مەملەكەت باسشىسى ءازىربايجان پرەزيدەنتى يلحام الييەۆپەن كەزدەستى. پرەزيدەنت ءوزىنىڭ جۋىردا باكۋگە جاساعان ساپارى ءقازاق-ازىربايجان قارىم-قاتىناسىن جاڭا دەڭگەيگە كوتەرگەنىن اتاپ ءوتتى، دەپ حابارلايدى Almaty-akshamy.kz اقورداعا سىلتەمە جاساپ.
– ەلىمىزگە كەلىپ، سامميتكە قاتىسقانىڭىز ءۇشىن العىس ايتامىن. ەكىجاقتى قارىم-قاتىناسقا ارنايى توقتالعىم كەلەدى. باكۋگە ساپارىم كەزىندە كورسەتكەن قوناقجايلىعىڭىزعا ريزاشىلىعىمدى بىلدىرەمىن. ءبىزدىڭ كەلىسسوزدەرىمىز تابىستى بولدى جانە شەت مەملەكەتتەردەگى ساياسي جانە ەكونوميكالىق توپتاردىڭ نازارىن اۋداردى. ءبىز ءازىربايجاندى وداقتاسىمىز، ستراتەگيالىق سەرىكتەسىمىز دەپ ەسەپتەيمىز. ءارقاشان وسى باعىتتى ۇستانامىز، – دەدى قاسىم-جومارت توقايەۆ.
قازاقستان مەن ءازىربايجان پرەزيدەنتتەرى قول جەتكىزىلگەن ۋاعدالاستىقتاردى ساپالى جۇزەگە اسىرۋ ءۇشىن بارلىق قاجەتتى شارالاردى قابىلداۋ جونىندە ۇكىمەتتەرگە تاپسىرما بەرىلگەنىن اتاپ ءوتتى.
– ءازىربايجان ءوز ايماعىندا عانا ەمەس، كەڭ گەوگرافيالىق اۋقىمدا دا ماڭىزدى ءرول اتقارادى. ءقازىر كۇن تارتىبىندە «ورتا ءدالىزدى» دامىتۋ ماسەلەسى تۇر. ءبىز دە وسى فورماتتاعى جۇمىستاردى جالعاستىرۋعا مۇددەلىمىز، – دەدى مەملەكەت باسشىسى.
سونىمەن قاتار پرەزيدەنتتەر ەكى ەلدىڭ مادەني-گۋمانيتارلىق سالاداعى ءوزارا تابىستى ىس-ارەكەتىن، ونىڭ ىشىندە قازاقستان مەن ازەربايجاننىڭ تاريحي جانە مادەني قۇندىلىقتارىن ىلگەرىلەتۋگە باعىتتالعان ءبىرقاتار بىرلەسكەن جوبانىڭ جۇزەگە اسىرىلۋىن جوعارى باعالادى.
– ءبىز ءازىربايجاننىڭ كورنەكتى مەملەكەت قايراتكەرى گەيدار الييەۆ اتىنداعى كوشەنى اۋىستىرۋ تۋرالى ايتتىق. ەلوردامىزدا وعان لايىقتى ورىن بار دەپ سانايمىن. مۇنداي ورىن تابىلدى. مەن ونى ماقۇلدادىم. ەندىگى ماسەلە ۋاقىتتىڭ ەنشىسىندە، – دەدى قازاقستان پرەزيدەنتى.
يلحام الييەۆ اوسشك سامميتىنە شاقىرعانى جانە قازاق حالقىنىڭ ءداستۇرلى قوناقجايلىعى ءۇشىن قاسىم-جومارت توقايەۆقا العىسىن ايتتى.
– باۋىرلاس قازاقستانعا كەلگەنىمە وتە قۋانىشتىمىن. سونداي-اق وتكىزىلگەن ءسامميتتىڭ وڭ ناتيجەلەرىمەن قۇتتىقتاعىم كەلەدى. بۇل قازاقستاننىڭ حالىقارالىق ارەناداعى ءرولى مەن بەدەلى جوعارى ەكەنىن كورسەتەدى. ەڭ الدىمەن، گەيدار ءالي ۇلى الييەۆتى ەسكە الىپ، قۇرمەت كورسەتكەنىڭىز ءۇشىن العىس ايتقىم كەلەدى. ءسىزدىڭ ساپارىڭىزدان بەرى ءبىز جاقسى جەتىستىكتەر مەن ناتيجەلەرگە قول جەتكىزدىك، – دەدى ءازىربايجان پرەزيدەنتى.
سونىمەن قاتار كەزدەسۋ بارىسىندا مەملەكەتتەر باسشىلارى ەكىجاقتى ىنتىماقتاستىقتىڭ باسىم باعىتتارى مەن حالىقارالىق كۇن تارتىبىندەگى وزەكتى ماسەلەلەردى تالقىلادى.