توقايەۆ ءىى ەليزاۆەتا پاتشايىمنىڭ قايتىس بولۋىنا بايلانىستى كوڭىل ايتتى

قازاقستان پرەزيدەنتى بارلىق بريتاندىقتاردىڭ قايعىسىنا ورتاقتاستى.

پرەزيدەنت قاسىم-جومارت توقايەۆ ۇلىبريتانيا جانە سولتۇستىك يرلانديا كورولى ءىىى كارلعا اناسى II ەليزاۆەتا پاتشايىمنىڭ قايتىس بولۋىنا بايلانىستى كوڭىل ايتۋ جەدەلحاتىن جولدادى، دەپ حابارلايدى Almaty-akshamy.kz اقورداعا سىلتەمە جاساپ.

مەملەكەت باسشىسى قازاقستان حالقىنىڭ جانە جەكە ءوزىنىڭ اتىنان كورول ءىىى كارلدىڭ، كورولدىك وتباسى مەن بارلىق بريتاندىقتاردىڭ قايعىسىنا ورتاقتاسىپ، كوڭىل ايتتى.

پرەزيدەنت ەلدى 70 جىل بويى باسقارعان ءىى ەليزاۆەتا پاتشايىمنىڭ اسا كورنەكتى كوشباسشى، ۇلى بريتان حالقىنىڭ بىرلىگى مەن تاباندىلىعىنىڭ سيمۆولى بولعانىن اتاپ ءوتتى.

«ونىڭ دانالىققا، مەيىرىمگە جانە جىگەرگە تولى باسشىلىعى بىرىككەن كورولدىكتىڭ ودان دا تۇراقتى، الۋان ءتۇرلى جانە وركەندەگەن قوعام قۇرۋ جولىندا قارقىندى دامۋىنا ءوز سەپتىگىن تيگىزدى. ول حالىقارالىق قاۋىپسىزدىك پەن ورنىقتى دامۋدى نىعايتۋعا باعىتتالعان كۇش-جىگەردى ىلگەرىلەتۋدە كوشباسشى بولدى. ونىڭ تەكتىلىگى، قادىر-قاسيەتى مەن وراسان زور جەتىستىگى الەمدەگى ميلليونداعان ادامدى جىگەرلەندىرە تۇسەتىنىنە، ال مول مۇراسى وسكەلەڭ ۇرپاقتىڭ جۇرەگىندە ماڭگى ساقتالاتىنىنا سەنىمدىمىن»، – دەپ جازىلعان قازاقستان پرەزيدەنتىنىڭ جەدەلحاتىندا.

قاسىم-جومارت توقايەۆ قازاقستانداعى ۇلىبريتانيا ەلشىلىگىنە باردى.
 
مەملەكەت باسشىسى ۇلىبريتانيانىڭ قازاقستانداعى ەلشىلىگىنە بارىپ، II ەليزاۆەتا پاتشايىمنىڭ قايتىس بولۋىنا بايلانىستى كوڭىل ايتتى. 

پرەزيدەنت كوڭىل ايتۋ كىتابىنا جازبا قالدىردى.