تەرگەۋ شارالارى ءۇش ايعا دەيىن سوزىلۋى مۇمكىن
ق ر سىرتقى ىستەر مينيسترىگىنىڭ وكىلى وڭتۇستىك كورەيادا اۋەجايدان قاشىپ كەتكەن ەكى قازاقستاندىقتىڭ نە ءۇشىن ايىپتالىپ وتىرعانىن ءتۇسىندىردى، دەپ حابارلايدى Almaty-akshamy.kz Azattyq Ruhy-نا سىلتەمە جاساپ.
ۆەدومستۆونىڭ رەسمي وكىلى ايبەك سمادياروۆتىڭ ايتۋىنشا، 24 ناۋرىزدا ينچحون اۋەجايىندا قاشىپ كەتكەن ەكى قازاقستاندىق قازىرگى كەزدە تەرگەۋ يزولياتورىندا وتىر.
«اۋەجايداعى ءتولقۇجاتتىق باقىلاۋ كەزىندە تاشكەنت قالاسىنان كەلگەن قازاقستاننىڭ ەكى ازاماتىنا كورەيا رەسپۋبليكاسىنا كىرۋگە رۇقسات بەرىلمەگەن. ولار تۇندە قاشىپ شىعىپ، وڭتۇستىك كورەيا اۋماعىنا زاڭسىز كىرگەن. 26 ناۋرىزدا ولاردىڭ بىرەۋى ۇستالدى. ەكىنشىسى 29 ناۋرىزدا پوليسەيگە ءوزى بەرىلدى. قازىرگى ۋاقىتتا ولاردىڭ ەكەۋى دە ينچحون قالاسىنداعى كوشى-قون ورتالىعىندا تەرگەۋ يزولياتورىندا وتىر»، - دەدى ايبەك سمادياروۆ.
ول وڭتۇستىك كورەيا زاڭناماسىنا سايكەس، تەرگەۋ شارالارى ءۇش ايعا دەيىن سوزىلۋى مۇمكىن ەكەنىن اتاپ ءوتتى. سودان كەيىن ءىس پروكۋراتۋراعا بەرىلەدى. تەرگەۋ قۇپياسىنا سايكەس، كورەيا رەسپۋبليكاسىنىڭ قۇزىرلى ورگاندارى ءىستىڭ ەگجەي-تەگجەيىن جاريالاماي وتىر.
«ءبىزدىڭ اقپاراتىمىز بويىنشا، بۇل ازاماتتارعا وڭتۇستىك كورەيا زاڭناماسىن ءۇش رەت بۇزعانى ءۇشىن ايىپ تاعىلىپ وتىر. ءبىرىنشىسى – يمميگراسيالىق باقىلاۋ تۋرالى زاڭدى بۇزۋ، ەلگە زاڭسىز كىرۋ. ەكىنشىسى – يمميگراسيالىق باقىلاۋ، ەل اۋماعىنا زاڭسىز كەلۋ تۋرالى زاڭنامانى بۇزۋ. ءۇشىنشىسى – اۋەجاي نىساندارى مەن ونىڭ نىساندارىنا قاتىستى زاڭدى بۇزۋ، ماتەريالدىق شىعىن كەلتىرۋ»، - دەپ تولىقتىردى ءسىم وكىلى.
ايبەك سمادياروۆ قازاقستاننىڭ وڭتۇستىك كورەياداعى ەلشىلىگى جەرگىلىكتى قۇقىق قورعاۋ ورگاندارىمەن جانە ازاماتتاردىڭ تۋىستارىمەن تۇراقتى بايلانىستا ەكەنىن ايتتى. سىرتقى ىستەر مينيسترلىگى وڭتۇستىك كورەيادا قازاقستان ازاماتتارىنىڭ جاپپاي جۇمىستان بوساتىلعانى تۋرالى تاراعان اقپارات شىندىققا جاناسپايتىنىن اتاپ ءوتتى.
تاقىرىپقا وراي: «انامنىڭ وتاسىنا اقشا جينايمىن دەپ كەتكەن ەدى» – وڭتۇستىك كورەيادا ۇستالعان جىگىتتىڭ اپكەسى
«بۇل وقيعا رەسمي تۇردە جۇمىس ىستەيتىن قازاقستان ازاماتتارىنا اسەر ەتكەن جوق. ەستەرىڭىزگە سالا كەتەيىك، كورەيا رەسپۋبليكاسىنىڭ اۋماعىندا ەڭبەك قىزمەتى تەك ارنايى رۇقسات قاعازى مەن جۇمىس بەرۋشى راسىمدەيتىن ارنايى ۆيزا بولعان جاعدايدا عانا جۇزەگە اسىرىلۋى مۇمكىن. جۇمىسقا ورنالاسۋدىڭ قالعان نۇسقالارى زاڭسىز سانالادى»، - دەدى ا. سمادياروۆ.
ەسكە سالايىق، 27 ناۋرىزدا ق ر سىرتقى ىستەر مينيسترلىگى وڭتۇستىك كورەياعا كىرۋگە تىيىم سالىنعان ەكى قازاقستان ازاماتىنىڭ ينچحون حالىقارالىق اۋەجايىنان زاڭسىز شىعىپ كەتكەنىن حابارلادى. كەيىننەن ولاردىڭ ەكەۋىنىڭ دە ۇستالعانى بەلگىلى بولدى.