̶ فرانسيانىڭ ورتالىق ازياداعى باستى ەكونوميكالىق ارىپتەسى، ال فرانسيا قازاقستان ەكونوميكاسىنىڭ جەتەكشى ينۆەستورلارىنىڭ ءبىرى بولىپ تابىلادى.
- قازاقستان مەن فرانسيا اراسىنداعى ديپلوماتيالىق قارىم-قاتىناستارعا 30 جىل تولىپ وتىرعان كەزەڭدە پرەزيدەنتتەر ەكى ەل اراسىنداعى ساياسي جانە ساۋدا-ەكونوميكالىق ىنتىماقتاستىقتىڭ جوعارى سەرپىنىن قۇپتادى.
- فرانسۋز رەسپۋبليكاسىنىڭ پرەزيدەنتى قازاقستان رەسپۋبليكاسى پرەزيدەنتىنىڭ تۇراقتىلىق پەن ورنىقتى دامۋدىڭ اينىماس شارتى بولىپ تابىلاتىن زاڭ ۇستەمدىگىن، نەگىزگى بوستاندىقتاردى جانە الەۋمەتتىك ادىلەتتىلىكتى نىعايتۋعا باعىتتالعان تەرەڭ رەفورمالار جۇرگىزۋىن قولدايتىنىن راستادى.
- تاراپتار جاھاندىق جانە وڭىرلىك دەڭگەيدە بەيبىتشىلىكتى، قاۋىپسىزدىك پەن تۇراقتىلىقتى نىعايتۋعا ءوزارا جاردەمدەسۋ نيەتىن قۋاتتادى. ولار حالىقارالىق قۇقىق پەن بۇۇ جارعىسىنىڭ نەگىزگى قاعيداتتارىنا، اسىرەسە مەملەكەتتەردىڭ ەگەمەندىگى مەن اۋماقتىق تۇتاستىعىنا وزدەرىنىڭ مىزعىماس بەيىلدىگىن اتاپ ءوتتى. قازاقستان مەن فرانسيا ۋكراينا توڭىرەگىندەگى جاعدايعا، ونىڭ گۋمانيتارلىق سالدارى مەن جاھاندىق ەكونوميكاعا اسەرىنە، ەڭ وسال ەلدەردىڭ ازىق-تۇلىك قاۋىپسىزدىگىنە قاتتى الاڭداۋدا.
- پرەزيدەنتتەر قازاقستان رەسپۋبليكاسى مەن ەۋروپالىق وداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم اياسىندا تىعىز ءوزارا ءىس-قيمىلدى جالعاستىرۋعا دايىن ەكەندىگى جونىندە مالىمدەدى. وسىعان بايلانىستى ولار 2022 جىلعى 27 قازاندا استانادا وتكەن «ەۋروپالىق وداق ̶ ورتالىق ازيا» ءبىرىنشى ءسامميتىنىڭ وتكىزىلۋىن قۇپتادى.
- ولار ورتالىق ازيادا ءىرى كولىكتىك باستامالاردىڭ، اتاپ ايتقاندا ترانسكاسپيي حالىقارالىق كولىك باعىتىنىڭ دامۋىن قاناعاتتانا اتاپ ءوتتى. تاراپتار ەۋروپالىق وداقتىڭ «Global Gateway» جوباسىنىڭ ىسكە اسۋىنا قولداۋ ءبىلدىردى.
- پرەزيدەنتتەر قازاقستان-فرانسيا ىنتىماقتاستىعىنىڭ جوعارى سەرپىنىن باسا ايتتى جانە ستراتەگيالىق ارىپتەستىك رۋحىندا ونى ءارتاراپتاندىرۋدى جانە ءوزارا مۇددەلى بارلىق، اتاپ ايتقاندا ەكونوميكا جانە ينۆەستيسيا، ءبىلىم بەرۋ، دەنساۋلىق ساقتاۋ، عىلىم جانە مادەنيەت سالالارىندا تەرەڭدەتۋدى جالعاستىرۋ تۋرالى ۋاعدالاستىققا قول جەتكىزىلدى.
- ەكونوميكا سالاسىندا پرەزيدەنتتەر ساۋدا مەن ينۆەستيسيانى، اسىرەسى نەگىزگى ەنەرگەتيكالىق سەكتوردا ودان ءارى دامىتۋدىڭ جوعارى الەۋەتىن اتاپ ءوتتى. قازاقستان فرانسياعا ۋران مەن شيكى مۇنايدى نەگىزگى جەتكىزۋشىلەردىڭ ءبىرى بولىپ تابىلادى. تاراپتار اسا باعالى شيكىزات ماتەريالدارى، ونىڭ ىشىندە جەردە سيرەك كەزدەسەتىن ماتەريالدار سالاسىنداعى ءوزارا ىنتىماقتاستىقتى دامىتۋ تۋرالى ۋاعدالاستىققا قول جەتكىزدى. ساپار بارىسىندا جاڭارتىلاتىن ەنەرگيا كوزدەرى، «جاسىل سۋتەگىن» ءوندىرۋ، بەيبىت اتومدى پايدالانۋ، سۋ رەسۋرستارىن باسقارۋ، تەمىر جول كولىگى جانە اگروونەركاسىپ كەشەنى سالالارىندا ءبىرقاتار ەكىجاقتى قۇجاتتارعا قول قويىلدى.
