تۇرعىنداردىڭ سانىن ەسكەرۋگە مۇمكىندىك بەرەتىن وزگەرىستەر قاجەت.
ءماجىلىس دەپۋتاتى ءمادي ەليۋبايەۆ ۇلكەن قالالارعا جاقىن ورنالاسقان اۋىلداردىڭ ماسەلەسىن كوتەرىپ، ق ر ىشكى ىستەر ءمينيسترى مارات احمەتجانوۆتىڭ اتىنا ساۋال جولدادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«ازاماتتاردىڭ شالعايداعى اۋىلداردان قالالارعا ۇنەمى قونىس اۋدارۋى بايقالىپ وتىر. دەگەنمەن قالانىڭ وزىندە جىلجىمايتىن مۇلىك الۋ وڭايعا ەمەس. سوندىقتان ادامدار قالاعا جاقىن تۇرعان ەلدى مەكەندەرگە قونىستانادى. بۇل اۋىلداردىڭ ينفراقۇرىلىمى كوپ تۇرعىنعا ارنالماعاندىقتان، ادامدار ساپالى الەۋمەتتىك قىزمەتتەر (مەديسينا، ءبىلىم بەرۋ جانە ت.ب.) الۋ ءۇشىن قالالاردا تىركەلەدى. ءوز كەزەگىندە، اۋىل تۇرعىندارىنىڭ سانىنا سايكەس كەلەتىن اۋىلدىڭ ينفراقۇرىلىمىن قۇرۋ ءۇشىن قولدانىستاعى زاڭناما تالاپتارى بويىنشا وسى ەلدى مەكەندە تۇراتىن ءتۇرعىندار تىركەلۋى قاجەت. تىركەلمەگەن ادامدار وسى اۋىلدا ەسەپكە الىنبايدى. ياعني، مۇنداي اۋىلدارداعى رەسمي تىركەلگەن حالىق سانى ناقتى جاعدايعا سايكەس كەلمەيدى، كەيبىر جاعدايلاردا ايىرماشىلىق 5-6 ەسەگە دەيىن جەتەدى»، - دەدى م. ەليۋبايەۆ.
وسى ورايدا ول اۋىلدا جالپى العاندا 30-35 مىڭ ادام تۇرسا، ال سونىڭ تەك 5-7 مىڭى عانا تىركەلگەنىن ايتتى.
«جوعارىدا ايتىلعانداردى ەسكەرە وتىرىپ، بۇل اۋىلداردا تۇرعىندار تولىق تىركەلمەگەن. بۇگىندە ستاتيستيكانى جۇرگىزەتىن ورگاندار اۋىلدا تۇراتىن حالىق سانى بويىنشا ناقتى سانداردى بەرە المايدى. «AMANAT» پارتياسىنىڭ اۋماقتاردى ويلاستىرىلعان تۇردە دامىتۋ جونىندەگى مىندەتىن ورىنداۋ ءۇشىن ەلدى مەكەندەردەگى تۇرعىنداردىڭ ناقتى سانىن ەسكەرۋگە مۇمكىندىك بەرەتىن وزگەرىستەر قاجەت. بۇل تۇرعىدا ق ر ىشكى ىستەر مينيسترلىگى، ق ر سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى، سونداي-اق ق ر ستراتەگيالىق جوسپارلاۋ جانە رەفورمالار اگەنتتىگىنە ءتيىستى ءىس-شارالاردى جۇزەگە اسىرۋ قاجەت. اتاپ ايتقاندا، تۇرعىنداردىڭ سانى مەن قۇرىلىمىنىڭ كورسەتكىشتەرىن ەسەپتەۋ ادىستەمەسىن وزگەرتۋ كەرەك. ەكىنشىدەن، ۋاقىتشا تىركەۋدى قاداعالاۋ تەتىكتەرىن ازىرلەۋ، رەسپۋبليكا ازاماتتارىنىڭ تىركەلۋىنە جانە ۋاقىتشا تىركەلۋىنە قاتىستى باقىلاۋدى كۇشەيتۋ قاجەت»، - دەدى دەپۋتات.