توقايەۆ: ءازىربايجان ارقىلى قازاق مۇنايىن الەمدىك نارىققا شىعارۋ – باسىم مىندەت

ورتاق ءدالىزدى دامىتۋ جونىندەگى جول كارتاسى

ترانسكاسپيي حالىقارالىق كولىك باعىتى الەۋەتىن تولىققاندى اشۋ زور ماڭىزعا يە. بۇل تۋرالى ءازىربايجان پرەزيدەنتى يلحام الييەۆپەن كەلىسسوزدەردەن كەيىنگى ب ا ق وكىلدەرىنە ارنالعان بريفينگتە مەملەكەت باسشىسى قاسىم-جومارت توقايەۆ ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

«ترانسكاسپيي حالىقارالىق كولىك باعىتى الەۋەتىن تولىققاندى اشۋ زور ماڭىزعا يە. ءسوز لوگيستيكالىق قىزمەتتى جەتىلدىرۋ، ءبىرىڭعاي كولىك وپەراتورلارىن قۇرۋ، تەحنيكالىق جانە تاريفتىك شارتتاردى جاڭعىرتۋ، اكىمشىلىك كەدەرگىلەردى جويۋ جانە تۇيىق لوگيستيكالىق سيكل قالىپتاستىرۋ جايىندا بولىپ وتىر. سونىمەن قاتار 2022-2027 جىلدارعا ارنالعان ورتا ءدالىزدى دامىتۋ جونىندەگى جول كارتاسىن ءتيىمدى جۇزەگە اسىرۋ زور ماڭىزعا يە. ءبىز بۇل باعىتقا ارتا تۇسكەن قىزىعۋشىلىقتى تولىقتاي قولداۋ جانە ونىڭ ينفراقۇرىلىمدىق دامۋىنا ءۇشىنشى ەلدى تارتۋ ماڭىزدى ەكەندىگىنە كەلىستىك. بۇل ءىس-شارالاردىڭ بارلىعى، سونداي-اق حالىقارالىق سەرىكتەستەرىمىزبەن ءوزارا تىعىس ءىس-قيمىل «شىعىس-باتىس» باعىتىندا جۇكتەردى تۇراقتى جانە جەدەل جەتكىزۋگە كەپىلدىك بەرۋگە جول اشادى»، - دەدى قاسىم-جومارت توقايەۆ.

مەملەكەت باسشىسى كەلىسسوزدەر بارىسىندا ەنەرگەتيكا سالاسىنداعى ىنتىماقتاستىقتى ۇلعايتۋعا دا باسا نازار اۋدارىلعانىنا توقتالدى.

«بۇگىندە الەمدىك نارىققا ەنەرگيا رەسۋرستارىن جەتكىزۋدى ودان ءارى ءارتاراپتاندىرۋ ءبىزدىڭ باسىم مىندەتىمىز سانالادى. وزدەرىڭىز دە بىلەتىندەي، بيىل ءبىزدىڭ ۋاعدالاستىعىمىزدىڭ ارقاسىندا ءازىربايجان ارقىلى قازاقستاندىق مۇنايدىڭ ءبىرىنشى پارتياسى جونەلتىلگەن بولاتىن. كەلەسى قادام – جەتكىزۋ كولەمىن ارتتىرۋ جانە وعان ۇزاقمەرزىمدى تۇراقتى سيپات بەرۋ»، - دەدى پرەزيدەنت.