بۇۇ ازاپتاۋدىڭ الدىن الۋ جونىندەگى كىشى كوميتەتىنىڭ دەلەگاسياسى قازاقستانعا ساپار جاسادى
بىرىككەن ۇلتتىق ۇيىمى وكىلدەرىنەن قۇرىلعان ارنايى دەلەگاسيا قازاقستاننىڭ تۇرمەلەرى مەن ۋاقىتشا ۇستاۋ يزولياتورىنداعى جاعدايدى باقىلادى. بۇل تۋرالى سىرتقى ىستەر مينيسترلىگىندە وتكەن بريفينگ بارىسىندا بەلگىلى بولدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بيىل 26 ناۋرىز بەن 1 ءساۋىر ارالىعىندا بۇۇ ازاپتاۋدىڭ الدىن الۋ جونىندەگى كىشى كوميتەتىنىڭ دەلەگاسياسى قازاقستانعا ساپار جاسادى. ونىڭ بارىسىندا دەلەگاسيا مۇشەلەرى ادام قۇقىقتارى جونىندەگى ۋاكىلمەن، ق ر كونستيتۋسيالىق سوتىنىڭ توراعاسىمەن، مەملەكەتتىك ورگانداردىڭ وكىلدەرىمەن، سونداي-اق ازاپتاۋعا قارسى ۇلتتىق الدىن الۋ تەتىگىنىڭ مۇشەلەرىمەن، ازاماتتىق قوعام جانە بۇۇ قۇرىلىمدارى وكىلدەرىمەن كەزدەستى. دەلەگاسيا وكىلدەرى تۇرمەلەردە، تەرگەۋ جانە ۋاقىتشا ۇستاۋ يزولياتورلارىندا، سونداي-اق پوليسيا بولىمشەلەرى مەن قاماۋدا ۇستاۋ ورىنداردا بولىپ، جاعدايدى باقىلادى»، - دەدى ءسىم رەسمي وكىلى ايبەك سمادياروۆ.
ونىڭ مالىمدەۋىنشە، بۇۇ ازاپتاۋدىڭ الدىن الۋ جونىندەگى كىشى كوميتەت دەلەگاسياسى ەلىمىزگە وسىمەن ەكىنشى رەت ساپار شەگىپ وتىر.
«بۇل ساپار مەملەكەت باسشىسىنىڭ ساياسي رەفورمالارىن جۇزەگە اسىرۋ ءۇشىن قازاقستان قابىلداعان حالىقارالىق مىندەتتەمەلەر مەن ۇسىنىمداردى جۇزەگە اسىرۋداعى اشىقتىعىن ءارى بەيىلدىلىگىن راستاعانىن اتاپ وتكەن ءجون. بۇۇ-نىڭ ازاپتاۋدىڭ الدىن الۋ جونىندەگى كىشى كوميتەتى 6 ايدىڭ ىشىندە قازاقستان ۇكىمەتىنە باس بوستاندىعىنان ايىرىلعان ادامدارعا قاتىستى ازاپتاۋدىڭ جانە باسقا دا قاتىگەزدىك پەن جازالاۋدىڭ الدىن الۋ بويىنشا ەسكەرتۋلەرى مەن ۇسىنىمدارىن ۇسىنادى»، - دەيدى ول.