- كليماتتىق كۇن ءتارتىبىنىڭ وزەكتىلىگى تۇرعىسىندا قازاقستاندا جيناقتاۋ مۇمكىندىگىمەن بار، رەسپۋبليكانىڭ كومىرتەگىسىز يننوۆاسيالىق ەنەرگيا كوزدەرىنە كوشۋىنە ىقپال ەتەتىن قۋاتى 1،2 گۆت جەل ەلەكتر ستانسياسىن سالۋ بويىنشا اۋقىمدى جوبانىڭ ماڭىزى اتاپ كورسەتىلدى. بۇل جوبا كليماتتىڭ وزگەرۋىنە قارسى كۇرەس سالاسىنداعى ەكىجاقتى ىنتىماقتاستىعىمىزدىڭ نىعايۋ نىشانى.
- پرەزيدەنتتەر ءبىلىم سالاسىنداعى ىنتىماقتاستىقتىڭ باسىمدىلىعىن اتاپ ءوتتى. ولار استانا مەن الماتىدا ەكى فرانسۋز مەكتەبىن اشۋعا جانە دامىتۋعا قولداۋ ءبىلدىردى. ستۋدەنتتەردىڭ ۇتقىرلىعىن، اتاپ ايتقاندا «اباي-ۆەرن» باعدارلاماسى شەڭبەرىندە شاكىرتاقىلار سانىنىڭ كوبەيۋىنە جانە «بولاشاق» باعدارلاماسى بويىنشا فرانسۋز جوعارى وقۋ ورىندارى ءتىزىمىن كەڭەيتۋ ارقاسىندا ارتتىرۋدى قولدادى. سونداي-اق سوربوننا-قازاقستان ينستيتۋتىن قايتا فورماتتاۋدى قولدايتىندىقتارىن ءبىلدىردى جانە 2022 جىلعى 30 قاراشادا پاريجدە 7ء-شى قازاقستان-فرانسيا جوعارى ءبىلىم فورۋمىنىڭ ءوتۋىن، سونداي-اق ءبىلىم بەرۋ سالاسىنداعى ءبىرقاتار قۇجاتتارعا قول قويۋدى قۇپتادى.
- دەنساۋلىق ساقتاۋ سالاسىندا ەكى ەلدىڭ جەتەكشى زەرتتەۋ جانە مەديسينالىق ورتالىقتارى اراسىنداعى ونكولوگيا، مەديسينالىق مەكەمەلەردى باسقارۋ جانە مەديسينالىق قىزمەتتەر كورسەتۋ سالاسىنداعى ارىپتەستىكتى جالعاستىرۋدىڭ ماڭىزدىلىعىن راستادى.
- پرەزيدەنتتەر مادەنيەت سالاسىنداعى ىنتىماقتاستىقتى ارتتىرۋ نيەتىن ءبىلدىردى. ولار تاياۋ جىلدارى ەكى ەل اراسىندا مادەني ءىس-شارالاردى، ونىڭ ىشىندە پاريجدە قازاقستان رەسپۋبليكاسىنىڭ ۇلتتىق كورمەسىن وتكىزۋگە باعىتتالعان باستامالاردى قۇپتادى.
- پرەزيدەنتتەر شارم-ەل-شەيحتە وتكەن COP 27 كونفەرەنسياسىندا كليماتتىڭ وزگەرۋىنە قارسى كۇرەستە وزدەرىنىڭ بەرىك ۇستانىمدارىن قۋاتتادى جانە 1،5° دەڭگەيىندەگى جاھاندىق جىلۋ دەڭگەيىن ۇستاۋ ماقساتىن راستاۋدى قۇپتادى.
- قازاقستان رەسپۋبليكاسىنىڭ پرەزيدەنتى فرانسۋز رەسپۋبليكاسىنىڭ پرەزيدەنتىنە 2024 جىلى پاريجدە وتەتىن ءحححىىى جازعى وليمپيادا ويىندارىنا دايىندىقتا تابىس تىلەدى.
- قازاقستان رەسپۋبليكاسىنىڭ پرەزيدەنتى فرانسۋز رەسپۋبليكاسىنىڭ پرەزيدەنتىن تاياۋ ۋاقىتتا قازاقستانعا ساپارمەن كەلۋگە شاقىردى.